Read სბს–2013 1 მეფეთა 15 Bible Online

1 მეფეთა 15 - სბს–2013 bible

1 მეფეთა 15

¹და უთხრა სამუელმა საულს: „უფალმა გამომაგზავნა, რომ მისი ერის, ისრაელის მეფედ მეცხე. ახლა ისმინე უფლის სიტყვები.

²ასე ამბობს ცაბაოთ უფალი: ‘გავიხსენე, რაც ყამალეკმა გაუკეთა ეგვიპტიდან გზადმომავალ ისრაელიანთ.

³ახლა წადი და დაეცი ყამალეკს და გაუნადგურე მთელი სარჩო-საბადებელი. ნუ დაინდობ, გაწყვიტე კაცი და ქალი, ყრმა და ძუძუთა ბავშვი, ხარი და ცხვარი, აქლემი და სახედარი.’“

⁴და შეჰყარა საულმა ხალხი, და აღრიცხა ტელაიმში – 200 ათასი ქვეითი და 10 ათასი იუდას ტომისა.

⁵მიადგა საული ყამალეკის ქალაქს და ხევში ჩასაფრდა.

⁶და უთხრა საულმა კენელებს: „ადექით და განუდექით, გამოეყავით ყამალეკელებს, რომ მათთან ერთად თქვენც არ გაგანადგუროთ, რადგან სწყალობდით ეგვიპტიდან გამომავალ მთელს ისრაელს.“ და განუდგნენ კენიელები ყამალეკს.

⁷და დაეცა საული ყამალეკს და სდია ხავილადან შურამდე, ეგვიპტის აღმოსავლეთით რომ არის.

⁸და ცოცხლად შეიპყრო აგაგი, ყამალეკის მეფე, მთელი ხალხი კი მახვილის პირით მოსპო.

⁹დაინდეს საულმა და მისმა ხალხმა აგაგი, რჩეული ცხვარ-ძროხა, ბაღ-ვენახები, და ყველაფერი, რაც საუკეთესო იყო, და რისი განადგურებაც არ მოინდომეს. ყველაფერი უვარგისი და ცუდი კი გაანადგურეს.

¹⁰და იყო უფლის სიტყვა სამუელის მიმართ ნათქვამი:

¹¹„ვნანობ, რომ გავამეფე საული, რადგან განმიდგა და აღარ ასრულებს ჩემს სიტყვებს.“ და დამწუხრდა სამუელი და მთელი ღამე შეჰღაღადებდა უფალს.

¹²და ადგა დილაადრიანად სამუელი საულთან შესახვედრად. და ეუწყა სამუელს, რომ საული ქარმელში ყოფილა, იქ სვეტი აღუმართავს თავისთვის, და იქიდან გამობრუნებული გილგალში ჩასულა.

¹³მივიდა სამუელი საულთან და უთხრა მას საულმა: „კურთხეული ხარ უფლისაგან! მე აღვასრულე უფლის სიტყვა.“

¹⁴და თქვა სამუელმა: „რა არის? ცხვრის ბღავილი და ძროხის ზმუილი ყურში რომ ჩამესმის?“

¹⁵და მიუგო საულმა: „ყამალეკისგან წამოასხეს, რადგან დაინდო ხალხმა რჩეული ცხვარი და ძროხა, რომ უფლის, შენი ღმერთისთვის შეეწირათ. დანარჩენი გავანადგურეთ.“

¹⁶და უთხრა სამუელმა საულს: „მათქმევინე, რაც უფალმა მითხრა წუხელ.“ და უთხრა საულმა მას: ილაპარაკეო.

¹⁷და თქვა სამუელმა: „მაშინაც ხომ უღირსად მიგაჩნდა თავი, როცა ისრაელის ტომთა მეთაური გახდი და ისრაელის მეფედ გცხო უფალმა?

