Read სბს–2013 იესო ნავეს ძე 9 Bible Online

იესო ნავეს ძე 9 - სბს–2013 bible

იესო ნავეს ძე 9

¹ეს რომ გაიგეს მეფეებმა, რომლებიც იორდანეს გაღმა იყვნენ, მთასა და ბარში, დიდი ზღვის სანაპიროზე, ლიბანის ახლოს, ხეთელებმა, ამორეველებმა, ქანაანელებმა, ფერიზელებმა, ხიველებმა და იებუსელებმა,

²თავი ერთად მოიყარეს, რომ შებრძოლებოდნენ იესოსა და ისრაელს ერთსულოვნად.

³როდესაც გაიგეს გიბეონის მკვიდრებმა, რა უყო იესომ იერიხოსა და ღაის,

⁴ცბიერად მოიქცნენ: წავიდნენ და დაიმზადეს საგზალი, და აჰკიდეს ძველი ტომრები და ღვინის ძველი, დახეთქილი და გადაკერებული ტიკები, თავიანთ სახედრებს.

⁵ფეხზეც გაცვეთილი და დაკერებული ფეხსამოსი ეცვათ და ტანზეც გაცვეთილი სამოსელი ემოსათ. გამხმარი და დაობებული პური იყო მთელი მათი საგზალი.

⁶და მივიდნენ იესოსთან ბანაკში, გილგალში, და უთხრეს მას და მთელ ისრაელს: „შორი ქვეყნიდან მოვედით ჩვენ, და ახლა აღთქმა დაგვიდეთ.“

⁷და უთხრეს ისრაელიანებმა ხიველებს: „როგორ უნდა დაგიდოთ აღთქმა? ერთიც ვნახოთ და, შენ ჩვენს შორისა მკვიდრობ?“

⁸და უთხრეს იესოს: „შენი მსახურები ვართ.“ და ჰკითხა მათ იესომ: „ვინა ხართ და საიდან მოსულხართ?“

⁹მათ უთხრეს: „ძალიან შორი ქვეყნიდან მოვედით შენი მსახურნი, უფლის, შენი ღმერთის, სახელით, რადგან გვსმენია მისი ამბავი და ყველაფერი, რაც ეგვიპტეში მოიმოქმედა,

¹⁰და ყველაფერი, რაც უყო ორ ამორეველ მეფეს, რომელნიც იყვნენ იორდანეს გაღმა: სიხონს – ხეშბონის მეფეს, და ყოგს – ბაშანის მეფეს, რომელიც ყაშთაროთში მმართველობდა.

¹¹და გვითხრეს ჩვენმა უხუცესებმა და ჩვენი ქვეყნის ყველა მკვიდრმა ასე: ხელში აიღეთო საგზალი, წადით მათ შესახვედრად და უთხარით: ‘ჩვენ თქვენი მსახურები ვართ და ახლა დაგვიდეთ აღთქმა.’

¹²ეს ჩვენი პური, ჯერ კიდევ თბილი იყო, როცა საგზლად წამოვიღეთ ჩვენი სახლებიდან იმ დღეს, თქვენთან წამოსასვლელად რომ გამოვედით, და ახლა ის გამხმარია და დაობებული.

¹³და ეს ღვინის ტიკები, რომ ავავსეთ, ახლები იყო, და აჰა, დასკდა. და ჩვენი სამოსელი და ფეხსაცმელი გაცვდა ძალიან შორი გზის გამო.“

¹⁴და აიღეს ისრაელიანებმა მათი საგზალი ისე, რომ უფლისთვის არც კი უკითხავთ.

¹⁵და სამშვიდობო ზავი შეკრა მათთან იესომ და პირობა დაუდო, რომ ცოცხლებს დატოვებდა. და შეჰფიცეს მათ თემის მთავრებმაც.

¹⁶სამი დღე რომ გავიდა კავშირის შეკვრიდან, გაიგეს, რომ ისინი მათი მეზობლები ყოფილან და მათ ახლოს უცხოვრიათ.

¹⁷და აიყარნენ ისრაელის ძენი, და მესამე დღეს მივიდნენ მათ ქალაქებში. მათი ქალაქები იყო: გიბეონი, ქეფირა, ბეეროთი და კირიათ-იეყარიმი.

¹⁸და არ მოსრეს ისინი ისრაელის ძეთ, რადგან თემის მთავრებმა უფალი, ისრაელის ღმერთი, დაუფიცეს. და დრტვინავდა მთელი თემი მთავრებზე.

¹⁹და უთხრეს მთავრებმა მთელ თემს: „ჩვენ მათ უფალი, ისრაელის ღმერთი, დავუფიცეთ და ამიტომ მათი ხელის ხლება არ შეგვიძლია.

²⁰ასე მოვექცევით მათ: ცოცხლებს დავტოვებთ, რომ არ დაგვატყდეს რისხვა იმ ფიცის გამო, რითაც შევფიცეთ მათ.“

²¹და უთხრეს მათ მთავრებმა: „იცოცხლონ!“ იმ დღიდან შეშის მჭრელებად და წყლის მხაპავებად ჰყავთ ისინი მთელ თემს, როგორც მთავრებმა გადაუწყვიტეს მათ.

²²და მოუხმო მათ იესომ, და უთხრა: „რატომ მოგვატყუეთ, რომ გვითხარით: ძალიან შორსა ვბინადრობთო თქვენგან, და ჩვენი მეზობლები კი ყოფილხართ?

²³წყეულიმც იყავით ამიერიდან! ნუ გამოილევა თქვენგან მსახური, შეშის მჭრელები და წყლის მხაპავი ჩემი ღმერთის ტაძრისთვის.“

²⁴და მიუგეს იესოს და უთხრეს: „რადგან გაგებით გაგებული ჰქონდათ შენს მსახურთ, რაც უბრძანა უფალმა, შენმა ღმერთმა, მოსეს, თავის მსახურს, რათა მოეცა თქვენთვის მთელი ეს ქვეყანა და გაენადგურებინა ყოველი მკვიდრი ამ ქვეყნისა თქვენს წინაშე, შეგვეშინდა ჩვენი სიცოცხლის გამო თქვენს წინაშე და ეს საქმე მოვიმოქმედეთ.

²⁵და აჰა, ახლა შენს ხელთა ვართ. როგორც გიჯობდეს და სამართლიანი იყოს შენს თვალში, ჩვენს მიმართ მოქცევა, ისე მოგვექეცი.“

²⁶და ასე მოექცა იგი მათ: იხსნა ისინი ისრაელის ძეთა ხელიდან, და არ დახოცეს ისინი.

²⁷და დააყენა ისინი იესომ იმ დღეს შეშის მჭრელებად და წყლის მხაპავებად თემისათვის და უფლის სამსხვერპლოსათვის დღევანდლამდე, იმ ადგილას, რომელსაც უფალი ამოირჩევდა.