Read სბს–2013 1 მეფეთა 1 Bible Online

1 მეფეთა 1 - სბს–2013 bible

1 მეფეთა 1

¹იყო ერთი კაცი რამათაიმ-ცოფიმიდან, ეფრემის მთებიდან, რომელსაც ერქვა ელკანა, ძე იეროხამისა, ძისა ელიჰუსი, ძისა თოხუსი, ძისა ცუფისა ეფრათელისა.

²და ორი ცოლი ჰყავდა მას. ერთს ერქვა ხანა, მეორეს – ფენინა. ფენინას შვილები ჰყავდა, ხანა კი უშვილო იყო.

³ყოველწლიურად ადიოდა ეს კაცი თავისი ქალაქიდან ცაბაოთ უფლისათვის თაყვანის საცემად და მსხვერპლის შესაწირად შილოში, სადაც ყელის ორი ვაჟი: ხოფნი და ფინეხასი, უფლის მღვდლები იყვნენ.

⁴იმ დღეს, როცა ელკანას უწევდა მსხვერპლის შეწირვა, იგი წილს აძლევდა ხოლმე ფენინას, თავის ცოლს, და მის ვაჟებსა და ასულებს.

⁵ხანას კი განსაკუთრებულ ნაჭერს უძღვნიდა, რადგან უყვარდა ხანა, თუმცა კი საშო დაეხშო მისთვის უფალს.

⁶და ამის გამო ხანას მისი მოზიარე ფენინა თავს აბეზრებდა და აღიზიანებდა.

⁷ასე ხდებოდა ყოველწლიურად, როცა კი ხანა უფლის სახლში ადიოდა. ფენინა ამწარებდა მას, ის კი ტიროდა და არაფერს ჭამდა.

⁸და უთხრა ელკანამ, მისმა ქმარმა: „ხანა, რატომ ტირი და რატომ არაფერს ჭამ? რასა დარდობს შენი გული? ათ შვილს გერჩივნოს ჩემი თავი!“

⁹შილოში პურობის შემდეგ ადგა ხანა სუფრიდან და უფლის წინაშე წარსდგა. ყელი მღვდელი უფლის ტაძრის ზღურბლთან საკარცხულზე იჯდა.

¹⁰სულგამწარებული შეევედრა იგი უფალს და ცხარედ ატირდა.

¹¹აღთქმა დაუდო და უთხრა: „ცაბაოთ უფალო, თუ მოხედავ შენი მხევლის ტანჯვას, თუ გამიხსენებ და არ დაივიწყებ შენს მხევალს და ძეს უწყალობებ, უფალს მივუძღვნი მას მსახურად. ვიდრე ცოცხალი იქნება, სამართებელი არ შეეხება მის თავს.“

¹²და აკვირდებოდა ყელი მღვდელი უფლის წინაშე დიდხანს მლოცველი ქალის ბაგეებს.

¹³რაკი ხანა გულში ლაპარაკობდა, მხოლოდ ბაგეებს ამოძრავებდა და ხმა კი არ ისმოდა, მთვრალიაო, იფიქრა ყელიმ.

¹⁴უთხრა მას: „სანამ უნდა იყო მთვრალი? გამოიფხიზლე ღვინისგან!“

¹⁵ხოლო ხანამ მიუგო: „არა, ჩემო ბატონო; მე ერთი სულგამწარებული ქალი ვარ. ღვინო და თაფლუჭი არ მისვამს, უფლის წინაშე განვჰფენ ჩემს სულს;

¹⁶უღირსი დედაკაცი არ გეგონოს შენი მხევალი. მხოლოდ დიდი მწუხარებისა და სიმწრის გამო ვლაპარაკობდი ამდენ ხანს.“

¹⁷მიუგო ყელიმ და უთხრა: „მშვიდობით გევლოს, დაე, ისრაელის ღმერთმა ისმინოს შენი ვედრება და აგისრულოს სათხოვარი.“

¹⁸უთხრა ქალმა: „მადლი უპოვია შენს მხევალს შენს თვალში.“ და წავიდა ქალი თავისი გზით. საჭმელი ჭამა და აღარ ჰქონია სახე უწინდებურად დამწუხრებული.

¹⁹მეორე დღეს დილაადრიანად ადგნენ ისინი, თაყვანი სცეს უფალს, დაბრუნდნენ რამაში, მივიდნენ შინ და შეიცნო ელკანამ ხანა, თავისი ცოლი, და მოხედა უფალმა ხანას.

²⁰დაორსულდა ხანა, შვა ვაჟი და სახელად სამუელი უწოდა, რადგან ამბობდა ის: უფალს გამოვთხოვეო იგი.

²¹წავიდა მისი ქმარი ელკანა მთელი თავისი სახლეულითურთ უფლისადმი ყოველწლიური მსხვერპლის შესაწირად და თავისი აღთქმის აღსასრულებლად.

²²მაგრამ ხანა არ წასულა, რადგან უთხრა თავის ქმარს: „როცა ბავშვს ძუძუს მოვწყვეტ, მაშინ წავიყვან, და წარსდგება ის უფლის წინაშე და სამუდამოდ იქ დარჩება.“

²³მიუგო ელკანამ, მისმა ქმარმა, და უთხრა: „ისე გააკეთე, როგორც გენებოს. დარჩი, ვიდრე ძუძუს მოსწყვეტდე, რადგან აგისრულა უფალმა თავისი სიტყვა.“ დარჩა ცოლი და ძუძუს აწოვებდა ბავშვს, სანამ არ მოსწყვიტა.

²⁴როცა ძუძუს მოსწყვიტა, წაიყვანა იგი უფლის სახლში, შილოში. თან ერთი სამწლიანი ზვარაკი, ერთი ეფა ფქვილი და ერთი ტიკი ღვინო წაიტანა; და მივიდა უფლის სახლში – შილოში; ჯერ ჩვილი იყო ყმაწვილი.

²⁵დაკლეს ზვარაკი და მიუყვანეს ყელის ყმაწვილი.

²⁶მიესალმა ქალი ყელი მღვდელს: „იცოცხლე, ჩემო ბატონო! მე ის ქალი ვარ, აქ რომ ვიდექი შენს ახლოს და უფალს ვევედრებოდი.

²⁷ამ ყმაწვილის გამო ვევედრებოდი და აჰა, ამისრულა უფალმა, რასაც ვთხოვდი.

²⁸ამიტომაც უფალს ვაძლევ მას, რათა მას ემსახუროს მთელი მისი სიცოცხლე.“ და თაყვანი სცა იქ უფალს.