Read სბს–2013 მსაჯული 2 Bible Online

მსაჯული 2 - სბს–2013 bible

მსაჯული 2

¹და მოვიდა უფლის ანგელოზი გილგალიდან ბოქიმში და თქვა: „ამოგიყვანეთ თქვენ ეგვიპტიდან და მოგიყვანეთ ამ ქვეყანაში, რომელიც თქვენს მამებს ფიცით შევფიცე და ვთქვი: ‘არ დავარღვევ თქვენთან დადებულ ჩემს აღთქმას უკუნისამდე,

²ოღონდ ნუ შეკრავთ კავშირს ამ ქვეყნის მკვიდრებთან და დაანგრიეთ მათი სამსხვერპლოები.’ თქვენ კი არ ისმინეთ ჩემი ხმა. თქვენ კი რა ჩაიდინეთ?!

³და კიდევ ვთქვი: არ განვდევნი-მეთქი მათ თქვენგან, რათა ისინი მახედ გაგიხდნენ, ხოლო მათი ღმერთები – ხაფანგად.“

⁴და როცა უფლის ანგელოზმა ეს სიტყვები უთხრა ისრაელის ძეთ, მთელი ხალხი ხმამაღლა ატირდა.

⁵და მათ იმ ადგილს სახელად ბოქიმი უწოდეს, რაც ნიშნავს მოტირალს, და შესწირეს იქ მსხვერპლი უფალს.

⁶მას შემდეგ, რაც იესომ დაითხოვა ხალხი, წავიდნენ ისრაელის ძენი თავ-თავისი წილხვედრის დასამკვიდრებლად,

⁷და უფალს ემსახურებოდა ხალხი იესოს მთელი სიცოცხლის მანძილზე და უხუცესთა მთელი სიცოცხლის მანძილზე, რომლებიც იესოს შემდეგ ცხოვრობდნენ და რომელთაც ნანახი ჰქონდათ უფლის ყველა დიადი საქმე, რაც მან ისრაელისთვის მოიმოქმედა.

⁸ას ათი წლისა მოკვდა უფლის მსახური იესო ნავეს ძე.

⁹და დამარხეს იგი მის სამკვიდროში, თიმნათ-ხერესში, ეფრემის მთიანეთში რომ არის, გაყაშის მთის ჩრდილოეთით.

¹⁰და როცა ასევე მთელმა იმ თაობამაც თავისი მამების კვალზე გაიარა, და მათ შემდგომ მოვიდა სხვა თაობა, რომელიც არ იცნობდა უფალს და არ იცოდა ის საქმეები, რაც ისრაელისთვის მოიმოქმედა,

¹¹ისრაელიანთ უფლისთვის საძაგელ საქმეებს მიჰყვეს ხელი და ბაყალების მომსახურება იწყეს;

¹²მიატოვეს უფალი, თავიანთი მამების ღმერთი, რომელმაც ეგვიპტის ქვეყნიდან გამოიყვანა ისინი, და გაჰყვნენ სხვა ღმერთებს, მათ ირგვლივ მოსახლე ხალხების ღმერთებს, და თაყვანს სცემდნენ მათ, და არისხებდნენ უფალს;

¹³მიატოვეს უფალი და ემსახურებოდნენ ბაყალსა და ყაშთორეთებს.

¹⁴და აღიგზნო რისხვა უფლისა ისრაელზე, და მძარცველთა ხელში ჩააგდო ის და აძარცვინა მათ; და შემდეგ მტრებს ჩაუგდო ხელში, გარს რომ ერტყნენ, და ვერ გაუმკლავდნენ მტრებს.

¹⁵ყველგან, სადაც კი გავიდოდნენ, უფლის ხელი წარმართავდა მათ საბოროტოდ, როგორც უთხრა მათ უფალმა და როგორც დაუფიცა. და დიდად შევიწროვებულნი იყვნენ ისინი.

¹⁶და დაუდგინა მათ უფალმა მსაჯულნი, რომლებიც იფარავდნენ მათ მძარცველთა ხელიდან.

¹⁷მაგრამ ისრაელიანებმა თავიანთი მსაჯულებისაც არ ისმინეს: უზნეობდნენ უცხო ღმერთების კვალზე – თაყვანს სცემდნენ მათ; მალევე გადაუხვიეს იმ გზას, რომლითაც დადიოდნენ უფლის მცნებათა მორჩილი მათი მამები, ესინი იმათ მსგავსად არ იქცეოდნენ.

¹⁸და როცა უფალი უგზავნიდა მათ მსაჯულებს, თვით უფალი იყო იმ მსაჯულებთან და ისრაელიანთ მტრებისაგან ის იფარავდა მსაჯულის სიცოცხლეში, რადგან ებრალებოდა ისინი, როცა ესმოდა, როგორ გმინავდნენ მჩაგვრელთა და შემაჭირვებელთა ხელში.

¹⁹მაგრამ, როგორც კი მოკვდებოდა მსაჯული, თავიანთ მამებზე უარესად იქცეოდნენ ისრაელიანები – მიჰყვებოდნენ უცხო ღმერთების კვალს, ემსახურებოდნენ და თაყვანს სცემდნენ მათ; არ ეშვებოდნენ თავიანთ ბოროტ საქმეებს, თავს არ ანებებდნენ ურჩობის გზას.

²⁰და კვლავ აღიგზნო რისხვა უფლისა ისრაელზე, და თქვა: „რადგან დაარღვია ამ ხალხმა ჩემი აღთქმა, რომელიც დავუდე მათ მამებს და არ ისმინა ჩემი ხმა,

²¹მეც აღარ ავყრი აქედან არავის იმ ხალხებიდან, რომლებიც აქ დარჩნენ იესოს სიკვდილის შემდეგ.

²²რათა გამოვცადო მათ მიერ ისრაელის ძენი: დაიცავენ თუ არა უფლის გზას, და გაჰყვებიან თუ არა მას, როგორც მიჰყვებოდნენ მათი მამები.“

²³და დატოვა უფალმა ეს ხალხები, რომლებიც თავიდანვე არ აჰყარა, და არ ჩაუგდო ხელში იესოს.