Read სბს–2013 იესო ნავეს ძე 6 Bible Online

იესო ნავეს ძე 6 - სბს–2013 bible

იესო ნავეს ძე 6

¹ჩაიკეტა იერიხოს კარიბჭე და ჩარაზული იყო ისრაელის ძეთა შიშის გამო. არავინ გამოდიოდა იქიდან და არც ვინმე შედიოდა.

²და უთხრა უფალმა იესოს: „აჰა, შენ გაძლევ იერიხოს, მის მეფეს და მის მამაც მეომრებს.

³დაე თქვენმა მხედრობამ გარს შემოუაროს ქალაქს დღეში ერთხელ, ექვსი დღის მანძილზე.

⁴და შვიდმა მღვდელმა ატაროს ვერძის რქის შვიდი ბუკი კიდობნის წინ. მეშვიდე დღეს კი შვიდგზის შემოუარეთ ქალაქს, მღვდლებმა კი შვიდგზის დასცენ ბუკი.

⁵და როცა დასცემენ ვერძის რქის ბუკს და გაიგონებთ ბუკის ხმას, მთელმა ხალხმა დასცეს დიდი ყიჟინა და ადგილზევე ჩაიქცევა ქალაქის კედლები, და ზედ ავა ხალხი თითოეული თავისი მხრიდან.“

⁶და მოუხმო იესო ნავეს ძემ, მღვდლებს და უთხრა მათ: „წაიღეთ აღთქმის კიდობანი. შვიდმა მღვდელმა კი ატაროს ვერძის რქის შვიდი ბუკი უფლის კიდობნის წინ.“

⁷და უთხრა ხალხს: „წადით და გარს შემოუარეთ ქალაქს და შეჭურვილებმა იარონ უფლის კიდობნის წინ.“

⁸და როგორც კი იესომ ხალხს ეს უთხრა, ბუკსა სცა შვიდმა მღვდელმა, რომელთაც უფლის წინ მიჰქონდათ ვერძის რქის შვიდი ბუკი, უფლის აღთქმის კიდობანი უკან მიჰყვებოდა მათ.

⁹შეჭურვილი მებრძოლნი წინ მიუძღოდნენ მღვდლებს, რომლებიც ბუკსა სცემდნენ, და უკანანი კიდობანს უკან მიჰყვებოდნენ და წამდაუწუმ ბუკსა სცემდნენ.

¹⁰და ხალხს უბრძანა იესომ: „ნუ იყიჟინებთ და ნურავის გააგონებთ თქვენს ხმას, და სიტყვა არ დაგცდეთ ბაგეთაგან იმ დღემდე, ვიდრე მე არ გეტყვით: დაეცით-მეთქი ყიჟინა! და თქვენც მაშინ დასცემთ ყიჟინას.“

¹¹და გარს შემოუარა უფლის კიდობანმა ქალაქს, დაარტყა ერთი წრე; და მივიდნენ ბანაკში, და გაათიეს ბანაკში.

¹²და ადგა იესო დილაადრიანად, და წაიღეს მღვდლებმა კიდობანი უფლისა.

¹³და შვიდი მღვდელი, რომელთაც მიჰქონდათ ვერძის რქის შვიდი ბუკი, უფლის კიდობნის წინ მიდიოდა, და მიმავალი ბუკსა სცემდა; შეჭურვილი მეომრები წინ მიუძღოდნენ მათ, ხოლო უკანანი უკან მიჰყვებოდნენ უფლის კიდობანს და გზადაგზა ბუკსა სცემდნენ.

¹⁴და გარს შემოუარეს ქალაქს მეორე დღესაც ერთგზის, და დაბრუნდნენ ბანაკში. და ასე აკეთებდნენ ექვსი დღის მანძილზე.

¹⁵ხოლო მეშვიდე დღეს ადრე ადგნენ, განთიადისას, და გარსშემოუარეს ქალაქს იმავე წესით შვიდგზის.

¹⁶და იყო მეშვიდე ჯერზე, როცა ბუკი დასცეს მღვდლებმა, მაშინ უთხრა იესომ ხალხს: „დაეცით ყიჟინა, რადგან უფალმა ხელში ჩაგიგდოთ ეს ქალაქი!

¹⁷უფლისათვის დარისხებული უნდა იყოს ეს ქალაქი და ყველაფერი, რაც მასშია. მხოლოდ მეძავი რახაბი და ყველა, ვინც მასთანაა სახლში, უნდა დარჩნენ ცოცხალი, რადგან მან დამალა ჩვენი გაგზავნილი მსტოვრები.

¹⁸გაფრთხილდით, დარისხებული არაფერი აიღოთ! თორემ მთელ ისრაელიანთა ბანაკს მოაწევს დარისხება – უბედურებას დაატეხთ ყველას.

¹⁹მთელი ვერცხლი და ოქრო, ბრინჯაოსა და რკინის ჭურჭელი წმიდაა უფლისათვის, უფლის საუნჯეში უნდა შევიდეს ის.“

²⁰ხალხი ახმაურდა და ბუკებსაც ჩაჰბერეს. და როგორც კი ხალხმა საყვირის ხმა გაიგონა, დიდი ყიჟინა ატეხა და ადგილზევე ჩამოიქცა კედლები; და ავიდა ხალხი ქალაქში, თითოეული თავისი მხრიდან, და აიღეს ქალაქი.

²¹და დაარისხეს ყველაფერი, რაც ქალაქში იყო: კაცი და ქალი, ჭაბუკი და ხნიერი, ხარი, ცხვარი, თხა და სახედარი.

²²და უთხრა იესომ იმ ორ ჭაბუკს, ქვეყნის დასაზვერად რომ იყვნენ წასული: „მიდით იმ მეძავი ქალის სახლში და გამოიყვანეთ იქიდან ის და ყველა, ვინც მასთანაა, როგორც შეჰფიცეთ მას.“

²³და მივიდნენ ის ჭაბუკები, ქალაქის დასაზვერად რომ იყვნენ, და გამოიყვანეს რახაბი, მამამისი, დედამისი, მისი ძმა და მთელი მისი ოჯახი, ყველა, ვინც მას ჰყავდა, და დატოვეს ისინი ისრაელის ბანაკს გარეთ.

²⁴და ცეცხლს მისცეს ქალაქი და ყველაფერი, რაც შიგ იყო. მხოლოდ ვერცხლი და ოქრო, ბრინჯაოსა და რკინის ჭურჭელი შემატეს უფლის ტაძრის საუნჯეს.

²⁵და მეძავი რახაბი და მამამისის სახლი და ყველა, ვინც მას ჰყავდა, ცოცხალი დატოვა იესომ, და ის დარჩა ისრაელში ამ დღემდე, რადგან დამალა მსტოვრები, რომლებიც იესომ გაგზავნა იერიხოს დასაზვერად.

²⁶მაშინ დაიფიცა იესომ, ასე: „წყეულიმც იყოს უფლის წინაშე ის კაცი, ვინც აღადგენს და ააგებს ამ ქალაქს – იერიხოს! თავის პირმშოზე დააფუძნოს მისი საძირკველი, და თავის უმცროსზე დადგას მისი კარიბჭე.“

²⁷და იყო უფალი იესოსთან, და განითქვა მისი სახელი მთელს იმ ქვეყანაში.