Read სბს–2013 იესო ნავეს ძე 4 Bible Online

იესო ნავეს ძე 4 - სბს–2013 bible

იესო ნავეს ძე 4

¹და როცა დაასრულა მთელმა ხალხმა იორდანეს გადალახვა, უფალმა უბრძანა იესოს:

²„ამოირჩიე ხალხიდან 12 კაცი, თითო კაცი თითო ტომიდან,

³და უბრძანე მათ ასე: ‘აიღეთ აქედან, შუაგული იორდანეს ამ ადგილიდან, სადაც მტკიცედ უდგათ მღვდლებს ფეხი, 12 ქვა, თან წაიღეთ და დააწყვეთ სათევარში, სადაც ეს ღამე უნდა გაათიოთ.’ “

⁴და მოუხმო იესომ თორმეტ კაცს, რომლებიც განაწესა ისრაელიანთაგან, თითოს თითო ტომიდან

⁵და უთხრა: „გაიარეთ უფლის, თქვენი ღმერთის, კიდობნის წინ, იორდანეს შუაგულამდე, და მხარზე შეიდოს თითოეულმა თქვენგანმა თითო ქვა, ისრაელიანთა ტომების რიცხვის მიხედვით,

⁶რათა ეს იყოს ნიშანი თქვენს შორის. როცა გკითხავენ თქვენი ძენი: რის ნიშნადა გაქვთო ეს ქვები?

⁷უთხარით: იმის ნიშნად-თქო, რომ შედგა იორდანეს წყალი უფლის აღთქმის კიდობნის წინაშე, როცა ის მასზე გადაჰქონდათ. და გექნებათ ეს ქვები თქვენ, ისრაელიანთ, სამახსოვროდ უკუნისამდე.“

⁸და ისე მოიქცნენ ისრაელიანები, როგორც იესომ უბრძანა მათ: აიღეს შუაგული იორდანეს ფსკერიდან ისრაელიანთა ტომების რიცხვის მიხედვით 12 ქვა, როგორც უფალმა უთხრა იესოს, გადაიტანეს თავიანთ სათევარში და იქ დააწყვეს.

⁹(და 12 ქვა აღმართა იესომ შუა იორდანეში, იმ ადგილას, სადაც ფეხი ედგათ მღვდლებს, აღთქმის კიდობნის მტარებლებს, და იქ აწყვია ისინი დღემდე.)

¹⁰კიდობნის მტვირთველი მღვდლები იდგნენ შუაგულ იორდანეში, ვიდრე არ შესრულდა ყველა ის სიტყვა, რომელიც უფალმა უბრძანა იესოს ხალხისათვის სათქმელად, როგორც უანდერძა მოსემ იესოს; და ამასობაში ხალხი გამალებული გადადიოდა მეორე ნაპირზე.

¹¹როცა გადავიდა მთელი ხალხი, გადავიდნენ უფლის კიდობანი და მღვდლები ხალხის თვალწინ.

¹²და გადალახეს რეუბენის ძეთ და გადის ძეთ, და მანაშეს ნახევარმა ტომმა – იარაღასხმულებმა, ისრაელის ძეთა წინ, როგორც ნათქვამი ჰქონდა მათთვის მოსეს.

¹³40 ათასამდე იარაღასხმული კაცი გავიდა გაღმა უფლის წინაშე იერიხოს ველზე საბრძოლველად.

¹⁴იმ დღეს განადიდა უფალმა იესო ისრაელიანთა თვალში. და ეშინოდათ მისი, როგორც ეშინოდათ მოსესი, მთელი მისი სიცოცხლის მანძილზე.

¹⁵და ასე უთხრა უფალმა იესოს:

¹⁶„უბრძანე მღვდლებს, აღთქმის კიდობნის მტვირთელებს, ამოვიდნენ იორდანედან.“

¹⁷და უბრძანა იესომ მღვდლებს: „ამოდით იორდანედან!“

¹⁸და როგორც კი ამოვიდნენ უფლის აღთქმის კიდობნის მტვირთველი მღვდლები, შუაგული იორდანედან, და როგორც კი ფეხი დადგეს მიწაზე, დაბრუნდა იორდანეს წყალი თავის ადგილას და დინება იწყო როგორც წინათ, და თავის სანაპიროთა დატბორვა.

¹⁹და ამოვიდა ხალხი იორდანედან პირველი თვის მეათე დღეს, და დაბანაკდა გილგალში, ქალაქ იერიხოს აღმოსავლეთით.

²⁰და 12 ქვა, რომლებიც წამოიღეს იორდანედან, იესომ გილგალში აღმართა.

²¹და უთხრა ისრაელიანთ: „როცა მომავალში შეგეკითხებიან თქვენი ძენი: ეს რა ქვები არისო?

²²მოუყევით, როგორ გადმოიარეს ისრაელიანებმა იორდანე მშრალზე.

²³რადგან დააშრო უფალმა, თქვენმა ღმერთმა, იორდანეს წყლები თქვენს წინაშე, რათა გადმოგევლოთ იგი, როგორც გააკეთა უფალმა, თქვენმა ღმერთმა, მეწამულ ზღვაზე, რომელიც დააშრო ჩვენს წინაშე, რათა გადმოგვევლო ჩვენ.

²⁴რათა ქვეყნიერების ყველა ხალხებს სცოდნოდათ, რაოდენ ძლიერია უფლის მარჯვენა, და რათა მარად გეშინოდეთ თქვენი უფალი ღმერთისა.“