Read სბს–2013 მსაჯული 8 Bible Online

მსაჯული 8 - სბს–2013 bible

მსაჯული 8

¹და უთხრეს მას ეფრემის კაცებმა: „ეს რა გააკეთე, რომ არ მოგვიხმე, როცა მიდიანთან საომრად მიდიოდი?“ და მაგარი ჩხუბი აუტეხეს.

²და უპასუხა გედეონმა მათ: „ახლა მე ისეთი რა გავაკეთე, რომ თქვენს საქმეებს გაუტოლდეს? ეფრემის მონამცვრევი რით არა სჯობს აბიყეზერის მიერ მოსთვლილს?“

³ღმერთმა ხელში ჩაგიგდოთ მიდიანის მთავრები – ყორები და ზეები. განა გაუტოლდება ჩემი საქმეები თქვენს საქმეებს? მაშინ კი მოუბრუნდათ გული მასზე, როცა ეს სიტყვები უთხრათ გედეონმა.

⁴და მიადგა გედეონი იორდანეს და გადალახა მან და მასთან მყოფმა მდევარში დაქანცულმა სამასმა კაცმა.

⁵და სთხოვა მან სუქოთის მცხოვრებთ: „მიეცით პურის კვერები იმ ხალხს, მე რომ მომყვება, რადგან დაქანცულები არიან, და მე მიდიანის მეფეებს მივდევ – ზებახსა და ცალმუნაყს.“

⁶და უთხრეს სუქოთის მთავრებმა: „ვითომ ზებახი და ცალმუნაყი უკვე ხელთა გყავდნენ, ისე გვთხოვ ჯარი დამიპურეთო!“

⁷მიუგო გედეონმა: „მაშ კარგი. და როცა უფალი ზებახსა და ცალმუნაყს ხელში ჩამაგდებინებს, უდაბნოს ნარ-ეკლით დაგაფლეთთ ხორცს.“

⁸და წავიდა იქიდან ფენუელისაკენ, და იგივე სთხოვა მათ; და ფენუელის მკვიდრებმაც იგივე მიუგეს, რაც სუქოთის მკვიდრებმა.

⁹და ფენუელის მკვიდრებსაც ასე უთხრა: „როცა გამარჯვებული შემოვიქცევი უკან, ნახავთ, როგორ დავმუსრავ ამ ციხე-კოშკს!“

¹⁰ხოლო ზებახი და ცალმუნაყი კარკორში იდგნენ თავიანთი ლაშქრით – 15 ათასამდე კაცით – აღმოსავლეთის ძეთა მთელი ლაშქრიდან რაც გადარჩა; დაღუპვით კი 120 ათასი მებრძოლი დაეცა.

¹¹გედეონმა აღმოსავლეთიდან შემოუარა ნობახს და იოგბეჰას კარვებში მცხოვრებთა გზით და იმ დროს დაეცა ბანაკს, როცა უზრუნველად იყო ბანაკი.

¹²და გაიქცნენ ზებახი და ცალმუნაყი, და ის კვალდაკვალ დაედევნა მათ, და შეიპყრო მიდიანის ორივე მეფე – ზებახი და ცალმუნაყი. მთელი მათი ლაშქარი კი თავზარდაცემული გარბოდა.

¹³და ბრუნდებოდა ბრძოლის შემდეგ გედეონი, ძე იოაშისა, ხერესის მაღლობით.

¹⁴და შეიპყრო ერთი სუქოთელი ჭაბუკი და დაჰკითხა იგი. და ჩამოუწერა მან სუქოთის მთავრები და მისი უხუცესები – 77 კაცი.

¹⁵და მოვიდა სუქოთელებთან, და უთხრა: „აი, ზებახი და ცალმუნაყი, ამათ გამო იყო, რომ დამცინოდით და მეუბნებოდით: ‘ვითომ ზებახი და ცალმუნაყი უკვე ხელთა გყავდნენ, ისე გვთხოვ, ჯარი დამიპურეთო!’ “

¹⁶და გამოიყვანა ქალაქის უხუცესნი და უდაბნოს ნარ-ეკლით ლეწა სუქოთელები.

¹⁷ფენუელის ციხე-კოშკი დაანგრია და იმ ქალაქის მკვიდრნი გაჟლიტა.

