Read სბს–2013 მსაჯული 9 Bible Online

მსაჯული 9 - სბს–2013 bible

მსაჯული 9

¹და წავიდა აბიმელექ იერუბაყალის ძე შექემში თავის დედის ძმებთან, და ელაპარაკა მათ და თავისი დედის მამისსახლის მთელ საგვარეულოს, და უთხრა:

²„უთხარით ყველა შექემელს: ‘რა გირჩევნიათ, მთელი 70 კაცი – იერუბაყალის ყველა ძე – ხელმწიფებდეს თქვენზე, თუ მე, ერთი კაცი, ვიყო თქვენი ხელისუფალი?’ და გახსოვდეთ, შექემელნო, რომ მე ვარ თქვენი სისხლი და ხორცი.“

³და მისმა დედის ძმებმა ჩაასმინეს ყველა შექემელს ყველა ეს სიტყვა; და გადაიხარა მათი გული აბიმელექისკენ, რადგან თქვეს: ძმა არისო ჩვენი.

⁴და მისცეს მას 70 ვერცხლი ბაყალ-ბერითის სახლიდან, და დაიქირავა ამით აბიმელექმა უღირსი და თავზეხელაღებული კაცები, და უკან გაჰყვნენ მას.

⁵და მივიდა თავისი მამისსახლში, ყოფრაში, და ერთ ქვაზე დააკლა თავისი ძმები, ძენი იერუბაყალისა, 70 კაცი, და მხოლოდ იოთამი გადარჩა, იერუბაყალის უმცროსი ვაჟი, რადგან დამალვა მოასწრო.

⁶და თავი მოიყარა ყველა შექემელმა და მილოს მთელმა სახლმა, წავიდნენ და გაამეფეს აბიმელექი მუხასთან დადგმულ სვეტთან, შექემში რომ არის.

⁷და როცა ეს ამბავი შეატყობინეს იოთამს, წავიდა და გადმოდგა გერიზიმის მთის თხემზე, ხმა აღიმაღლა და დაიძახა: „ისმინეთ ჩემი, შექემელებო, რათა ღმერთმა თქვენ მოგისმინოთ!“

⁸ერთხელ როგორღაც შეიკრიბნენ ხეები, რომ თავისთვის მეფე დაესვათ, და უთხრეს ზეთისხილს: იმეფეო ჩვენზე;

⁹და უთხრა მათ ზეთისხილმა: „მივატოვო ჩემი სიმსუყე, რომლითაც ღმერთსა და კაცს განადიდებენ, და ხეებს გადავყვე?“

¹⁰მაშინ უთხრეს ხეებმა ლეღვს: მოდი და შენ იმეფეო ჩვენზე.

¹¹და უთხრა მათ ლეღვმა: „მივატოვო ჩემი სიტკბოება და ჩემი ნაყოფი და ხეებს გადავყვე?“

¹²და უთხრეს ხეებმა ვაზს: მოდი და შენ იმეფეო ჩვენზე.

¹³და უთხრა მათ ვაზის ლერწმა: „დავთმო ჩემი წვენი, გამხარებელი ღვთისა და კაცისა, და ხეებს გადავყვე?“

¹⁴ბოლოს ყველა ხემ კვრინჩხს მიმართა: მოდი და შენ იმეფეო ჩვენზე.

¹⁵და უთხრა კვრინჩხმა ხეებს: „თუ თქვენ მართლაც თქვენს მეფედ გინდათ ჩემი ცხება, მოდით და შემოეფარეთ ჩემს ჩრდილს, ხოლო თუ არ დამადგენთ თქვენს მეფედ – ამოვარდება კვრინჩხის ბუჩქიდან ცეცხლი და შთანთქავს ლიბანის კედრებს!“

¹⁶„აბა, დაფიქრდით, სწორად მოიქეცით, აბიმელექი რომ გაამეფეთ? კარგად მოექეცით იერუბაყალს და მის სახლს? მისი ღვაწლის სანაცვლოდ ეს ეკუთვნოდა?

¹⁷მამაჩემი თქვენი გულისთვის იბრძოდა, თავი გაწირა, და გიხსნათ მიდიანის ხელიდან;

¹⁸თქვენ კი დღეს წინ აღუდექით მამაჩემის სახლს და ერთ ქვაზე დააკალით მისი ძენი, 70 კაცი, და აბიმელექი, მისი ხარჭის ძე, შექემელებზე გაამეფეთ, რადგან თქვენი მოძმეა იგი.

