Read სბს–2013 იესო ნავეს ძე 8 Bible Online

იესო ნავეს ძე 8 - სბს–2013 bible

იესო ნავეს ძე 8

¹უთხრა უფალმა იესოს: „ნუ შეშინდები და ნუ შედრკები. თან წაიყვანე მთელი მეომარი ხალხი ღაიზე სალაშქროდ. ხელში ჩაგიგდებ ღაის მეფეს და მის ხალხს, მის ქალაქსა და მის ქვეყანას.

²და მოექეცი ღაის და მის მეფეს, როგორც მოექეცი იერიხოს და მის მეფეს, ნადავლი და პირუტყვი კი თქვენ გაინაწილეთ; საფარი მოაწყე ღაის გვერდით, ქალაქის მეორე მხარეს.“

³და ადგა იესო და მთელი მებრძოლი ხალხი ღაიზე გასალაშქრებელად. და ამოირჩია იესომ 30 ათასი მამაცი მეომარი, გაგზავნა ისინი ღამით

⁴და ასეთი ბრძანება მისცა მათ: „იცოდეთ, საფარში უნდა ისხდეთ ქალაქის მეორე მხარეს და ძალიან არ უნდა მოშორდეთ მას. მზად ყოფნაში იყავით ყველა.

⁵და როცა მე ქალაქს მივადგები, ჩემთან მყოფი მთელი ხალხით, გამოვლენ ისინი ჩვენს დასახვედრად, როგორც მანამდე იყო, ჩვენ გავექცევით მათ.

⁶ისინი დაგვედევნებიან უკან, რაკი იფიქრებენ, რომ უწინდელივით გაგვირბიანო. ჩვენ კი მანამ გავექცევით, ვიდრე ქალაქს არ მოვწყვეტთ მათ.

⁷მაშინ ადგებით თქვენი საფარიდან და დაეუფლებით ქალაქს. და ხელში ჩაგიგდებთ მას უფალი, თქვენი ღმერთი.

⁸და როცა აიღებთ ქალაქს, ცეცხლს მიეცით ის; მოიქეცით უფლის სიტყვისამებრ. აჰა, მე გიბრძანებთ თქვენ.“

⁹და გაგზავნა ისინი იესომ, და წავიდნენ საფარში, და ჩასხდნენ ბეთელსა და ღაის შუა, ღაის დასავლეთით. და გაათია იესომ ის ღამე ხალხში.

¹⁰და ადგა იესო დილაადრიანად და დაათვალიერა ხალხი, და ისრაელის უხუცესებთან ერთად ხალხს ღაისკენ წაუძღვა.

¹¹და მთელი მეომრები, ვინც მასთან იყვნენ, ავიდნენ, მიუახლოვდნენ და გაუსწორდნენ ქალაქს, და დაიბანაკეს ღაის ჩრდილოეთით. ღარტაფი იყო ღაისა და მათ შორის.

¹²და გამოირჩია იესომ 5 ათასამდე კაცი, და ჩაასაფრა ბეთელსა და ღაის შუა, ქალაქის დასავლეთით.

¹³და მოიცვა ხალხმა მთელი ბანაკი, ქალაქის ჩრდილოეთით რომ იყო; ჩასაფრებული რაზმი კი ქალაქის დასავლეთით იყო. და გავიდა იესო იმ ღამეს შუაგულ ველზე.

¹⁴როგორც კი დაინახა ეს ღაის მეფემ, ქალაქის მამაკაცებმა ისწრაფეს, ადგნენ ადრიანად და გავიდნენ ისრაელის წინააღმდეგ საომრად, ის და მთელი მისი ხალხი, დათქმულ დროს ყარაბას წინ. მან არ იცოდა, თუ მტერი იყო ჩასაფრებული ქალაქის უკან.

¹⁵და იესო და მთელი ისრაელი, თითქოს დამარცხდნენო მათ წინაშე, გაიქცნენ უდაბნოს გზით.

¹⁶და დასცა ყიჟინა მთელმა ხალხმა, რომელიც ღაიში იყო, რათა დადევნებოდა მათ, და გამოედევნენ იესოს და მოსწყდნენ ქალაქს.

¹⁷და კაცი არ დარჩენილა ღაიში და ბეთელში, ისრაელს რომ არ გამოჰკიდებოდა უკან. ღია დატოვეს ქალაქი და ისრაელიანთ დაედევნენ უკან.

¹⁸და უთხრა უფალმა იესოს: „ღაის მოუღერე შუბი, ხელში რომ გიჭირავს, რადგან მას ხელში ჩაგიგდებ.“ და მოუღერა იესომ ქალაქს შუბი, ხელში რომ ეჭირა.

