Read სბს–2013 1 მეფეთა 21 Bible Online

1 მეფეთა 21 - სბს–2013 bible

1 მეფეთა 21

¹და მივიდა დავითი ნობში ახიმელექ მღვდელთან. შეშინებული გამოეგება ახიმელექი დავითს და უთხრა: „მარტო რატომ ხარ? რატომ არავინ გახლავს?“

²და მიუგო დავითმა ახიმელექ მღვდელს: „საქმე დამავალა მეფემ და მითხრა: არავინ იცოდეს, რა საქმეა, რაზედაც გაგზავნი და რასაც გავალებო. ამიტომაც ამა და ამ ადგილას დავიბარე ხალხი.

³და ახლა, რაც ხელთ გაქვს, მომეცი: ხუთიოდე პური, და თუ სხვაც რაიმე მოგეძიება.“

⁴და მიუგო აბიმელექმა დავითს და უთხრა: „ჩვეულებრივი პური არა მაქვს ახლა ხელთ, მხოლოდ წმიდა პური მაქვს. ოღონდ თუ ქალებს არ გაჰკარებიან ეს ჭაბუკები.“

⁵მიუგო დავითმა მღვდელს და უთხრა: „ქალები აკრძალული გვქონდა მას შემდეგ, რაც გზას ვადგავარ, და ჩემი მსახურების ჭურჭლებიც წმიდაა; ეგ პურიც სადაგად ჩაითვლება, რადგან დღეს ხომ ახალი უნდა იკურთხოს ჭურჭელში.“

⁶და მისცა მას მღვდელმა წმიდა პური, რადგან არ იყო იქ სხვა პური, გარდა საწინაშეო პურებისა, რომლებიც აელაგებინათ უფლის სახის წინაშე, რათა მათ ნაცვლად ახალი პურები დაეწყოთ.

⁷და იყო იქ იმ დღეს უფლის წინაშე საულის ერთი მსახურთაგანი, კაცი, სახელად დოეგი, ედომელი, საულის მწყემსების სარქალი.

⁸და უთხრა დავითმა ახიმელექს: „ხომ არ გაქვს აქ ხელთ შუბი ან მახვილი? რადგან არც მახვილი წამომიღია და არც სხვა რამ საჭურველი, ისე სასწრაფო იყო მეფის დავალება.“

⁹და უთხრა მღვდელმა: „იმ ფილისტიმელი გოლიათის მახვილია აქ, მუხის ველზე რომ დაამარცხე. აგერ დევს, ეფოდის უკან, მოსასხამში გახვეული. თუ წაღება გინდა, წაიღე, რადგან მის გარდა სხვა არაფერი გვაქვს.“ და თქვა დავითმა: „იმას არაფერი შეედრება, მომეცი.“

¹⁰და ადგა დავითი და გაიქცა იმ დღეს საულისგან, და მივიდა გათის მეფე აქიშთან.

¹¹უთხრეს აქიშის მსახურებმა მას: „ეს დავითი არ არის იმ ქვეყნის მეფე? ეს ის არ არის, რომელსაც როკვით უმღეროდნენ: საულმა სძლია ათასებს, დავითმა – 10 ათასებსო?“

¹²და გულში ჩაიდო დავითმა ეს სიტყვები და ძლიერ ეშინოდა აქიშისა, გათის მეფისა.

¹³სახე შეიშალა დავითმა მათ წინაშე, თავი მოიგიჟიანა: ალაყაფის კარებსა კაწრავდა და წვერებზე დუჟი ჩამოსდიოდა.

¹⁴და უთხრა აქიშმა თავის მსახურთ: „ხომ ხედავთ, რომ შეშლილია ეს კაცი, რისთვის მოიყვანეთ ჩემთან?

¹⁵შეშლილებიღა მაკლდნენ, რომ მოგეყვანათ და ეგიჟათ ჩემს წინაშე? ეს უნდა შემოსულიყო ჩემს სახლში?“

¹⁶და წავიდა იქიდან დავითი და ყადულამის მღვიმეს შეაფარა თავი. და გაიგეს ეს ამბავი მისმა ძმებმა და მამამისის მთელმა სახლმა და ჩავიდნენ მასთან.