Read სბს–2013 იესო ნავეს ძე 18 Bible Online

იესო ნავეს ძე 18 - სბს–2013 bible

იესო ნავეს ძე 18

¹და შეიყარა ისრაელის ძეთა მთელი თემი შილოში, და დაავანეს იქ საკრებულო კარავი, რადგან ქვეყანა უკვე მთლიანად დამორჩილებული იყო.

²და დარჩა ისრაელიანთაგან შვიდი ტომი, რომელთაც ჯერ მიღებული არ ჰქონდათ თავიანთი სამკვიდრო.

³და უთხრა იესომ ისრაელიანთ: „რაღას აყოვნებთ, რატომ არ მოდიხართ ამ ქვეყნის დასამკვიდრებლად, უფალმა, თქვენი მამების ღმერთმა, რომ მოგცათ?

⁴გამოყავით თითო ტომიდან სამ-სამი კაცი, და მე გავგზავნი მათ, რათა მოიარონ ეს ქვეყანა. აღწერონ მათ იგი, რათა შესაძლებელი გახდეს მისი დანაწილება სამკვიდროებად, და დაბრუნდნენ ჩემთან.

⁵მათ იგი უნდა გაყონ შვიდ ნაწილად. იუდა დადგეს თავის საზღვარზე სამხრეთით; და იოსების სახლი თავის საზღვარზე დადგეს ჩრდილოეთით.

⁶და აღწერეთ ქვეყანა შვიდ ნაწილად, და აღწერილი მომიტანეთ მე. და მე გიყრით წილს აქ უფლის, ჩვენი ღმერთის, წინაშე.

⁷ლევიანთ არა მიეცემათ ნაწილი თქვენს მიწაზე, რადგან უფლის მღვდლობაა მათი სამემკვიდრო; ხოლო გადის და რეუბენის ტომებმა და მანაშეს ნახევარმა ტომმა უკვე მიიღეს უფლის მსახურის, მოსესგან, თავიანთი სამკვიდრო იორდანეს აღმოსავლეთით.“

⁸და ადგნენ ეს კაცები და წავიდნენ. და უბრძანა იესომ მიმავალთ, რომ აღეწერათ ქვეყანა: „წადით, მოიარეთ ქვეყანა და აღწერეთ იგი, და დაბრუნდით ჩემთან. და აქ, შილოში, წილს გიყრით უფლის წინაშე.“

⁹და წავიდნენ ის კაცები, მოიარეს ქვეყანა და ჩაწერეს ის წიგნში ქალაქების მიხედვით, შვიდ ნაწილად, და დაბრუნდნენ შილოს ბანაკში იესოსთან.

¹⁰იქ, შილოში, უყარა მათ წილი იესომ უფლის წინაშე და დაანაწილა ქვეყანა ისრაელიანთა ტომებს შორის.

¹¹ბენიამინის ტომის მემკვიდრეთ მათ ყველა საგვარეულოს წილად ხვდა სამკვიდრო, რომელიც იუდასა და იოსების ძეთა სამკვიდროთა შორის იყო.

¹²მათი საზღვარი ჩრდილოეთით იწყებოდა იორდანედან და მიიწევდა იერიხოს ჩრდილოეთით, მიუყვებოდა მთას დასავლეთისკენ და თავდებოდა ბეთ-ავენის უდაბნოში.

¹³იქიდან საზღვარი გადიოდა ლუზისკენ, ლუზს, ანუ ბეთელს სამხრეთის მხრიდან უვლიდა და საზღვარი ეშვებოდა ყატაროთ-ადარისაკენ, მთაზე, რომელიც ქვემო ბეთ-ხორონის სამხრეთით იყო.

¹⁴და მიიწევდა საზღვარი და უხვევდა დასავლეთით, მთის სამხრეთით, რომელიც ბეთ-ხორონის წინ იყო, და თავდებოდა კირიათ-ბაყალთან, ანუ კირიათ-იეყარიმთან, იუდას ძეთა ქალაქთან. ეს იყო დასავლეთის მხარე.

¹⁵და სამხრეთის მხარე: კირიათ-იეყარიმის კიდედან გადიოდა საზღვარი ზღვისკენ და აღწევდა ნეფთოახის წყარომდე.

¹⁶იქიდან საზღვარი ეშვებოდა მთის ძირისაკენ, რომელიც ბენ-ჰინომის ველის წინაშე იყო, რეფაიმის ველზე ჩრდილოეთით, და ეშვებოდა ჰინომის ველზე, იებუსელთა სამხრეთით, და ჩადიოდა ყენ-როგელში.

¹⁷და უხვევდა ჩრდილოეთიდან, და გადიოდა ყენ-შემეშისაკენ, და მიემართებოდა გელილოთისკენ, რომელიც ადუმიმის მაღლობის პირისპირ იყო, და ეშვებოდა რეუბენის ძისა, ბოჰანის, ქვასთან.

¹⁸შემდეგ საზღვარი გადიოდა ბეთ-ყარაბას ჩრდილოეთით და ეშვებოდა იორდანეს ვაკეზე.

¹⁹შემდეგ საზღვარი მიჰყვებოდა ბეთ-ხოგლას ჩრდილოეთით, და თავდებოდა მარილოვანი ზღვის ჩრდილოეთ კიდესთან (იორდანეს შესართავთან). ეს იყო სამხრეთის საზღვარი.

²⁰აღმოსავლეთის საზღვარი იყო იორდანე. ეს იყო საზღვრები ბენიამინის ძეთა ყველა საგვარეულოს სამკვიდროსი.

²¹ეს იყო ქალაქები ბენიამინის ძეთა ტომისა – ყველა მათი საგვარეულოსი: იერიხო, ბეთ-ხოგლა, ყემეკ-კეციცი,

²²ბეთ-ყარაბა, ცემარაიმი, ბეთელი,

²³ყავიმი, ფარა, ყოფრა,

²⁴ქეფარ-ყამონი, ყოფნი, გებაყი – 12 ქალაქი მათი დაბებითურთ;

²⁵გიბეონი, რამა, ბეეროთი,

²⁶მიცფე, ქეფირა, მოცა,

²⁷რეკემი, ირფეელი, თარალა,

²⁸ცელაყი, ელეფი, იებუსი ანუ იერუსალიმი, გიბეყა, კირიათ-იეყარიმი – სულ 14 ქალაქი თავიანთი დაბებითურთ. ეს იყო სამკვიდრო ბენიამინის ძეთა, ყველა საგვარეულოსი.