Read სბს–2013 გამოცხადება 7 Bible Online

გამოცხადება 7 - სბს–2013 bible

გამოცხადება 7

¹ამის შემდეგ ვიხილე დედამიწის ოთხივე კიდეზე მდგარი ოთხი ანგელოზი, რომელთაც ეპყრათ დედამიწის ოთხი ქარი, რომ არ ექროლათ არც დედამიწაზე, არც ზღვაზე, არც ხეებზე.

²და ვიხილე სხვა ანგელოზი, მზის აღმოსავალიდან ამომავალი, ცოცხალი ღმერთის ბეჭდის მქონე და დიდი ხმით შესძახა ოთხ ანგელოზს, რომელთაც მიეცათ ნება, ევნოთ მიწისა და ზღვისათვის, და უთხრა:

³„ნუ ავნებთ მიწას, ზღვასა და ხეს, ვიდრე ჩვენი ღმერთის მსახურთ ბეჭდებს დავასვამთ შუბლზე.“

⁴და გავიგონე ბეჭედდასმულთა რიცხვი: 144 ათასი ბეჭედდასმული ისრაელის ყოველი ტომიდან:

⁵იუდას ტომიდან 12 ათასი ბეჭედდასმული; რუბენის ტომიდან 12 ათასი; გადის ტომიდან 12 ათასი;

⁶აშერის ტომიდან 12 ათასი; ნეფთალემის ტომიდან 12 ათასი; მანაშეს ტომიდან 12 ათასი;

⁷სიმეონის ტომიდან 12 ათასი; ლევის ტომიდან 12 ათასი; ისაქარის ტომიდან 12 ათასი;

⁸ზებულონის ტომიდან 12 ათასი; იოსების ტომიდან 12 ათასი; ბენიამინის ტომიდან 12 ათასი ბეჭედდასმული.

⁹ამის შემდეგ ვიხილე, და, აჰა, უამრავი ხალხი, რომლის დათვლა არავის შეეძლო, ყოველი ერიდან და ტომიდან, ხალხიდან და ენიდან, მდგომარენი ტახტის წინაშე და კრავის წინაშე, თეთრი სამოსით მოსილნი და პალმის რტოებით ხელში.

¹⁰და იძახდნენ დიდი ხმით და ამბობდნენ: „ხსნა ჩვენს ღმერთს, ტახტზე მჯდომარეს, და კრავს!“

¹¹და ყველა ანგელოზი იდგა ტახტის, უხუცესებისა და ოთხი ცხოველის ირგვლივ. და პირქვე დაემხნენ ტახტის წინაშე და თაყვანი სცეს ღმერთს,

¹²და ამბობდნენ: „ამინ! კურთხევა, დიდება, სიბრძნე, მადლიერება, პატივი, ძალა და სიმტკიცე ჩვენს ღმერთს უკუნითი უკუნისამდე! ამინ.“

¹³და მომმართა ერთმა უხუცესთაგანმა და მითხრა: „თეთრი სამოსით მოსილები ვინ არიან, ან საიდან მოვიდნენ?“

¹⁴ვუთხარი მას: „უფალო ჩემო, შენ იცი.“ და მითხრა: „ესენი არიან დიდი გასაჭირიდან მოსულები. მათ გარეცხეს თავიანთი სამოსი და გაათეთრეს კრავის სისხლით.

¹⁵ამიტომ არიან ღმერთის ტახტის წინ და ემსახურებიან მას დღე და ღამე მის ტაძარში. და ტახტზე მჯდომი გაშლის თავის კარავს მათზე.

¹⁶აღარ მოშივდებათ მათ, აღარც მოსწყურდებათ, აღარც მზე დასწვავთ და აღარც ხვატი.

¹⁷რადგან კრავი, რომელიც ტახტის შუაშია, აძოვებს მათ და სიცოცხლის წყლის წყაროებზე მიიყვანს, და მოსწმედს მათ ღმერთი თვალთაგან ყველა ცრემლს.“