Read სბს–2013 1 პეტრეს წერილი 1 Bible Online

1 პეტრეს წერილი 1 - სბს–2013 bible

1 პეტრეს წერილი 1

¹პეტრე, იესო ქრისტეს მოციქული, რჩეულ ხიზნებს პონტოს, გალატიის, კაპადოკიის, ასიისა და ბითვინიის განთესილობაში,

²რჩეულებს მამა ღმერთის განგებით, სულის მიერ განწმედით – იესო ქრისტესთვის მორჩილებისა და მისი სისხლის პკურებისათვის – მადლი და მშვიდობა გიმრავლოთ.

³კურთხეულია ღმერთი და ჩვენი უფლის, იესო ქრისტეს მამა, რომელმაც თავისი მრავალი წყალობით ხელახლა გვშვა ცოცხალი იმედისათვის იესო ქრისტეს მკვდრეთით აღდგომით,

⁴უხრწნელ, შეუბილწავ და უჭკნობ მემკვიდრეობად, რომელიც ცაშია შენახული თქვენი,

⁵ღმერთის ძალაში რწმენით დაცულების ხსნისათვის, რომელიც გამზადებულია უკანასკნელ ჟამს გამოსაცხადებლად.

⁶ამით გაიხარეთ, თუმცა ამჟამად მცირე ხანს უნდა გაწვალდეთ მრავალგვარ განსაცდელში,

⁷რათა გამოჩნდეს თქვენი გამოცდილი რწმენა – უფრო ძვირფასი, ვიდრე ხრწნადი ოქრო, რომელიც ცეცხლში გამოიცდება – ქების, პატივისა და დიდებისათვის იესო ქრისტეს გამოცხადებისას.

⁸ის, ვინც არ გინახავთ – გიყვართ, ვისაც ვერ ხედავთ – გწამთ, და ხარობთ გამოუთქმელი და დიდებული სიხარულით,

⁹რადგან აღწევთ რწმენის მიზანს – სულების ხსნას.

¹⁰ამ ხსნას ეძიებდნენ და იკვლევდნენ წინასწარმეტყველნი, რომლებიც თქვენთვის განკუთვნილ მადლს გიწინასწარმეტყველებდნენ.

¹¹იკვლევდნენ, რომელ და როგორ ჟამზე მიუთითებდა მათში მყოფი ქრისტეს სული, როცა წინასწარ ამოწმებდა ქრისტეს ტანჯვას და შემდგომ დიდებას.

¹²რომელთაც გამოეცხადა, რომ თვით მათ კი არა, თქვენ მოგემსახურებოდათ ის, რაც ახლა გეუწყათ ციდან მოვლინებული წმიდა სულით თქვენს მახარებელთაგან, რის ჩაწვდომასაც ნატრობდნენ ანგელოზები.

¹³ამიტომ მოისარტყლეთ თქვენი გონების წელნი, იფხიზლეთ და სრული იმედი გქონდეთ მადლისა, რომელიც მოგენიჭებათ იესო ქრისტეს გამოცხადებისას.

¹⁴როგორც გამგონე შვილები, ნუ აჰყვებით თქვენი უმეცრების დროინდელ გულისთქმებს,

¹⁵არამედ იყავით წმიდები ყოველ საქციელში, როგორც წმიდაა იგი, ვინც თქვენ მოგიწოდათ.

¹⁶რადგან წერია: „იყავით წმიდები, რადგან წმიდა ვარ მე.“

¹⁷თუ მამას უწოდებთ მას, ვინც მიუკერძოებლად განიკითხავს თითოეულს საქმეთა მიხედვით, მაშინ მოშიშებით გაატარეთ თქვენი ხიზნობის ხანი.

¹⁸რაკი იცით, რომ ხრწნადი ვერცხლით ან ოქროთი კი არა ხართ გამოსყიდულნი მამათაგან მემკვიდრეობით მიღებული ამაო გზიდან,

¹⁹არამედ ქრისტეს ძვირფასი სისხლით, როგორც უბიწო და უმანკო კრავისა,

²⁰რომელიც სამყაროს შექმნამდე იყო წინასწარ განწესებული, მაგრამ უკანასკნელ დროს გამოჩნდა თქვენთვის,

²¹რომელთაც მისი მეშვეობით იწამეთ ღმერთი, რომელმაც მკვდრეთით აღადგინა იგი და მისცა დიდება, რათა გქონდეთ რწმენა და ღმერთის იმედი.

²²რაკი ჭეშმარიტებისადმი დამორჩილებით განიწმიდეთ თქვენი სულები არათვალთმაქცი ძმათმოყვარეობისათვის, სუფთა გულით მტკიცედ შეიყვარეთ ერთმანეთი.

²³როგორც ხელახლად შობილებმა არა ხრწნადი თესლისაგან, არამედ უხრწნელისაგან, ღმერთის ცოცხალი და მარადმყოფი სიტყვის მიერ.

²⁴რადგან ყოველი ხორციელი ბალახივითაა და ყოველი მისი დიდება ბალახის ყვავილივითაა. ბალახი ხმება და ყვავილიც სცვივა.

²⁵ღმერთის სიტყვა კი საუკუნოდ სუფევს. ხოლო ეს ის სიტყვაა, თქვენ რომ გეხარათ.