Read სბს–2013 1 მეფეთა 13 Bible Online

1 მეფეთა 13 - სბს–2013 bible

1 მეფეთა 13

¹საული იყო ... წლისა, როცა გამეფდა და ... წელი მეფობდა ისრაელზე.

²გამოარჩია საულმა თავისთვის ისრაელში 3 ათასი კაცი. 2 ათასი საულთან დადგა მიქმაშში და ბეთელის მთაზე, ათასი კაცი კი იონათანთან – ბენიამინის გიბეყაში. დანარჩენი ხალხი კი თავ-თავის კარვებში გაუშვა.

³გაიგეს ფილისტიმელებმა, რომ იონათანმა გაანადგურა გებაყში მდგარი ფილისტიმელი მეციხოვნენი. საულმა ბრძანა, ბუკი დაებერათ მთელს ქვეყანაში და გამოეცხადებინათ: ისმინონო ებრაელთ!

⁴და გაიგო მთელმა ისრაელმა, რომ გაანადგურა საულმა ფილისტიმელთა მეციხოვნენი, და მტრად ექცა ისრაელი ფილისტიმელთ, და შეიყარა მთელი ხალხი საულთან გილგალში.

⁵და შეიკრიბნენ ფილისტიმელები ისრაელის წინააღმდეგ საომრად – 30 ათასი საომარი ეტლი, 6 ათასი ცხენოსანი და ზღვის ქვიშასავით ურიცხვი ფეხოსანი; ამოვიდნენ ისინი და ბეთ-ავენის აღმოსავლეთით, მიქმაშში დაბანაკდნენ.

⁶როცა დაინახეს ისრაელიანთ, რომ გაუჭირდათ – რადგან ხალხი ძლიერ შეშინებული იყო, – მიიმალნენ მღვიმეებში, კლდის ნაპრალებში, კლდის ნახეთქებში, ორმოებსა და ჯურღმულებში.

⁷ზოგი ებრაელი იორდანეს გაღმა გადავიდა გადისა და გალაადის მხარეში. საული კი ჯერ ისევ გილგალში იყო; და მთელი ხალხი, ვინც მას გაჰყვა, დამფრთხალი იყო.

⁸შვიდ დღეს იცადა მან, სამუელის მიერ დათქმულ ვადამდე, მაგრამ არ მოდიოდა სამუელი გილგალში, ხალხი კი ეფანტებოდა.

⁹და თქვა საულმა: „მომიყვანეთ სრულადდასაწველი და სამშვიდობო მსხვერპლი!“ და აღავლინა სრულადდასაწველი.

¹⁰ის იყო დაასრულა სრულადდასაწველის აღვლენა, და აჰა, სამუელიც მოვიდა. გამოვიდა საული მის შესახვედრად და მისასალმებლად.

¹¹სამუელმა კი უთხრა: „ეგ რა ჰქენი?“ მიუგო საულმა: „დავინახე, რომ მეფანტებოდა ხალხი და შენც არ მოხვედი დათქმულ დროზე, ფილისტიმელები კი მიქმაშში არიან შეკრებილნი;

¹²ვიფიქრე, ახლა დამესხმებიან ფილისტიმელები გილგალში, მე კი ჯერ არ შევვედრებივარ-მეთქი უფალს; თავს ვიკავებდი, მაგრამ მაინც აღვავლინე სრულადდასაწველი.“

¹³უთხრა სამუელმა საულს: „უგუნურად მოქცეულხარ, რომ არ დაიცავი უფლის, შენი ღმერთის ბრძანება; რაც მან გიბრძანა, არ შეასრულე; უფალი ხომ უკუნისამდე განამტკიცებდა შენს მეფობას ისრაელზე.

¹⁴ამიერიდან ვეღარ გაძლებს შენი მეფობა; გამოძებნის უფალი თავისი გულის სასურველ კაცს და თავისი ხალხის წინამძღოლობას უბრძანებს, რაკი უფალის ნაბრძანები არ დაიცავი.“

¹⁵ადგა სამუელი და წავიდა გილგალიდან ბენიამინის გიბეყაში. და დაითვალა საულმა თავისთან მყოფი ხალხი – ექვსასამდე კაცი.

¹⁶საული და მისი ძე – იონათანი და მათთან მყოფი ხალხი ბენიამინის გებაყში დადგნენ, ფილისტიმელები კი მიქმაშში დაბანაკდნენ.

¹⁷გამოვიდა ფილისტიმელთა ბანაკიდან ქვეყნის დასარბევად სამი რაზმი. ერთი ყოფრას გზაზე გაემართა, შუყალის ქვეყნისკენ,

¹⁸მეორე რაზმი ბეთ-ხორონის გზას დაადგა, მესამე – ცებოყიმის ველისკენ მიმავალ გზას, უდაბნოზე რომ გადის.

¹⁹მჭედელი აღარ იყო მთელს ისრაელის ქვეყანაში, რადგან ფილისტიმელებს ეშინოდათ, ებრაელებმა მახვილები ან შუბები არ გაიკეთონო.

²⁰ამიტომ მთელი ისრაელი ფილისტიმელებთან ჩადიოდა, თუკი ვინმეს სახნისი, თოხი, ცული ან ნამგალი ჰქონდა გამოსაკვერი.

²¹ორი მესამედი შეკელი ღირდა სახნისის, თოხის, ცულის ან ნამგლის ალესვა.

²²როცა ბრძოლის დრო დადგა, არ აღმოაჩნდათ საულისა და იონათანის თანამდგომ ხალხს მახვილები და შუბები. მხოლოდ საულსა და მის ძეს – იონათანს აღმოაჩნდათ.

²³და გაემართა ფილისტიმელთა მოწინავე რაზმი მიქმაშის ვიწრო გზებისაკენ.