Read სბს–2013 იესო ნავეს ძე 23 Bible Online

იესო ნავეს ძე 23 - სბს–2013 bible

იესო ნავეს ძე 23

¹მრავალმა ხანმა განვლო მას შემდეგ, რაც უფალმა მოასვენა ისრაელი ყველა მისი გარსმორტყმული მტრისაგან, და მოხუცდა იესო და დღეებით დაიღალა.

²მოუხმო იესომ მთელ ისრაელს, მის უხუცესებს, მის მთავრებს, მის მსაჯულებს, მის მოხელეებს და უთხრა მათ: „მე დავბერდი და დავიღალე დღეებით.

³თქვენ ნანახი გაქვთ ყველაფერი, რაც უყო უფალმა, თქვენმა ღმერთმა, მთელ ამ ხალხს თქვენს წინაშე, რადგან უფალი, თქვენი ღმერთი, თავად იბრძოდა თქვენთვის.

⁴ნახეთ, წილისყრით ვარგუნე თქვენს ტომებს ჯერ კიდევ აქ დარჩენილი ხალხების მიწები სამკვიდროდ, იორდანედან დაწყებული დიდ ზღვამდე მზის დასავლამდე, როგორც იმ ხალხთა მიწები, რომლებიც მე გავანადგურე.

⁵და უფალი, თქვენი ღმერთი, თავად აყრის ამ ხალხებს – ის წაართმევს მათ მიწებს და თქვენ მოგცემთ, და თქვენ დაიმკვიდრებთ ამ ქვეყანას, როგორც აღგითქვათ უფალმა, თქვენმა ღმერთმა.

⁶თქვენ კი მტკიცედ უნდა დაიცვათ და შეასრულოთ ყველაფერი, რაც ჩაწერილია მოსეს რჯულის წიგნში, ერთი ნაბიჯითაც არ უნდა გადაუხვიოთ მისგან არც მარჯვნივ და არც მარცხნივ,

⁷რათა არ აღერიოთ იმ ხალხებს, თქვენს შორის რომ დარჩნენ, მათი ღმერთების სახელს ნუ ახსენებთ, ნურც დაიფიცავთ მათ, ნურც ემსახურებით და ნურც თაყვანს სცემთ.

⁸არამედ მიეწებეთ უფალს, თქვენს ღმერთს, როგორც დღემდე იქცეოდით.

⁹უფალმა აჰყარა თქვენი პირისაგან დიდი და ძლიერი ხალხები და დღემდე წინ ვერავინ აღგიდგათ.

¹⁰ერთი თქვენიანი ათასს განდევნის, რადგან უფალი, თქვენი ღმერთი, იბრძვის თქვენთვის, როგორც შეგპირდათ.

¹¹მაშ გიყვარდეთ უფალი, თქვენი ღმერთი.

¹²ხოლო თუ თქვენ მიიქცევით და მიეწებებით ამ დანარჩენ ხალხს, თქვენთან რომ დარჩნენ, და დაუმოყვრდებით მათ, და მიხვალთ თქვენ მათთან და ისინი – თქვენთან,

¹³იცოდეთ, რომ უფალი, თქვენი ღმერთი, აღარ აჰყრის ამ ხალხებს თქვენი პირისაგან, და იქნებიან ისინი თქვენთვის მახე და ხაფანგი, და მათრახი თქვენი ზურგისთვის, და ეკალი თქვენი თვალისთვის, ვიდრე არ გადაშენდებით ამ კეთილი მიწიდან, რომელიც მოგცათ უფალმა, თქვენმა ღმერთმა.

¹⁴აჰა, მე მალე გავუდგები იმ გზას, რომელიც ყველას მოელის. და თქვენ მთელი თქვენი გულითა და მთელი თქვენი სულით შეიგნეთ, რომ არც ერთი სიტყვა არ გაცუდებულა ყველა იმ სასიკეთო სიტყვებიდან, რაც თქვენზე უთქვამს უფალს, თქვენს ღმერთს. ყოველივე აგიხდათ თქვენ და არ გაცუდებულა მათგან არც ერთი სიტყვა.

¹⁵და როგორც აგიხდათ ყველა სასიკეთო სიტყვა, რაც თქვენთვის ჰქონდა ნათქვამი უფალს, თქვენს ღმერთს, ასევე მოგივლენთ უფალი ყველა ბოროტ სიტყვას, ვიდრე არ მოგსპობთ ამ კეთილი მიწიდან, რომელიც მოგცათ უფალმა, თქვენმა ღმერთმა,

¹⁶როგორც კი გადახვალთ უფლის, თქვენი ღმერთის, აღთქმას, თქვენ რომ აღგითქვათ, და წახვალთ და ემსახურებით სხვა ღმერთებს და თაყვანს სცემთ მათ, მაშინ აღეგზნება რისხვა უფლისა თქვენზე და უმალ გადაშენდებით ამ კეთილი ქვეყნიდან, რომელიც თქვენთვის მოუცია.“