Read სბს–2013 1 მეფეთა 2 Bible Online

1 მეფეთა 2 - სბს–2013 bible

1 მეფეთა 2

¹ლოცულობდა ხანა და ამბობდა: „ხარობს ჩემი გული უფალში; გავძლიერდი ჩემს ღმერთში; ხმა ავიმაღლე ჩემი მტრების წინააღმდეგ, რადგან გავიხარე შენი შეწევნით.

²არავინ არის უფალივით წმიდა; რადგან არავინაა შენს გარდა; და არ არის ჩვენი ღმერთივით მყარი კლდე.

³ვეღარ ილაპარაკებთ მედიდურად და აღარ გამოვა თავხედური სიტყვები თქვენი ბაგეებიდან, რადგან უფალი არის ყოვლისმცოდნე ღმერთი, ის განსჯის ყოველ საქმეს.

⁴ძლიერთა მშვილდი დალეწილია, უძლურნი ძალას შემოისარტყლავენ.

⁵მაძღარნი პურისათვის საშოვარზე დადიან, მშიერნი კი აღარ შიმშილობენ; ბერწმა შვიდი შვა, მრავალშვილიანი კი ჩამოჭკნა.

⁶უფალი მოაკვდინებს და უფალი აცოცხლებს; შავეთში ჩაყვანაცა და ამოყვანაც მის ხელთ არის.

⁷უფალი აღატაკებს და ამდიდრებს; დაამდაბლებს და აღამაღლებს;

⁸გლახაკს მიწა-მტვრიდან წამოაყენებს, უპოვარს სანაგვიდან აღამაღლებს, რათა დიდებულთა გვერდით დასვას; დიდების ტახტს დაუმკვიდრებს მათ, რადგან უფლისაა დედამიწის საფუძვლები და სამყარო მათზე დაამყარა.

⁹ღვთისმოსავთა ნაბიჯებს იცავს, უკეთურები ბნელში ინთქმებიან, რადგან საკუთარი ძალით ვერ მაგრობს კაცი.

¹⁰უფალი შემუსრავს თავის მოწინააღმდეგეთ და მეხად დაატყდება მათ. უფალი განსჯის ქვეყნის კიდეებს და თავის მეფეს ძალას შემატებს, და თავის ცხებულს ძლიერებით შემოსავს.“

¹¹წავიდა ელკანა რამათს, თავის სახლში, ყმაწვილი კი უფალს ემსახურებოდა ყელი მღვდლის წინაშე.

¹²ხოლო უღირსები იყვნენ ყელის ვაჟები: არ ცნობდნენ უფალს

¹³და არც მღვდლობის მოვალეობას ხალხის წინაშე. როცა კი ვინმე მსხვერპლს შესწირავდა, მოვიდოდა ხორცის ხარშვისას მღვდლის ბიჭი სამკაპით ხელში,

¹⁴ჩაჰკრავდა ავაზანში ან ქვაბში, ან კოჭობში, ან კარდალში და ყველაფერი, რაც ჩანგალს ამოჰყვებოდა, მღვდელს მიჰქონდა. ასე ექცეოდნენ მთელს ისრაელს, შილოში ყველა მიმსვლელს.

¹⁵უფრო მეტიც: ქონის დაწვამდეც მოდიოდა მღვდლის ბიჭი და ეუბნებოდა მსხვერპლის მომტანს: „შესაწვავი ხორცი მომეცი მღვდლისთვის, უმი, რადგან მოხარშულს არ მიიღებს.“

¹⁶თუ ეტყოდა ვინმე: ქონს აკმევენ და მერე წაიღე, რაც გენებოსო, მიუგებდა: „არა, ახლა მომეცი, თორემ წაგართმევ.“

¹⁷ძალზე დიდი იყო ამ ყმაწვილების ცოდვა უფლის წინაშე, რადგან ბილწავდნენ ისინი უფლის ძღვენს.

¹⁸სამუელი კი მსახურებდა უფლის წინაშე; და ბიჭუნას სელის ეფოდი ემოსა.

¹⁹სამუელს პატარა წამოსასხამს უქსოვდა ხოლმე დედა და ამოჰქონდა, როცა ქმართან ერთად მსხვერპლის შესაწირად ამოდიოდა ყოველწლიურად.

²⁰აკურთხა ყელიმ ელკანა და მისი ცოლი და უთხრა: „უფალი მოგცემს ამ ქალისგან შთამომავლობას აღთქმულის სანაცვლოდ, რომელიც შენ აღუთქვი უფალს.“ და შემდეგ ისინი შინ დაბრუნდნენ.

