Read სბს–2013 იესო ნავეს ძე 22 Bible Online

იესო ნავეს ძე 22 - სბს–2013 bible

იესო ნავეს ძე 22

¹მაშინ მოუხმო იესომ რეუბენელებს, გადელებს და მანაშეს ნახევარტომს, და უთხრა მათ:

²„თქვენ ასრულებდით ყველაფერს, რასაც უფლის მსახური მოსე გიბრძანებდათ ხოლმე, მეც ყურს მიგდებდით ყველაფერში, რასაც გიბრძანებდით;

³არ მიგიტოვებიათ თქვენი ძმები ამ მრავალი დღეების მანძილზე დღევანდლამდე, და იცავდით უფლის, თქვენი ღმერთის, ნაბრძანებს.

⁴ახლა კი, როცა დაასვენა უფალმა, თქვენმა ღმერთმა, თქვენი ძმები, როგორც ნათქვამი ჰქონდა მათთვის, შეგიძლიათ დაბრუნდეთ შინ, თქვენს სამფლობელოში, რომელიც მოგცათ უფლის მსახურმა მოსემ, იორდანეს გაღმა.

⁵ოღონდ გულმოდგინედ შეასრულეთ მცნება და რჯული, რომელიც გამცნოთ მოსემ, უფლის მსახურმა, რათა გიყვარდეთ უფალი, თქვენი ღმერთი, და იაროთ ყველა მის გზაზე და დაიცვათ მისი მცნებანი, მიეწებოთ მას და ემსახუროთ მას მთელი თქვენი გულითა და მთელი თქვენი სულით.“

⁶და აკურთხა ისინი იესომ და გაუშვა შინ, და წავიდნენ ისინი თავ-თავიანთი კარვებისაკენ.

⁷და მანაშეს ტომის ნახევარს მისცა მოსემ სამკვიდრო ბაშანში, ხოლო მის მეორე ნახევარს მისცა იესომ სამკვიდრო მათ ძმებთან ერთად იორდანეს გამოღმა, დასავლეთ მხარეს. და როცა გაუშვა ისინი იესომ თავ-თავიანთი კარვებისაკენ აკურთხა ისინი,

⁸და უთხრა მათ: „დიდი ქონებით ბრუნდებით თქვენს კარვებში, და ერთობ დიდძალი პირუტყვით, ვერცხლით, ოქროთი, ბრინჯაოთი, რკინითა და უამრავი სამოსლით. გაუნაწილეთ მტერთაგან წამოღებული ნაალაფარი თქვენს ძმებს.“

⁹და გაბრუნდნენ რეუბენის ძენი, გადის ძენი და მანაშეს ნახევარი ტომი ისრაელიანთაგან შილოდან, ქანაანის ქვეყანაში რომ არის, გალაადის ქვეყნისკენ, მათი სამკვიდრო ქვეყნისკენ, რომელიც დაიმკვიდრეს უფლის ბრძანებით, მოსემ რომ აუწყათ.

¹⁰და როცა მიადგნენ გელილოტს იორდანესთან, ქანაანის ქვეყანაში, იქ, იორდანესთან ააშენეს დიდი სამსხვერპლო რეუბენის, გადის და მანაშეს ნახევარმა ტომმა.

¹¹და გაიგეს ისრაელიანთა დანარჩენმა ტომებმა, რომ რეუბენის ტომმა, გადის ტომმა და მანაშეს ნახევარმა ტომმა სამსხვერპლო ააშენეს ქანაანის საზღვარზე – გელილოტში იორდანეს სანახებში, ისრაელიანთა მხარეს.

¹²მაშინ ისრაელიანთა მთელი თემი შეიკრიბა შილოში, რათა გასულიყო მათ წინააღმდეგ საომრად.

¹³და გაუგზავნეს ისრაელიანებმა რეუბენის ტომს, გადის ტომსა და მანაშეს ნახევარტომს გალაადის მხარეში ფინეხასი, ელეაზარ მღვდლის ძე,

¹⁴გააყოლეს ათი მთავარი, თითო მთავარი თითო საგვარეულოზე ისრაელის შტოდან; საგვარეულოს თითოეული მთავარი ისრაელის ათასეულის უფროსი იყო.

¹⁵და მივიდნენ ისინი რეუბენისა და გადის ტომებთან და მანაშეს ნახევარტომთან გალაადის ქვეყანაში და უთხრეს:

¹⁶ასე ამბობს უფლის მთელი თემი: „ეს რა ღალატი ჩაიდინეთ ისრაელის ღმერთის წინაშე, ზურგი რომ შეაქციეთ დღეს უფალს, და სამსხვერპლო აიშენეთ და აუმხედრდით დღეს უფალს?

¹⁷ნუთუ არ კმაროდა ჩვენთვის ფეღორის დანაშაული, რისგანაც დღემდე ვერ განვწმედილვართ, რის გამოც მომსვრელი სენი იყო უფლის თემში?

¹⁸და თქვენ დღეს აქცევთ ზურგს უფალს! და თუ თქვენ დღეს აუმხედრდებით უფალს, ხვალ განურისხდება იგი ისრაელის მთელ თემს!