¹⁸და უთხრა ზებახსა და ცალმუნაყს: „როგორები იყვნენ ის კაცები, თაბორზე რომ დახოცეთ?“ და მიუგეს მათ: „შენნაირები იყვნენ, თვალად მეფისწულებს ჰგავდნენ.“

¹⁹და თქვა გედეონმა: „ჩემი ძმები იყვნენ ისინი, დედაჩემის ძენი. ვფიცავ უფალს, თქვენ რომ ისინი გეცოცხლებინათ, აღარც თქვენ დაგხოცავდით.“

²⁰და უთხრა მან იეთერს, თავის პირმშოს: „ადექი, დახოცე ესენი!“ და ვერ იშიშვლა ბიჭმა მახვილი, რადგან შეშინდა, რაკი ჯერ კიდევ პატარა იყო.

²¹და უთხრეს ზებახმა და ცალმუნაყმა: „ადექ და შენ დაგვხოცე, რადგან რაც კაცია, მისი ძალღონეც ის არის.“ და ადგა გედეონი და დახოცა ზებახი და ცალმუნაყი, და კისრიდან ჩამოხსნა ნახევარმთვარეები მათ აქლემებს.

²²და უთხრეს ისრაელის კაცებმა გედეონს: „იხელმწიფეთ ჩვენზე შენც, შენმა ძემაც და შენი ძის ძემაც, რადგან შენ გვიხსენი მიდიანელთა ხელიდან.“

²³და უპასუხა მათ გედეონმა: „მე არ ვიხელმწიფებ თქვენზე და არც ჩემი ძე იხელმწიფებს თქვენზე; უფალი იხელმწიფებს თქვენზე.“

²⁴და უთხრა მათ გედეონმა აგრეთვე: „თხოვნით ერთსა გთხოვთ: თითოეულმა თითო საყურე მომცეს თავის ნადავლიდან“ (რადგან ოქროს საყურეებს ატარებდნენ, ვინაიდან ისმაელიანები იყვნენ).

²⁵და მათ უთხრეს: „მოგცემთ.“ და გაშალეს წამოსასხამი, და თითოეულმა თითო საყურე დააგდო თავისი ნაალაფარიდან.

²⁶და წონა ოქროს საყურეებისა, მან რომ გამოითხოვა, იყო 1700 ოქროს შეკელი, გარდა მიდიანის მეფისაგან ართმეული ნახევარმთვარეებისა, გულსაკიდლებისა, ძოწეულისა და გულქანდებისა, მათს აქლემებს ყელზე რომ ეკიდათ.

²⁷და გააკეთა მისგან გედეონმა ეფოდი, და დადო იგი თავის ქალაქში, ყოფრაში; და მეძაობდა იქ მთელი ისრაელი იმის კვალზე და მახედ ექცა იგი გედეონსა და მის სახლს.

²⁸და დამორჩილდა მიდიანი ისრაელის ძეთ, და მეტი აღარ წამოუყვიათ მათ თავი, და მოისვენა ქვეყანამ 40 წელი გედეონის სიცოცხლეში.

²⁹და წავიდა იერუბაყალი, იოაშის ძე, და თავის სახლში დამკვიდრდა.

³⁰ხოლო გედეონს ჰყავდა 70 ღვიძლი შვილი, მისი საზარდულიდან გამოსული, რადგან მრავალი ცოლი ჰყავდა მას.

³¹და მისმა შექემელმა ხარჭამაც ვაჟი გაუჩინა; და დაარქვა მას სახელად აბიმელექი.

³²და მოკვდა გედეონი, იოაშის ძე, კეთილ სიბერეში, და დაიმარხა მისი მამის, იოაშის, სამარხში – აბიყეზერის ყოფრაში.

³³გედეონი რომ მოკვდა, ისევ დაიწყეს ისრაელის ძეთ მეძაობა ბაყალის კვალზე და ღმერთად გაიხადეს ბაყალ-ბერითი.

³⁴და აღარ გაიხსენეს ისრაელის ძეთ უფალი, თავიანთი ღმერთი, რომელმაც იხსნა ისინი ყველა გარეშემო მტრის ხელიდან.

³⁵და არც იერუბაყალ-გედეონის სახლს მიაგეს მადლი, მთელი იმ სიკეთისათვის, რაც მან გაუკეთა ისრაელს.