¹⁹და თუ სწორად და პატიოსნად მოექეცით იერუბაყალს და მის სახლს, მაშინ იხარეთ აბიმელექით და მანაც იხაროს თქვენით;

²⁰თუ არა და, ამოვარდეს ცეცხლი აბიმელექისაგან და შთანთქას შექემელები და მილოს სახლი; ამოვარდეს ცეცხლი შექემელთაგან და მილოს სახლიდან და შთანთქას აბიმელექი!“

²¹და გაიქცა იოთამი და წავიდა ბეერისაკენ, და იქ დამკვიდრდა თავისი ძმის, აბიმელექისგან შორს.

²²და მთავრობდა აბიმელექი ისრაელზე სამი წელი.

²³და ღმერთმა განხეთქილების სული გამოგზავნა აბიმელექსა და შექემელებს შორის, და უღალატეს შექემელებმა აბიმელექს,

²⁴რათა მოწეულიყო იერუბაყალის 70 ძის მიმართ ჩადენილი ბოროტების სამაგიერო და მათი სისხლი მოჰკითხოდა აბიმელექს, მათ ძმას, რომელმაც დახოცა ისინი, და შექემელებსაც, რომელთაც ხელი გაუმაგრეს აბიმელექს თავისი ძმების დახოცვაში.

²⁵და მთების თხემებზე ჩაუსაფრეს მას შექემელებმა კაცები, და ძარცვავდნენ ყველას, ვინც მათ სიახლოვეს გზად გაივლიდა. და მოახსენეს ეს ამბავი აბიმელექს.

²⁶და მოვიდნენ გაყალი, ძე ყებედისა, და მისი ძმები, და დადიოდნენ შექემში; და მას მიენდვნენ შექემელნი.

²⁷და გავიდნენ მინდორში, მოკრიფეს ყურძენი, დაწურეს და ზეიმი გამართეს. შევიდნენ თავიანთი ღმერთის ტაძარში და ჭამდნენ და სვამდნენ, და წყევლიდნენ აბიმელექს.

²⁸და თქვა გაყალ ყებედის ძემ: „ვინ გდია აბიმელექი? და რა არის შექემი! მას უნდა ვეყმოთ? განა იერუბაყალის ძე არ არის ის, და განა ზებული არ არის მისი მოურავი? ისინი უნდა ემსახურებოდნენ ხამორს, შექემის მამას! აბიმელექს რატომ უნდა ვემორჩილებოდეთ ჩვენ?

²⁹ეს ხალხი რომ ჩემს ხელთ იყოს, მე გავათავისუფლებდი მათ აბიმელექისგან! და გამოიწვია მან აბიმელექი: შეკრიბე შენი ჯარი და გამოდიო საომრად!“

³⁰ზებულმა, ქალაქის მთავარმა, გაიგო გაყალ ყებედის ძის ნალაპარაკევი და რისხვით აღეგზნო.

³¹და ფარულად გაუგზავნა მოციქულები აბიმელექს ყარუმაში და შეუთვალა: „აჰა, მოვიდა გაყალი, ძე ყებედისა, თავის ძმებთან ერთად შექემში და ქალაქი უნდათ აგიმხედრონ.

³²და ახლა, ამაღამვე, ადექით შენ და შენთან მყოფი ხალხი და ველზე ჩაუსაფრდით.

³³და განთიადისას, მზის ამოსვლისთანავე, ადექი დილაადრიან და დაეცი ქალაქს; და წამოვა გაყალი მასთან მყოფი ხალხით შენს დასახვედრად და ხელში ჩაიგდებ მათ.“

³⁴და ადგა ღამე აბიმელექი და მთელი მასთან მყოფი ხალხი, და ოთხ რაზმად ჩასაფრდა შექემთან.

³⁵და გამოვიდა გაყალი, ძე ყებედისა, და დადგა ქალაქის კარიბჭესთან; და გამოვიდა საფარიდან აბიმელექი თავის ხალხთან ერთად.

³⁶გაყალმა, ხალხი რომ დაინახა, უთხრა ზებულს: „შეხედე, ხალხი ეშვება მთათა თხემებიდან.“ და უთხრა მას ზებულმა: „მთების ჩრდილი ხალხად გეჩვენება.“

³⁷და კვლავ ალაპარაკდა გაყალი და თქვა: „ხალხი ეშვება მაღლობიდან, და ერთი რაზმი მოდის მისანთა მუხის გზიდან.“

³⁸და უთხრა მას ზებულმა: „განა შენ არ ამბობდი: ვინ არის აბიმელექი, რომ მას ვემონებოდეთო? აგერ, ეს ხალხია, შენ რომ დასცინოდი! გადი და შეები მათ!“

³⁹და გაუძღვა გაყალი შექემელებს და შეება აბიმელექს.