¹⁹და თუ უწმიდური გეჩვენებათ თქვენი სამფლობელო ქვეყანა, მაშინ თქვენი უფლის სამფლობელო ქვეყანაში გადადით, სადაც დავანებულია უფლის სავანე, და დამკვიდრდით ჩვენს შორის, უფალს კი ნუ აუმხედრდებით და ნურც ჩვენ აგვიმხედრდებით უფლის, ჩვენი ღმერთის, სამსხვერპლოს გარდა, სხვა სამსხვერპლოს შენებით.

²⁰განა ყაქან ზერახის ძე მარტო არ იყო, ღალატი რომ ჩაიდინა დარისხებულის გამო, მაგრამ რისხვა დაატყდა თავს მთელი ისრაელის თემს? მარტო ის არ მომკვდარა თავისი დანაშაულის გამო!“

²¹და მიუგეს რეუბენის ძეთ, გადის ძეთ და მანაშეს ნახევარტომის ძეთ და უთხრეს ისრაელის ათასისთავებს:

²²„ღმერთების ღმერთმა უფალმა! ღმერთების ღმერთმა უფალმა უწყის და ისრაელმაც უწყოდეს. თუ უფლის წინააღმდეგ ასამხედრებლად და საღალატოდ მოვქცეულიყავით ასე, ამიერიდან ნუღარ დაგვიცავს უფალი!

²³თუ სამსხვერპლო უფლისათვის ზურგის შესაქცევად აგვეშენებინოს, სრულადდასაწველის აღსავლენად, საძღვნოდ თუ სამშვიდობო მსხვერპლთათვის, მაშინ თავად უფალმა იძიოს შური ჩვენზე!

²⁴არა, ჩვენ იგი სხვა მიზეზით ავაშენეთ. ჩვენ ვშიშობდით, რომ მომავალში თქვენს შვილებს არ ეთქვათ ჩვენი შვილებისთვის: ‘რა საერთო გაქვთ თქვენ უფალთან, ისრაელის ღმერთთან?

²⁵საზღვრად იორდანე დადო უფალმა ჩვენსა და თქვენს შორის, რეუბენის ძენო და გადის ძენო, არა გაქვთო თქვენ წილი უფალში!’ – და აუკრძალავდნენ თქვენი ძენი ჩვენს ძეთ უფლის თაყვანისცემას.

²⁶და ვთქვით: ავიშენოთო სამსხვერპლო არა სრულადდასაწველისთვის და არა საკლავისთვის,

²⁷არამედ რომ მოწმე იყოს იგი თქვენსა და ჩვენს შორის და ჩვენს მომავალ თაობებს შორის, რომ ჩვენც უნდა ვემსახუროთ უფალს მის წინაშე ჩვენი სრულადდასაწველებით და საკლავით და ჩვენი სამშვიდობო შესაწირავებით, რათა არ უთხრან ხვალ თქვენმა ძეებმა ჩვენს ძეებს: წილი არა გაქვთო უფალში.

²⁸და ვთქვით: თუ გვეტყვიან ჩვენ და ჩვენს თაობებს ხვალ ასე, ჩვენ ასეთ პასუხს გავცემთ: ‘აჰა, სახე უფლის სამსხვერპლოსი, რომელიც ჩვენმა მამებმა ააშენეს. იგი არაა სრულადდასაწველისთვის და საკლავთათვის არამედ, რათა მოწმე ყოფილიყო ჩვენსა და თქვენს შორის.’

²⁹ღმერთმა დაგვიფაროს, რომ უფალს ავმხედრებოდით და ზურგი შეგვექცია მისთვის და აგვეშენებინა სხვა სამსხვერპლო სრულადდასაწველისთვის, პურეულის ძღვნისათვის და საკლავისათვის უფლის, ჩვენი ღმერთის, სამსხვერპლოს გარდა, რომელიც მისი სავანის წინაა.“

³⁰და გაიგონეს ფინეხას მღვდელმა, თემის მთავრებმა და ისრაელის ათასეულთა მეთაურებმა, მას რომ ახლდნენ, სიტყვები რეუბენის ძეთ, გადის ძეთ და მანაშეს ძეთ რომ თქვეს, და მოიწონეს.

³¹და უთხრა მღვდელმა ფინეხას, ელეაზარის ძემ რეუბენის ძეთ, გადის ძეთა და მანაშეს ძეთ: „დღეს შევიტყეთ, რომ ჩვენს შორისაა უფალი, ღალატი არ ჩაგიდენიათ უფლის წინაშე, და თქვენ იხსენით ისრაელის ძენი უფლის ხელიდან.“

³²და დაბრუნდნენ მღვდელი ფინეხას ელეაზარის ძე და მთავარნი, რეუბენის ძეთაგან და გადის ძეთაგან – გალაადის ქვეყნიდან ქანაანის ქვეყანაში, ისრაელიანებთან, და მოუტანეს მათ ამბავი.

³³და მოიწონეს ეს ამბავი ისრაელიანთ, და აკურთხეს ღმერთი და აღარ უფიქრიათ რეუბენისა და გადის ტომებზე გალაშქრება.

³⁴და უწოდეს რეუბენის ძეთ და გადის ძეთ იმ სამსხვერპლოს სახელი. თქვეს: „მოწმეა იგი ჩვენს შორის, რომ ჩვენი ღმერთი არის უფალი.“