²¹მოხედა უფალმა ხანას: დაორსულდა იგი და კიდევ შვა სამი ვაჟი და ორი ასული. ყრმა სამუელი კი უფალთან იზრდებოდა.

²²ძალზე მოხუცი იყო ყელი. ესმოდა ყველაფერი: როგორ ექცეოდნენ მისი შვილები მთელს ისრაელს, რომ წვებოდნენ იმ ქალებთან, რომლებიც საკრებულო კარვის კართან მსახურებისთვის იკრიბებოდნენ.

²³იგი ეუბნებოდა მათ: „რატომ აკეთებთ ამას? ხალხისგან ხმები მომდის თქვენს უკეთურ საქციელზე;

²⁴ნუ იზამთ, შვილებო! კარგი არ მესმის თქვენზე; უფლის ერს გზიდან აცდენთ.

²⁵თუ კაცმა კაცს შესცოდა, შეევედრებიან ღმერთს ცოდვილისთვის, თუ უფალს შესცოდა კაცმა, ვიღას შეევედრება?“ არ ისმინეს მამის სიტყვა, რადგან უფალმა ინება მათი დაღუპვა.

²⁶ყრმა სამუელი კი იზრდებოდა და მადლი ემატებოდა უფლისა და ხალხის წინაშე.

²⁷მივიდა ერთი ღვთისკაცი ყელისთან და უთხრა: „ასე ამბობს უფალი: ‘განა მე არ გამოვეცხადე მამაშენის სახლს ეგვიპტეში, ფარაონის სახლში ყოფნისას?

²⁸დიახ, ის გამოვარჩიე ისრაელის ყველა შტოდან ჩემს მღვდლად, რომ ასულიყო ჩემს სამსხვერპლოზე საკმევლის საკმევად, ჩემს წინაშე ეფოდის სატარებლად. მე განვუკუთვნე მამაშენის სახლს ისრაელიანთა მთელი საცეცხლო მსხვერპლი;

²⁹ასე გაბოროტებით ფეხით რატომ თელავთ ჩემს მსხვერპლსა და შესაწირავს, მე რომ დავაწესე? რატომ ამჯობინე ჩემს თავს შენი შვილები, რომ სუქდებით ისრაელის, ჩემი ერის შესაწირავის საუკეთესო ნაჭრებით?’

³⁰ამიტომ ამბობს უფალი, ისრაელის ღმერთი: ‘ნათქვამი მქონდა, რომ უკუნისამდე ივლიდა ჩემს წინაშე შენი სახლი და მამაშენის სახლი. ამიერიდან კი,’ – ამბობს უფალი, – ‘არამც და არამც, რადგან ჩემს მადიდებელს განვადიდებ, ჩემი მოძულენი კი დამცირდებიან.

³¹აჰა, მოაწევს ჟამი და უნდა მოვკვეთო შენი ძალა და მამაშენის სახლის ძალა ისე, რომ მოხუცებული აღარ დარჩეს შენს სახლში.

³²და დაინახავ შენს მოდავეს საწმიდარში, მიუხედავად იმ სიკეთისა, რაც ისრაელში მოხდება, და შენს სახლში მოხუცებული აღარასოდეს იქნება.

³³ყველას არ მოგიკვეთთ ჩემი სამსხვერპლოდან, რომ თვალები გევსებოდეს და სული გიწუხდეს; მაგრამ შენი სახლის მთელი ნამატი გაწყდება დავაჟკაცების ასაკში.

³⁴აჰა, ნიშანი, რომელიც აღსრულდება შენს ორ ძეზე – ხოფნიზე და ფინეხასზე – ერთ დღეს დაიხოცებიან ორივენი.

³⁵დავიდგენ ჩემთვის სარწმუნო მღვდელს, რომელიც იმას გააკეთებს, რაც ჩემს გულსა და სულშია. და მე მას ავუშენებ მტკიცე სახლს, რათა მუდამ ჩემი ცხებულის წინაშე დადიოდეს.

³⁶და მივა მასთან, ვინც შენს სახლში გადარჩება, და თაყვანს სცემს მას ერთი ვერცხლისა და პურის ნატეხისათვის, და ეტყვის: მომეცი სამღვდელო რამ სამსახური, რომ ლუკმა პური ვჭამოო.’“