Read სბს–2013 მსაჯული 3 Bible Online

მსაჯული 3 - სბს–2013 bible

მსაჯული 3

¹აი, ის ხალხები, უფალმა რომ დატოვა, რათა გამოეცადა მათ მიერ ის ისრაელიანნი, რომლებიც არ შესწრებიან ქანაანის დასაპყრობად გამართულ ომებს.

²მხოლოდ იმისათვის, რათა სცოდნოდათ და ესწავლათ ომი ისრაელის ძეთა შემდგომ თაობებს, რომელნიც უწინდელ ომებს ვერ მოესწრნენ:

³ფილისტიმელთა ხუთი სამთავრო, ადსევე ყველა ის ქანაანელნი, ციდონელნი და ხიველნი, ლიბანის მთიანეთში რომ მკვიდრობდნენ, ბაყალ-ხერმონის მთიდან ვიდრე ლებო-ხამათამდე.

⁴და იყვნენ ისინი დატოვებული, რათა მათ მიერ გამოეცადა ისრაელიანები, თუ დაემორჩილებოდნენ უფლის ბრძანებებს, რომლებიც მათ მამებს აუწყა მოსეს პირით.

⁵და ისრაელის ძენი დამკვიდრდნენ ქანაანელთა, ხეთელთა, ამორეველთა, ფერიზელთა, ხიველთა და იებუსელთა შორის;

⁶და შეირთეს მათი ასულნი ცოლებად, და თავიანთი ასულები მიათხოვეს მათ ძეებს, და ემსახურებოდნენ მათ ღმერთებს.

⁷და ბოროტება ჩაიდინეს ისრაელის ძეთ უფლის თვალში: დაივიწყეს უფალი, თავიანთი ღმერთი, და ემსახურებოდნენ ბაყალებსა და აშერებს.

⁸და აღიგზნო რისხვა უფლისა ისრაელიანებზე და ხელში ჩაუგდო ისინი ქუშან-რიშყათაიმს, არამის მეფეს, და ემსახურობოდნენ ქუშან-რიშყათაიმს ისრაელის ძენი რვა წელი.

⁹და შეჰღაღადეს ისრაელის ძეთ უფალს, და აღუდგინა უფალმა მხსნელი, რომელმაც იხსნა ისინი: ეს იყო ღოთნიელი, ქალების უმცროსი ძმის, კენაზის ძე.

¹⁰და უფლის სული იყო მასზე, და ის იყო მსაჯული ისრაელისა. და გავიდა იგი საომრად, და ხელში ჩაუგდო მას უფალმა ქუშან-რიშყათაიმი, მეფე არამისა, და სძლია მისმა ხელმა ქუშან-რიშყათაიმს.

¹¹და მოისვენა ქვეყანამ 40 წელი. და მოკვდა ღოთნიელი, კენაზის ძე.

¹²და კვლავ დაიწყეს ისრაელის ძეთ ბოროტის კეთება უფლის თვალში, და გააძლიერა უფალმა ყეგლონი, მეფე მოაბისა, ისრაელზე, რადგან ბოროტება ჩაიდინეს უფლის თვალში ისრაელის ძეთ.

¹³და მან შემოიკრიბა ყამონის ძენი და ყამალეკნი, და წავიდა და დაამარცხა ისრაელი, და დაიპყრო ქალაქი ფინიკოვანი.

¹⁴და ემსახურებოდნენ ისრაელის ძენი ყეგლონს, მოაბის მეფეს, 18 წელი.

¹⁵და შეჰღაღადეს ისრაელის ძეთ უფალს, და მოუვლინა უფალმა მათ მხსნელად ეჰუდი, ძე გერასი, ბენიამინის ძეთაგან, ცაცია კაცი. და ხარკი გაუგზავნეს ისრაელის ძეთ მისი ხელით ყეგლონს, მოაბის მეფეს.

¹⁶და გაიკეთა თავისთვის ეჰუდმა ორლესული მახვილი, ერთწყრთიანი, და შეიბა იგი მოსასხამის ქვეშ, მარჯვენა თეძოზე.

¹⁷და მიართვა ხარკი ყეგლონს, მოაბის მეფეს; და ყეგლონი ძალიან მსუქანი კაცი იყო.

¹⁸და როგორც კი ძღვენი მიართვეს, მაშინვე უკან გაისტუმრა მომტანები.

¹⁹თავად კი, გილგალთან რომ კერპებია, იქიდან უკან გამობრუნდა და უთხრა: „მეფეო, საიდუმლო სიტყვა მაქვს შენთან სათქმელი.“ და ბრძანა ყეგლონმა: „ჩუმად!“ და ყველა კარისკაცი გარეთ გაიკრიფა.

²⁰და შევიდა ეჰუდი მასთან; და იგი მარტო იჯდა ზემო საგრილებელ ოთახში. და უთხრა ეჰუდმა: „ღვთის სიტყვა მაქვს შენთან სათქმელი.“ და წამოდგა მეფე ტახტიდან.

²¹და გაიკრა ეჰუდმა მარცხენა ხელი მარჯვენა თეძოსთან შებმულ მახვილზე და მუცელში აძგერა.

²²და წვერიან-ვადიანად ჩაიფლო მახვილი და გადაფარა ქონმა მახვილი, რადგან არ გამოუძვრია უკან მახვილი მუცლიდან.

²³მერე გამოვიდა ტალანში ეჰუდი და გამოიკეტა კარი.

²⁴და როგორც კი გავიდა, მოვიდნენ მეფის მონები და აჰა, ჩაკეტილი დახვდათ ზემო ოთახის კარი. თქვეს: მოსასაქმებლად ჩაიკეტებოდაო საგრილებელ ოთახში.

²⁵იცადეს, ვიდრე არ შეფიქრიანდნენ. და აჰა, არ იქნა და არ გააღო მან ზემო ოთახის კარი. ამიტომ აიღეს გასაღები და გახსნეს კარი და აჰა, მათი ბატონი მიწაზე აგდია მკვდარი.

²⁶ეჰუდმა სამშვიდობოს გააღწია, ვიდრე ისინი აყოვნებდნენ. იგი გასცდა გილგალის საკერპოებს და სეყირას შეაფარა თავი.

²⁷და ეფრემის მთაში მისულმა ბუკსა ჰკრა და ჩამოვიდნენ მასთან ერთად ისრაელის ძენი მთიდან, და წაუძღვა წინ.

²⁸და უთხრა მათ: „მომყევით, რადგან ხელში ჩაგიგდოთ უფალმა მოაბელნი, თქვენი მტრები.“ და გაჰყვნენ უკან, და გადაუჭრეს მოაბელებს იორდანეზე გადასასვლელი ფონები და აღარავინ გაატარეს.

²⁹და მოსრეს მოაბელნი იმ დროს 10 ათასამდე კაცი, ყველა ძლიერი და მამაცი, და თავს ვერავინ უშველა.

³⁰და იმ დღეს მოაბი ისრაელის მორჩილი გახდა; დამშვიდდა და მოისვენა ქვეყანამ ოთხმოცი წელი.

³¹ეჰუდის შემდეგ იყო შამგარი, ძე ყანათისა, და მან მოსრა ფილისტიმელთა 600 კაცი ხარის საჩხვეპით; და მანაც იხსნა ისრაელი.