Read სბს–2013 1 მეფეთა 28 Bible Online

1 მეფეთა 28 - სბს–2013 bible

1 მეფეთა 28

¹უთხრა დავითმა აქიშს: „კეთილი, ახლა ნახავ, რისი გაკეთება ძალუძს შენს მსახურს.“ და უთხრა აქიშმა დავითს: „ამიტომაც გნიშნავ ჩემს მცველად სამუდამოდ.“

²და მოკვდა სამუელი და დაიტირა იგი მთელმა ისრაელმა, და დამარხეს იგი რამაში, თავის ქალაქში. და მოსრა საულმა თავის ქვეყანაში ყოველი მესულთანე და მჩხიბავი.

³როცა შეიყარნენ ფილისტიმელები და მივიდნენ და შუნემში დაბანაკდნენ, საულმაც შეჰყარა მთელი ისრაელი და გილბოაყში დაიბანაკეს.

⁴როცა დაინახა საულმა ფილისტიმელთა ლაშქარი, შეეშინდა და ძლიერ შეუქანდა გული.

⁵და დაეკითხა უფალს საული, მაგრამ პასუხი არ გაუცია მისთვის უფალს არც სიზმრად, არც ურიმითა და არც წინასწარმეტყველთა პირით.

⁶და უთხრა საულმა თავის მსახურთ: „მომიძებნეთ ვინმე მესულთანე დედაკაცი, რათა მივიდე მასთან და ვამკითხვინო.“ და უთხრეს მსახურებმა: „აქ, ყენ-დორში არის მესალთუნე დედაკაცი.“

⁷სხვა სამოსელი გადაიცვა საულმა, რომ ვერ ეცნოთ მეფე, თან გაიყოლა ორი კაცი და მივიდა იმ დედაკაცთან ღამით, და უთხრა: „დაეკითხე გარდაცვლილთა სულებს და ამომიხმე, ვისაც გეტყვი.“

⁸და უთხრა დედაკაცმა: „კარგად უწყი, რაც გააკეთა საულმა, რომ მოსპო ამ ქვეყანაში მესულთანენი და მჩხიბავნი. მახეს რატომ მიგებ დასაღუპად?“

⁹უფალი დაუფიცა საულმა: „ცოცხალ ღმერთს გეფიცები, ავი არაფერი შეგემთხვევა ამ საქმისთვის.“

¹⁰და თქვა დედაკაცმა: „ვინ გამოგიხმო?“ უთხრა: „სამუელი გამომიხმე.“

¹¹და როცა დაინახა დედაკაცმა სამუელი, ხმამაღლა იყვირა და უთხრა საულს: „რისთვის მომატყუე? საული ხარ შენ!“

¹²და უთხრა მას მეფემ: „ნუ გეშინია! რას ხედავ?“ უთხრა დედაკაცმა: „ღმერთის მსგავსს ვხედავ, მიწიდან ამომავალს.“

¹³ჰკითხა: „როგორ გამოიყურება?“ თქვა: „მოხუცებული კაცია, ვინც ამოდის, გრძელი მოსასხამი ახვევია.“ მაშინ მიხვდა საული, რომ სამუელი იყო ის, და მიწაზე დაუკრა თავი და თაყვანი სცა.

¹⁴და უთხრა სამუელმა საულს: „რისთვის შემაწუხე? რატომ ამომიყვანე?“ და უთხრა საულმა: „ძალიან მიჭირს, ფილისტიმელები მებრძვიან, ღმერთი კი განმიდგა და პასუხს აღარ მაძლევს, არც წინასწარმეტყველთა პირით და არც სიზმრებში, ამიტომ გამოგიხმე, რომ მაუწყო, როგორ მოვიქცე.“

¹⁵და უთხრა სამუელმა: „მე რაღას მეკითხები, როცა უფალი განგიდგა და მტრად გექცა?

¹⁶ყველაფერს აგისრულებს უფალი, რაცა ბრძანა ჩემი პირით: ხელიდან წაგართმევს სამეფოს და მისცემს შენს მოყვასს – დავითს.

¹⁷რაკი არ ისმინე უფლის ხმა და არ აღასრულე უფლის რისხვა ყამალეკზე, ამიტომაც აღასრულებს დღეს უფალი შენზე თავის სიტყვას.

¹⁸და ისრაელსაც შენთან ერთად ჩააგდებს უფალი ფილისტიმელთა ხელში. ხვალ ჩემთან იქნებით შენცა და შენი შვილებიც. ისრაელის ბანაკსაც ჩააგდებს უფალი ფილისტიმელთა ხელში.“

¹⁹უცებ მთელი ტანით დაეცა მიწაზე საული, ძლიერ შეეშინდა სამუელის სიტყვებისა; ძალაც გამოლეული ჰქონდა, რადგან მთელი ის დღე და ის ღამე არაფერი ეჭამა.

²⁰და მივიდა დედაკაცი საულთან და როცა დაინახა, რომ ძლიერ იყო იგი შეშფოთებული, უთხრა: „აჰა, ისმინა შენი ხმა შენმა მხევალმა, ხიფათში ჩაიგდო თავი და შეასრულა შენი ბრძანება.

²¹ახლა შენც ისმინე შენი მხევლის ხმა: პურის ნაჭერს დაგიდებ წინ და შეჭამე, რომ გზაზე წასასვლელი ძალა მოგეცეს.“

²²იუარა საულმა და თქვა: „არ შევჭამ.“ და როცა არ მოეშვნენ მისი მსახურნი და დედაკაციც, დაჰყვა მათ ნებას. მიწიდან ადგა და საწოლზე ჩამოჯდა.

²³დედაკაცს სახლში ნასუქალი ხბო ჰყავდა, სასწრაფოდ დაკლა, ფქვილი აიღო, ცომი მოზილა, ხმიადები გამოაცხო

²⁴და წინ გაუშალა საულსა და მის მსახურთ. და როცა ჭამეს, ადგნენ და იმ ღამესვე წავიდნენ.

²⁵და შეჰყარეს ფილისტიმელებმა მთელი თავიანთი ლაშქარი აფეკში, ხოლო ისრაელმა იზრეყელის წყაროსთან დაიბანაკა.