Read სბს–2013 იესო ნავეს ძე 11 Bible Online

იესო ნავეს ძე 11 - სბს–2013 bible

იესო ნავეს ძე 11

¹და როცა გაიგო ეს იაბინმა, ხაცორის მეფემ, მაშინვე შეუთვალა იობაბს, მადონის მეფეს, და შიმრონისა და აქშაფის მეფეებს,

²და აგრეთვე მეფეებს, რომელნიც მკვიდრობდნენ ჩრდილოეთში, მთასა და ბარში, ქინერეთის სამხრეთით, და ყარაბაში, და ნაფოთ-დორში, დასავლეთით.

³ქანაანელებს, რომლებიც მკვიდრობდნენ აღმოსავლეთით და დასავლეთით, და ამორეველებს, ხეთელებს, ფერიზელებს და იებუსელებს – მთაში, ხიველებს ხერმონის ძირას, მიცფას ქვეყანაში.

⁴და გამოვიდნენ ისინი და მთელი ბანაკი მათთან ერთად, მრავალრიცხოვანი ხალხი, იმ ქვიშასავით უთვალავი, ზღვის ნაპირზე რომაა; ძალზე მრავალი იყო ცხენი და ეტლი.

⁵და შეიყარა ყველა ეს მეფე, და მოვიდნენ, და დაიბანაკეს ერთად მერომის წყლებთან, რათა ისრაელს შებრძოლებოდნენ.

⁶და უთხრა უფალმა იესოს: „ნუ გეშინია მათი, რადგან ხვალ, ამ დროისთვის, ყველა მათგანს შევმუსრავ ისრაელის წინაშე; მათ ცხენებს ძარღვები გადაუჭერით და მათი ეტლები ცეცხლში დაწვით.“

⁷იესო თავისი ჯარით მოულოდნელად მიადგა მერომის წყლებს და თავს დაესხა მტერს.

⁸და ხელში ჩაუგდო ისინი უფალმა ისრაელს. მოსრეს ისინი ისრაელიანებმა და სდიეს დიდ ციდონამდე, მისრეფოთ-მაიმამდე, და თვით მიცფეს ველამდე აღმოსავლეთით, და მოსრეს ისინი, და არავინ დაუტოვებიათ მათგან ცოცხალი.

⁹და ისე მოექცა მათ იესო, როგორც უთხრა მას უფალმა: მათ ცხენებს ძარღვები გადაუჭრა და მათი ეტლები ცეცხლში დაწვა.

¹⁰მაშინვე გამობრუნდა იესო და დაიპყრო ხაცორი, და მახვილით განგმირა მისი მეფე.

¹¹მახვილის პირით ამოხოცეს ისრაელიანებმა ყოველი სული ვინც კი ქალაქში ცხოვრობდა, დაარისხეს, ცოცხალი არავინ დატოვეს, ხაცორი კი ცეცხლით დაწვა იესომ.

¹²და ყველა მეფე და ამ მეფეთა ყველა ქალაქი ჩაიგდო ხელში იესომ, და გაანადგურა ისინი მახვილის პირით, და დაარისხა, როგორც უფლის მსახურის, მოსეს, ბრძანება იყო.

¹³ისრაელიანთ არ დაუწვავთ ბორცვებზე გაშენებული არც ერთი ქალაქი, გარდა ხაცორისა, მხოლოდ ის დაწვა იესომ.

¹⁴და ამ ქალაქების მთელი ნადავლი და პირუტყვი თავისთვის დაიტაცეს ისრაელიანებმა; ხოლო ყველა ადამიანი მოსრეს მახვილის პირით მათ, ვიდრე არ გაანადგურეს მთლიანად, ერთიც არ დაუტოვებიათ ცოცხალი.

¹⁵როგორც უბრძანა უფალმა მოსეს, თავის მსახურს, ასევე უანდერძა მოსემ იესოს, და ასევე შეასრულა იესომ, ერთი სიტყვითაც არ გადაუხვევია იმისაგან, რაც უბრძანა უფალმა მოსეს.

¹⁶და აიღო იესომ მთელი ეს მთიანი ქვეყანა და მთელი ნეგები, მთელი გოშენის მხარე, შეფელა, და ყარაბა, ისრაელის მთა და ბარი –

¹⁷ხალაკის მთიდან მოკიდებული სეყირისაკენ, ვიდრე ბაყალ-გადამდე, ლიბანის ველზე, ხერმონის მთის ძირას, და ყველა მათი მეფე შეიპყრო და მოსრა.

¹⁸დიდხანს ებრძოდა იესო ამ მეფეებს.

¹⁹არ ყოფილა ქალაქი, რომელიც დაზავებოდეს ისრაელის ძეთ, ხიველების, გიბეონის მკვიდრთა, გარდა. ისრაელიანებმა ყველა ქალაქი ბრძოლით აიღეს.

²⁰რადგან უფლისგან იყო, გული რომ გაისასტიკეს, და ბრძოლით ხვდებოდნენ ისრაელს, იმისათვის, რომ მისცემოდნენ დარისხებას, და არ ჰქონოდათ შეწყალება, არამედ ისე მომსპარიყვნენ, როგორც უბრძანა უფალმა მოსეს.

²¹იმხანადვე გაილაშქრა იესომ ყანაკელთა წინააღმდეგ და ამოწყვიტა ისინი მთაში, ხებრონში, დებირში, ყანაბში და იუდასა და ისრაელის მთელ მთიანეთში; მათი ქალაქებიანად დაარისხა ისინი იესომ.

²²არავინ დარჩენილა ყანაკელთაგან ისრაელიანთა ქვეყანაში, მხოლოდ ღაზაში, გათში და აშდოდში დარჩნენ ისინი.

²³და დაიპყრო იესომ მთელი ქვეყანა, როგორც აღუთქვა უფალმა მოსეს, და მისცა იგი იესომ ისრაელს სამკვიდროდ, მათი ტომებისათვის დასანაწილებლად. და მოისვენა ქვეყანამ ომისაგან.