¹⁹და ჩასაფრებულები უმალ წამოიშალნენ თავიანთი ადგილებიდან და გაიქცნენ, როდესაც იესომ ხელი მოუღერა ქალაქს, შიგ შეიჭრნენ და აიღეს იგი; და აღარ დაუყოვნებიათ – ცეცხლს მისცეს ქალაქი.

²⁰და უკან მოიხედეს ღაის მამაკაცებმა და დაინახეს ქალაქის კვამლი ზეცას რომ სწვდებოდა. და აღარ დარჩათ მათ გასაქცევი ადგილი არც იქით, არც აქეთ. და უდაბნოსაკენ გაქცეული ხალხი შემოუბრუნდა მდევრებს.

²¹და დაინახა იესომ და მთელმა ისრაელმა, რომ ჩასაფრებულებმა აიღეს ქალაქი, და ქალაქს კვამლი ავარდა, მობრუნდნენ და მოსრეს ღაის მცხოვრებნი.

²²და ისინი გამოვიდნენ ქალაქიდან მათ დასახვედრად, და ისრაელიანთა შორის მოექცნენ ღაის მკვიდრნი, აქედანაც და იქიდანაც. და მუსრეს ისინი ისრაელიანებმა, და არ გაუშვეს მათ გადარჩენილი და ლტოლვილი.

²³და შეიპყრეს ღაის მეფე ცოცხლად და მიჰგვარეს იგი იესოს.

²⁴და როცა მორჩა ისრაელი ღაის ყველა მკვიდრის დახოცვას ველზე, უდაბნოში, სადამდეც გაიტყუეს ისინი, და ყველანი დაეცნენ მახვილის პირით, შემობრუნდა მთელი ისრაელი ღაისაკენ და შემუსრეს ისიც მახვილით.

²⁵და იმ დღეს სულ 12 ათასი კაცი და ქალი დაეცა ღაის მცხოვრებთაგან.

²⁶და იესოს არ ჩამოუშვია ხელი, რომლითაც შუბი მოუღერა, ვიდრე არ მოსპო ღაის ყველა მცხოვრები.

²⁷და იმ ქალაქისა მხოლოდ პირუტყვი და ნადავლი დაიტაცა თავისთვის ისრაელმა, უფლის სიტყვისამებრ, რომელიც მან უბრძანა იესოს.

²⁸და გადაწვა იესომ ქალაქი ღაი, საუკუნო ნანგრევებად და უკაცრიელ ადგილად აქცია, დღევანდლამდე.

²⁹ღაის მეფე კი ჩამოჰკიდა ხეზე, საღამომდე. და მზის ჩასვლისას ბრძანა იესომ, და ხიდან ჩამოხსნეს მისი გვამი, ქალაქის კარიბჭესთან დააგდეს და ზედ ქვის დიდი ყორე აღმართეს რომელიც შემორჩენილია დღემდე.

³⁰მაშინ აუგო იესომ სამსხვერპლო უფალს, ისრაელის ღმერთს, ღებალის მთაზე,

³¹როგორც უბრძანა მოსემ, უფლის მსახურმა, ისრაელიანებს. ისე ააგო, როგორც ეს სწერია მოსეს რჯულის წიგნში – „სამსხვერპლო მთლიანი ლოდებისგან, რომლებისთვისაც რკინა არ მოუქნევიათ.“ და აღუვლინეს მასზე სრულადდასაწველები უფალს, და შესწირეს სამშვიდობო მსხვერპლი.

³²და გადააწერა იმ ქვებს მოსეს რჯული, რომელიც დაწერილი ჰქონდა მას ისრაელის ძეთა წინაშე.

³³და მთელი ისრაელი, და მისი უხუცესნი, და ზედამხედველნი, და მისი მსაჯულნი იდგნენ კიდობნის აქეთ-იქით, უფლის აღთქმის კიდობნის მტვირთველი ლევიანი მღვდლების პირდაპირ, როგორც ხიზანი, ისე მკვიდრი. მათი ნახევარი იდგა გერიზიმის მთის პირდაპირ, და მეორე მისი ნახევარი – ღებალის მთის პირდაპირ, როგორც ადრევე უბრძანა მოსემ, უფლის მსახურმა, ისრაელის ერის საკურთხებლად.

³⁴და შემდეგ წაიკითხა იესომ რჯულის ყველა სიტყვა, კურთხევა და წყევლა, ყოველივე, რჯულის წიგნში ჩაწერილის მიხედვით.

³⁵არ ყოფილა სიტყვა მოსეს ნაბრძანებიდან, იესოს რომ არ წაეკითხა მთელი კრებულის წინაშე, დედაკაცების და პატარებისა და ხიზნების წინაშე, რომელნიც მათ შორის იყვნენ მოსულნი.