Read სბს–2013 1 მეფეთა 10 Bible Online

1 მეფეთა 10 - სბს–2013 bible

1 მეფეთა 10

¹აიღო სამუელმა ზეთის ჭურჭელი, თავზე დაასხა საულს, ეამბორა და უთხრა: „აჰა, გცხო უფალმა თავისი სამკვიდროს მთავრად.

²ახლა, როცა ჩემგან წახვალ, ორ კაცს შეხვდები რახელის საფლავთან, ბენიამინის საზღვრებში რომ არის, ცელცახში, რომლებიც გეტყვიან: ‘იპოვნეს ვირები, რომლების საძებრადაც შენ წახვედი. აჰა, დაავიწყდა მამაშენს ვირები და შენზე დარდობს: რა ვუყო ჩემ შვილსო?’

³და როცა გასცდები ამ ადგილს და თაბორის მუხასთან მიხვალ, იქ შემოგხვდება ბეთელისკენ ღმერთთან მიმავალი სამი კაცი. ერთს სამი თიკანი მიჰყავს, მეორეს სამი პური მიაქვს, მესამეს – ტიკით ღვინო.

⁴მშვიდობით მოგიკითხავენ და ორ პურს შემოგთავაზებენ, რომლებიც უნდა მიიღო მათი ხელიდან.

⁵ამის შემდეგ გიბეყათ-ელოჰიმზე ახვალ, სადაც ფილისტიმელთა სადარაჯოებია. ქალაქში შესვლისას გორაკიდან ჩამომავალი წინასწარმეტყველთა გუნდი შემოგხვდება, რომელთაც წინ მოუძღვებიან ქნარის, დაფდაფის, სტვირისა და ებნის დაკვრით, თავად კი ქადაგებენ.

⁶უფლის სული გადმოვა შენზე და მათთან ერთად გაქადაგდები, სხვა კაცად გადაიქცევი.

⁷როცა ყველა ეს ნიშნები აგიცხადდება, ისე მოიქეცი, როგორც მოახერხებ, რადგან ღმერთია შენთან.

⁸ჩემზე წინ უნდა ჩახვიდე გილგალში და მეც მალე ჩამოვალ შენთან, რათა შევწირო სრულადდასაწველი მსხვერპლი და სამშვიდობო მსხვერპლი. შვიდ დღეს მელოდე, ვიდრე არ მოვალ შენთან და არ გაუწყებ, რაც უნდა გააკეთო.“

⁹როგორც კი გატრიალდა საული სამუელისაგან წასასვლელად, სხვა გული ჩაუდო მას ღმერთმა და ყველა ნიშანი აუცხადდა იმავე დღეს.

¹⁰ბორცვზე ასვლისას გამოემართა მისკენ წინასწარმეტყველთა გუნდი. გადმოვიდა მასზე ღვთის სული და ისიც მათთან ერთად აქადაგდა.

¹¹ყველა, ვინც მანამდე იცნობდა მას და ხედავდა ქადაგად დაცემულს, ამბობდა: „რა დაემართა კიშის ძეს? ნუთუ საულიც გაქადაგდა?“

¹²თქვა პასუხად ერთმა იქაურმა კაცმა: „ვინ არის მათი მამა?“ ასე გაჩნდა გამოთქმა: „ნუთუ საულიც გაქადაგდა?“

¹³როცა გაასრულა ქადაგება, გორაკზე ავიდა.

¹⁴ჰკითხა საულის ბიძამ მას და მის მსახურს: „სად იარეთ?“ მათ მიუგს: „ვირების საძებნელად; და როცა იმედი გადავიწყვიტეთ, რომ ვერ ვიპოვნიდით, სამუელთან წავედით.“

¹⁵და თქვა საულის ბიძამ: „მომიყევი, რა გითხრათ სამუელმა.“

¹⁶უთხრა საულმა თავის ბიძას: „გამოგვიცხადა, იპოვნესო ვირები.“ ხოლო მეფობის ამბავი, სამუელმა რომ უთხრა, არ გაუმხელია მისთვის.

¹⁷მოუხმო სამუელმა ხალხს უფალთან მიცფაში

¹⁸და უთხრა ისრაელიანთ: „ასე ამბობს უფალი, ღმერთი ისრაელისა: ‘მე გამოვიყვანე ისრაელი ეგვიპტიდან, მე გიხსენით ეგვიპტელთა ხელიდან და ყველა სამეფოს ხელიდან, რომელიც კი გჩაგრავდათ;’

¹⁹თქვენ კი დღეს უარყოფთ თქვენს ღმერთს, რომელმაც გიხსნათ ყველა უბედურებისა და გასაჭირისგან, რადგან ეუბნებით: მეფე დაგვისვიო! აბა, დადექით უფლის წინაშე თქვენ-თქვენი ტომებისა და საგვარეულოების მიხედვით.“

²⁰როცა სამუელმა უბრძანა ისრაელის ყველა ტომს სათითაოდ მოახლოება, ბენიამინის ტომს ხვდა წილი მისასვლელად.

²¹და როცა ბენიამინის ტომს უბრძანა მისვლა საგვარეულოების მიხედვით, მატრის საგვარეულოს ხვდა წილი; და როცა მატრის საგვარეულოს უბრძანა მიახლოება კაცით-კაცამდე, საულს, კიშის ძეს ხვდა წილი. დაუწყეს ძებნა და ვერ იპოვეს.

²²კვლავ შეეკითხნენ უფალს: „კიდევ დარჩა კაცი მოსასვლელი?“ თქვა უფალმა: „აჰა, აღალს ეფარება.“

²³გაიქცნენ და გამოიყვანეს იქიდან. და როცა ის ხალხში ჩადგა, ერთი თავით მაღალი იყო სხვებზე.

²⁴და უთხრა სამუელმა მთელ ხალხს: „ხომ ხედავთ, ვინ აირჩია უფალმა? რადგან მთელს ხალხში არავინაა მისი მსგავსი.“ და შესძახა ხალხმა: „დღეგრძელი იყოს მეფე!“

²⁵გამოუცხადა სამუელმა ხალხს მეფის უფლებები და ჩაწერა წიგნში და უფლის წინაშე დადო. მერე დაითხოვა სამუელმა ხალხი, ყოველი მათგანი თავ-თავის სახლში.

²⁶საულიც წავიდა თავისი სახლისაკენ, გიბეყაში. მას თან გაჰყვა მამაცი ხალხი, რომელთა გულებსაც ღმერთი შეეხო.

²⁷ხოლო უმაქნისი ხალხი კი ამბობდა: ეგ ჩვენ როგორ გვიხსნისო? და შეიძულეს იგი და ძღვენი არ მიართვეს. საული კი თითქოს ვერაფერს ამჩნევდა.