Read სბს–2013 1 მეფეთა 18 Bible Online

1 მეფეთა 18 - სბს–2013 bible

1 მეფეთა 18

¹და როცა დავითმა დაამთავრა საულთან ლაპარაკი, შეეკრა იონათანის სული მის სულს, და შეიყვარა იგი იონათანმა, როგორც თავისი საკუთარი სული.

²და წაიყვანა იმ დღეს იგი საულმა და არ დაანება მამის სახლში დაბრუნება.

³და შეკრა იონათანმა დავითთან კავშირი, რადგან შეიყვარა იგი, როგორც თავისი საკუთარი სული.

⁴და განიძარცვა იონათანმა თავისი მოსასხამი და მისცა დავითს; მისცა აგრეთვე თავისი ჯაჭვ-ჭური, თავისი მახვილი და თავისი მშვილდ-კაპარჭი, და მთელი თავისი საჭურველი თავისი სარტყლიანად.

⁵გონივრულად იქცეოდა დავითი ყველგან, სადაც კი გააგზავნიდა მას საული. და დაადგინა იგი საულმა ლაშქრის მეთაურად და ყველას მოეწონა ეს ამბავი – ხალხსაც და საულის მსახურებსაც.

⁶და როცა ისინი და დავითი ფილისტიმელის დამარცხების შემდეგ შინ ბრუნდებოდნენ, გამოდიოდნენ ქალები ისრაელის ყველა ქალაქიდან საულ მეფის მისაგებებლად სიმღერითა და როკვით, დაფდაფებითა და მხიარული შეძახილებით.

⁷სიმღერით გაჰყვიროდნენ მხიარული ქალები და ამბობდნენ: „შემუსრა საულმა ათასები, დავითმა – 10 ათასები!“

⁸და ძალიან განაწყენდა საული, არ მოეწონა ეს სიტყვები, და თქვა: „დავითს 10 ათასები მისცეს, მე კი – ათასები, მეფობაღა აკლია!“

⁹და იმ დღიდან მოყოლებული ალმაცერად უყურებდა საული დავითს ბოლომდე.

¹⁰მეორე დღეს დაეცა საულს ბოროტი სული ღვთისაგან და გაშმაგდა იგი თავის სახლში. დავითი კი, ჩვეულებრივ, ქნარზე უკრავდა; საულს შუბი ეპყრა ხელთ.

¹¹და ესროლა საულმა შუბი დავითს, იფიქრა, კედელს მივაგმირავო, მაგრამ ორგზის გაუსხლტა მას დავითი.

¹²და დაუშინდა საული დავითს, რადგან უფალი იყო დავითთან, მას კი განეშორა.

¹³და განიშორა საულმა დავითი და დაადგინა იგი ათასისთავად. და გამოდიოდა და შედიოდა იგი ხალხის წინაშე.

¹⁴ჭკვიანურად წარმართავდა თავის საქმეებს დავითი, და უფალი იყო მასთან.

¹⁵და ხედავდა საული, რომ ძალზედ გონიერი იყო დავითი, და ეშინოდა მისი.

¹⁶მთელს ისრაელსა და იუდას უყვარდა დავითი, რადგან გამოდიოდა და შედიოდა მათ წინაშე.

¹⁷და უთხრა საულმა დავითს: „აჰა, ჩემი უფროსი ასული – მერაბი მინდა ცოლად მოგცე, ოღონდ მამაცად მეყოლე და გადაიხადე უფლის ომები.“ საული ფიქრობდა, ჩემს ხელს არ ავღმართავ მის წინააღმდეგ, დაე, ფილისტიმელთა ხელი იყოს მასზეო.

¹⁸და უთხრა დავითმა საულს: „ვინ ვარ მე? და რას წარმოადგენს ჩემი მოდგმა – მამაჩემის გვარი – ისრაელში, რომ მეფის სიძე გავხდე?“

¹⁹მაგრამ როცა დადგა დრო, როდესაც საულის ასული – მერაბი დავითისთვის უნდა მიეთხოვებინათ, მეხოლათელ ყადრიელს გააყოლეს.

²⁰და შეუყვარდა დავითი მიქალს, საულის ასულს. და როცა ამცნეს საულს, მოეწონა მას ეს ამბავი.

²¹და თქვა საულმა: „მივათხოვებ, რომ მახედ ექცეს მას და მისწვდეს ფილისტიმელთა ხელი.“ უთხრა საულმა დავითს: „მეორეთი დამესიძები მე დღეს.“

²²და უბრძანა საულმა თავის მსახურთ: „საიდუმლოდ ჩააგონეთ დავითს და უთხარით, მოსწონხარ მეფეს და მის მსახურებსაც უყვარხარ, დაესიძე-თქო მეფეს.“

²³და მიიტანეს საულის მსახურებმა დავითის ყურამდე ეს სიტყვები. და თქვა დავითმა: „ადვილი გგონიათ მეფის სიძეობა? მე ერთი უპოვარი და უბირი კაცი ვარ.“

²⁴და აცნობეს მისმა მსახურებმა საულს: ასე ლაპარაკობსო დავითი.

²⁵და თქვა საულმა: „ასე უთხარით დავითს, სხვა ურვადი არ სურს-თქო მეფეს, გარდა ფილისტიმელთა 100 ჩუჩისა, რათა შური მიეგოთ მეფის მტრებს.“ რადგან საული ფიქრობდა, რომ დავითი ფილისტიმელთა ხელით დაეცემოდა.

²⁶და აცნობეს საულის მსახურებმა დავითს ეს სიტყვები და მოეწონა დავითს, მეფის სიძე რომ უნდა გამხდარიყო.

²⁷ჯერ დათქმული დრო არ გასულიყო, რომ ადგა დავითი და წავიდა თავის კაცებთან ერთად, და მოსრა 200 ფილისტიმელი. და მოიტანა დავითმა მათი ჩუჩები და სრულად ჩააბარა მეფეს, რათა გამხდარიყო მეფის სიძე. მაშინ მიათხოვა საულმა მიქალი, თავისი ასული ცოლად.

²⁸და დაინახა საულმა და მიხვდა, რომ უფალი იყო დავითთან. და უყვარდა იგი მიქალს, საულის ასულს.

²⁹და კიდევ უფრო შეეშინდა საულს დავითისა და სამუდამო მტრად გადაეკიდა.

³⁰გამოდიოდნენ ფილისტიმელთა სარდლები საომრად, და როცა კი გამოვიდოდნენ, დავითი საულის ყველა მსახურზე გონივრულად იქცეოდა, და დიდად განითქვა მისი სახელი.