Read სბს–2013 იესო ნავეს ძე 20 Bible Online

იესო ნავეს ძე 20 - სბს–2013 bible

იესო ნავეს ძე 20

¹და უთხრა უფალმა იესოს:

²„ელაპარაკე ისრაელის ძეთ და უთხარი: ‘გამოიყავით თავშესაფარი ქალაქები, რაზეც მე გელაპარაკეთ მოსეს პირით,

³რათა გაიქცეს იქ მკვლელი, რომელსაც უნებლიეთ შემოაკვდება კაცი. და გქონდეთ მესისხლისაგან თავშესაფარად.

⁴და ვინც გაიქცევა ერთ-ერთ ასეთ ქალაქში, დადგეს ქალაქის კარიბჭის შესავალთან, და მოუყვეს იმ ქალაქის უხუცესთ, რაც მოხდა. ის უნდა შეუშვან ქალაქში და მისცენ საცხოვრებელი ადგილი.

⁵და თუ დაედევნება მას მესისხლე, ხელში არ ჩაუგდონ მას მკვლელი, რადგან უნებლიეთ შემოაკვდა მას თავისი მოძმე და არ ჰქონიათ მათ ადრე მტრობა.

⁶და იცხოვროს მკვლელმა ამ ქალაქში მანამ, ვიდრე არ წარსდგება თემის სამსჯავროს წინაშე განსაკითხავად, ანდა ვიდრე არ მოკვდება მღვდელმთავარი, რომლის დროსაც ეს ამბავი მოხდა. მხოლოდ ამის შემდეგ დაბრუნდება მკვლელი და მივა თავის ქალაქში და თავის სახლში, იმ ქალაქში, საიდანაც ის გაიქცა.’ “

⁷და გამოყვეს თავშესაფარ ქალაქებად: კედეში გალილეაში, ნაფთალის მთაზე, შექემი ეფრემის მთაზე და კირიათ-არბაყი, იგივე ხებრონი, იუდას მთებში;

⁸იორდანეს გაღმა, იერიხოს პირდაპირ აღმოსავლეთით გამოყვეს: ბეცერი უდაბნოში, ვაკობზე – რეუბენის ტომიდან, და რამოთი გალაადში – გადის ტომიდან და გოლანი ბაშანში – მანაშეს ტომიდან.

⁹ეს ქალაქები იყო განკუთვნილი ყველა ისრაელიანისთვის და ყველა მათთან მოსახლე ხიზნისათვის, რათა თავი შეაფაროს იქ ყველა უნებლიე მკვლელმა და არ მოკვდეს მესისხლის ხელით, ვიდრე თემს წარუდგებოდეს.