⁴⁰აბიმელექმა გააცია ისინი და ქალაქის კარიბჭემდე სდია. მრავალი დახოცილი შექემელი დაეცა კარიბჭემდე.

⁴¹ამის შემდეგ დარჩა აბიმელექი ყარუმაში; და განდევნა ზებულმა გაყალი და მისი ძმები, რათა არ ეცხოვრათ შექემში.

⁴²მეორე დღეს შექემელნი კვლავ გამოვიდნენ ქალაქიდან. და შეიტყო ეს ამბავი აბიმელექმა.

⁴³და გაიყვანა მან თავისი ხალხი და გაჰყო ისინი სამ რაზმად, და ველზე ჩასაფრდა. და ქალაქიდან გამომავალი ხალხი რომ დაინახა, დაესხა მათ თავს და მთლიანად მოსრა.

⁴⁴აბიმელექი და მისი რაზმები კი წინ გაიჭრნენ და შედგნენ ქალაქის კარიბჭესთან, ხოლო ორი რაზმი შეესია ყველას, ვინც ველზე იყო, და ხოცავდა მათ.

⁴⁵აბიმელექი კი მთელი დღე ებრძოდა ქალაქს, ქალაქი აიღო, და გაწყვიტა მთელი ხალხი. მან დაანგრია შექემი და მის ადგილას მარილი დათესა.

⁴⁶და შეიტყვეს ეს ამბავი შექემის გოდოლის მცხოვრებთ და შეცვივდნენ ელ-ბერითის სახლის გოდოლში.

⁴⁷და მოხსენდა აბიმელექს, ერთად შეიყარაო შექემის გოდოლის ყველა მკვიდრი.

⁴⁸და ავიდა აბიმელექი ცალმონის მთაზე, თვითონ და მასთან მყოფი მთელი ხალხი, და აიღო აბიმელექმა ცული ხელში და მოჭრა ტოტი, და ასწია იგი და გაიდო მხარზე, და უთხრა მასთან მყოფ ხალხს: „ხომ ნახეთ, რა გავაკეთე, თქვენც სასწრაფოდ იგივე გააკეთეთ.“

⁴⁹მოჭრა მთელმა ხალხმა, თითოეულმა თითო ტოტი, და გაჰყვა აბიმელექს, და შემოუწყვეს ისინი გოდოლს და ცეცხლს მისცეს გოდოლი და შიგ მყოფნი. და ამოწყდა შექემის ყველა მკვიდრი, თითქმის ათასამდე კაცი და ქალი.

⁵⁰და წავიდა აბიმელექი თებეცში, და ალყა შემოარტყა თებეცს და დაიპყრო იგი.

⁵¹მტკიცე გოდოლი იყო შუა ქალაქში და იქ გაიქცა ყველა, კაცი თუ ქალი, და ყველა მკვიდრი ქალაქისა, და ჩაიკეტეს კარი და ავიდნენ გოდლის ბანზე.

⁵²და მივიდა აბიმელექი გოდოლთან, და შეუტია და მიადგა გოდლის შესასვლელს, რათა დაეწვა იგი ცეცხლით.

⁵³და ამ დროს ერთმა ქალმა დოლაბის ნატეხი დასცა მაღლიდან აბიმელექს და თავის ქალა ჩაუმტვრია.

⁵⁴აბიმელექმა უმალ თავისი საჭურველთმტვირთველი იხმო და უთხრა: „იშიშვლე მახვილი და მომკალი, რომ არა თქვან ჩემზე, დედაკაცმა მოკლაო.“ და უგმირა მას მისმა საჭურველმტვირთველმა, და მოკვდა აბიმელექი.

⁵⁵და როცა დაინახეს ისრაელიანებმა, რომ მოკვდა აბიმელექი, ყველანი თავ-თავიანთ სახლებში წავიდ-წამოვიდნენ.

⁵⁶ასე მიუზღო სამაგიერო ღმერთმა აბიმელექს იმ ბოროტებისათვის, რაც მან თავის მამის მიმართ ჩაიდინა, თავისი 70 ძმის დახოცვით.

⁵⁷და შექემელებზე მოაწია ღმერთმა ყველა მათი ბოროტება. და ეწიათ მათ იოთამ იერუბაყალის ძის წყევლა.