Read სბს–2013 მსაჯული 4 Bible Online

მსაჯული 4 - სბს–2013 bible

მსაჯული 4

¹და ეჰუდის სიკვდილის შემდეგ კვლავ იწყეს ისრაელის ძეთ ბოროტის კეთება უფლის თვალში.

²და ხელში ჩაუგდო ისინი უფალმა ქანაანის მეფეს, იაბინს, რომლის სატახტო გალაქი იყო ხაცორი. მისი მხედართმთავარი იყო სისერა, რომელიც იდგა ხაროშეთ-ჰა-გოიმში.

³და შეჰღაღადეს ისრაელის ძეთ უფალს, რადგან სისერას 900 რკინის ეტლი ჰქონდა, და ის სასტიკად ჩაგრავდა ისრაელის ძეთ 20 წლის მანძილზე.

⁴და იმ ხანად დებორა, წინასწარმეტყველი ქალი, ცოლი ლაფიდოთისა, იყო ისრაელს მსაჯული.

⁵და იჯდა ის დებორას ფინიკის ქვეშ, რამასა და ბეთელს შორის, ეფრემის მთაზე; და ადიოდნენ მასთან ისრაელის ძენი განსასჯელად.

⁶და კაცები გაუგზავნა და ბარაკი, აბინოყამის ძე, დაიბარა კედეშ-ნაფთალიდან, და უთხრა მას: „აი, რა გიბრძანა უფალმა, ისრაელის ღმერთმა: ‘წადი და დადექი თაბორის მთაზე 10 ათასი კაცით ნაფთალის ძეთაგან და ზებულუნის ძეთაგან.

⁷და მე კიშონის ხევთან მოგიყვან სისერას, იაბინის მხედართმთავარს, მის ეტლებსა და მის ჯარს, და ხელში ჩაგაგდებინებ მათ.’ “

⁸და უთხრა დებორას ბარაკმა: „თუ წამომყვები, წავალ, და თუ არ წამომყვები, არ წავალ.“

⁹და უთხრა დებორამ: „წამოყოლით წამოგყვები, ოღონდ ამ გზაზე, რომელსაც შენ დაადგები, შენი აღარ იქნება დიდება, რადგან დიაცის ხელში ჩააგდებს უფალი სისერას.“ და ადგა დებორა და წაჰყვა ბარაკს კედეშში.

¹⁰და მოუხმო ბარაკმა ზებულუნელთ და ნაფთალელთ კედეშში, და გაჰყვა მის კვალს 10 ათასი კაცი, და დებორაც წაჰყვა.

¹¹და ხებერ კენიელი ცალკე გამოჰყოფოდა კენიელებს, მოსეს მოყვრის, ხობაბის მოდგმას, და ცაყანანიმის მუხრანში გაეშალა კარვები, კედეშის მახლობლად.

¹²და შეატყობინეს სისერას, რომ ბარაკი, ძე აბინოყამისა თაბორის მთაზე იყო ასული.

¹³და იხმო სისერამ მთელი თავისი ეტლიონი – 900 რკინის ეტლი, და მთელი ხალხი, რომელიც მასთან იყო, ხაროშეთ-ჰა-გოიმიდან კიშონის ხევამდე.

¹⁴და უთხრა დებორამ ბარაკს: „ადექი, რადგან ეს ის დღეა, როცა ხელში ჩაგიგდო სისერა უფალმა. თვით უფალი წაგიძღვება წინ.“ და ჩავიდა ბარაკი თაბორის მთიდან და 10 ათასი კაცი ჩაჰყვა.

¹⁵და დააფრთხო უფალმა სისერა და მთელი მისი ეტლიონი, და მთელი ლაშქარი ბარაკის მახვილის პირით. და გადმოხტა სისერა ეტლიდან და ფეხით გაიქცა.

¹⁶ბარაკმა ხაროშეთ-ჰა-გოიმამდე სდია ეტლიონსა და ლაშქარს; და დაეცა სისერას მთელი ლაშქარი მახვილის პირით, ერთიც არ გადარჩენილა.

¹⁷და გაიქცა სისერა ფეხით იაყელის, ხებერ კენიელის ცოლის, კარვისაკენ, რადგან ხაცორის მეფის, იაბინისა და კენიელი ხებერის სახლს შორის მშვიდობა სუფევდა.

¹⁸და გამოვიდა იაყელი სისერას შესახვედრად, და უთხრა მას: „მობრძანდი, ბატონო ჩემო, შემობრძანდი ჩემთან, ნუ გეშინია.“ და შევიდა სისერა მასთან კარავში, და დამალა იგი საფენის ქვეშ.

¹⁹და უთხრა მას სისერამ: „გეთაყვა, ცოტა წყალი დამალევინე, რადგან მწყურია.“ და მოხსნა იაყელმა რძის ტიკს პირი და დაალევინა, და ისევ დამალა სისერა.

²⁰და სისერამ უთხრა მას: დადექი კარვის კართან, თუ ვინმემ ჩამოიაროს და გკითხოს, ვინმე ხომ არ არისო მანდ? უთხარი: არა-თქო.

²¹და იაყელმა, ხებერის ცოლმა, აიღო კარვის დასაჭიმი პალო, ხელში ურო დაიკავა და სისერას ფეხაკრეფით მიეპარა, რომელსაც დაღლილს ეძინა, და ისე ჩაურჭო პალო საფეთქელში, რომ მიწაზე დააჭედა, და მოკვდა სისერა.

²²და აჰა, ბარაკი მოსდევს სისერას კვალს. გამოეგება იაყელი, და უთხრა: „მოდი, გაჩვენო კაცი, შენ რომ ეძებ.“ და შევიდა მასთან ბარაკი და აჰა, სისერა მკვდარი აგდია, საფეთქელში პალო ჩარჭობილი.

²³და ღმერთმა იმ დღეს დაუმორჩილა იაბინი, მეფე ქანაანისა, ისრაელის ძეთ.

²⁴და თანდათან დამძიმდა ისრაელიანთა ხელი იაბინზე, ქანაანის მეფეზე, ვიდრე საბოლოოდ არ მოსპეს იგი.