Read სბს–2013 გამოცხადება 10 Bible Online

გამოცხადება 10 - სბს–2013 bible

გამოცხადება 10

¹და ვიხილე სხვა ანგელოზი, ძლიერი, ციდან ჩამომავალი, ღრუბლით შემოსილი, თავზე ცისარტყელით. მისი სახე იყო, როგორც მზე და მისი ფეხები, როგორც ცეცხლის სვეტები.

²ხელთ ჰქონდა პატარა გაშლილი გრაგნილი. და დააბიჯა მარჯვენა ფეხი ზღვას, ხოლო მარცხენა – მიწას.

³და დაიძახა დიდი ხმით, როგორც ლომი ღრიალებს. და როდესაც დაიძახა, თავ-თავისი ხმით ალაპარაკდა შვიდი ქუხილი.

⁴და როცა შვიდი ქუხილი ლაპარაკობდა თავ-თავისი ხმით, ჩაწერა დავაპირე და გავიგონე ხმა ციდან, რომელმაც თქვა: „დაბეჭდე, რასაც ლაპარაკობდა შვიდი ქუხილი, და ნუ დაწერ ამას.“

⁵ანგელოზმა, რომელიც ვიხილე ზღვასა და მიწაზე მდგომი, ცისკენ აღაპყრო თავისი მარჯვენა ხელი

⁶და დაიფიცა ცოცხალი უკუნითი უკუნისამდე, რომელმაც შექმნა ცა და რაც მასშია, მიწა და რაც მასშია, ზღვა და რაც მასშია, რომ დრო აღარ იქნება,

⁷არამედ ანგელოზის ხმის დღეებში, როცა ის დააყვირებს საყვირს, აღსრულდება ღმერთის საიდუმლო, როგორც ახარა მან თავის მსახურთ – წინასწარმეტყველებს.

⁸ხმა, რომელიც გავიგონე ციდან, კვლავ დამელაპარაკა და მითხრა: „მიდი და აიღე გაშლილი გრაგნილი, რომელიც ზღვასა და მიწაზე მდგომი ანგელოზის ხელშია.“

⁹მივედი ანგელოზთან და ვუთხარი: „მომეცი გრაგნილი.“ და მითხრა: „აიღე და შეჭამე; მწარე იქნება ის შენს მუცელში, მაგრამ შენს პირში – თაფლივით ტკბილი.“

¹⁰ავიღე გრაგნილი ანგელოზის ხელიდან და შევჭამე, და თაფლივით მეტკბო პირში. და, როცა შევჭამე, მუცელი გამიმწარა.

¹¹და მითხრეს: „გმართებს კვლავ იწინასწარმეტყველო ხალხებისა და ერების, ენებისა და მრავალ მეფეთა შესახებ.“