¹⁸დაგაყენა გზაზე უფალმა და გითხრა: ‘წადი და დაარისხე შემცოდე ყამალეკი. ებრძოლე მას, ვიდრე ბოლოს არ მოუღებ!’

¹⁹რად არ შეისმინე უფლის ხმა, რატომ დაიტაცეთ ნადავლი და ჩაიდინე ბოროტება უფლის თვალში?“

²⁰და უთხრა საულმა სამუელს: „მე დავმორჩილდი უფლის ხმას და წავედი იმ გზით, რომელზეც დამაყენა უფალმა. მოვიყვანე აგაგი, ყამალეკის მეფე, ხოლო ყამალეკი გავანადგურე.

²¹ხალხმა წამოასხა ნადავლიდან ცხვარი და ძროხა, დარისხებულის საუკეთესო ნაწილი, რომ უფლისთვის, შენი ღმერთისთვის შეეწირა მსხვერპლად გილგალში“

²²და თქვა სამუელმა: „ნუთუ სრულადდასაწველნი და მსხვერპლები ისევე ეამება უფალს, როგორც მოსმენა მისი სიტყვისა? მოსმენა მსხვერპლებზე უკეთესია და მორჩილება – ვერძის ლურთებზე.

²³რადგან ერთი ცოდვაა მისნობა და ურჩობა; ერთი ცოდვაა კერპთაყვანისმცემლობა და სიჯიუტე. რაკიღა მოიძულე უფლის სიტყვა, ისიც მოიძულებს შენს მეფობას.“

²⁴უთხრა საულმა სამუელს: „შევცოდე, რომ განვერიდე უფლის სახეს და გადავუხვიე შენს სიტყვას, რადგან ხალხის შემეშინდა და მის ხმას გავუგონე.

²⁵ახლა შემინდე ჩემი ცოდვა და დაბრუნდი ჩემთან ერთად, რომ თაყვანი ვცე უფალს.“

²⁶და უთხრა სამუელმა საულს: „არ დავბრუნდები შენთან ერთად, რადგან შეიძულე უფლის სიტყვა და უფალმაც მოგიძულა ისრაელის მეფედ.“

²⁷შებრუნდა სამუელი წასასვლელად და მოეჭიდა საული მისი მოსასხამის კალთას და გაიგლიჯა ის.

²⁸და უთხრა მას სამუელმა: „გამოგგლიჯა დღეს უფალმა ისრაელის მეფობა და მისცა იგი შენს თვისტომს, შენზე უკეთესს.

²⁹და არ იცრუებს ისრაელის დიდება და არ გადაიფიქრებს, რადგან ადამიანი არ არის ის, რომ გადაიფიქროს.“

³⁰და თქვა საულმა: „შევცოდე. ახლა ჩემი ერის უხუცესთა და ისრაელის წინაშე მაინც დამდე პატივი და დაბრუნდი ჩემთან ერთად, რომ თაყვანი ვცე უფალს, შენს ღმერთს.“

³¹და გაჰყვა სამუელი საულს და თაყვანი სცა საულმა უფალს.

³²და თქვა სამუელმა: „მომიყვანეთ აგაგი, ყამალეკის მეფე.“ მოვიდა მასთან შებორკილი აგაგი. და იფიქრა აგაგმა: ნამდვილად ამცდა მწარე სიკვდილიო.

³³მაგრამ სამუელმა უთხრა: „როგორც უშვილოდ დატოვა შენმა მახვილმა ქალები, ასევე უშვილო დარჩება დედაშენი ქალთა შორის!“ და აჩეხა აგაგი სამუელმა გილგალში უფლის წინაშე.

³⁴და წავიდა სამუელი რამას, საული კი თავის სახლში დაბრუნდა, საულის გიბეყაში.

³⁵და აღარ უნახავს სამუელს საული თავისი დარჩენილი სიცოცხლის დღეებში, მაგრამ წუხდა კი მასზე. უფალიც ნანობდა, საული რომ გაამეფა ისრაელზე.