Read სბს–2013 1 მეფეთა 3 Bible Online

1 მეფეთა 3 - სბს–2013 bible

1 მეფეთა 3

¹ყრმა სამუელი უფალს ემსახურებოდა ყელის წინაშე. იმ დღეებში იშვიათობას წარმოადგენდა უფლის სიტყვა. ხილვები არ იყო ხშირი.

²ერთხელ, როცა ყელი თავის ადგილზე იწვა – უკვე თვალები დასნეულებული ჰქონდა და ვეღარ ხედავდა.

³ღვთის სანთელი ჯერ არ ჩამწვარიყო. და სამუელი იწვა საწმიდარში, უფლის კიდობნის ახლოს.

⁴და დაუძახა უფალმა სამუელს. და გაეპასუხა ის: „აჰა, მე აქა ვარ!“

⁵და მიირბინა ყელისთან და უთხრა: „აჰა, მოვედი, რომ დამიძახე.“ ხოლო მან უთხრა: „არ დამიძახიხარ, წადი და დაიძინე.“ ისიც წავიდა და დაწვა.

⁶კვლავ მოუწოდა უფალმა: „სამუელ!“ ადგა სამუელი, მივიდა ყელისთან და უთხრა: „აჰა, მოვედი, რომ დამიძახე.“ ხოლო მან უთხრა: „არ დამიძახიხარ, შვილო, წადი და დაწექი.“

⁷ჯერ არ იცნობდა სამუელი უფალს, რადგან ჯერ არ გამოსცხადებოდა მას უფლის სიტყვა.

⁸მესამედ დაუძახა უფალმა სამუელს. ადგა ის, მივიდა ყელისთან და უთხრა: „აჰა, მოვედი, რომ დამიძახე.“ მიხვდა ყელი, რომ უფალი უხმობდა ყმაწვილს.

⁹და უთხრა ყელიმ სამუელს: „წადი და დაწექი. და თუ ის დაგიძახებს, ასე უპასუხე: მიბრძანე, უფალო, რადგან გისმენს-თქო შენი მსახური.“ წავიდა სამუელი და დაწვა თავის ადგილას.

¹⁰მოვიდა უფალი და დადგა, და კვლავ დაუძახა წეღანდელივით: „სამუელ, სამუელ!“ და უთხრა სამუელმა: „ბრძანე, რადგან გისმენს შენი მსახური!“

¹¹და უთხრა უფალმა სამუელს: „აჰა, ისეთ რამეს მოვახდენ ისრაელში, რომლის მსმენელსაც ყურები დაუყრუვდება.

¹²იმ დღეს აღვასრულებ ყელიზე ყველაფერს, რაც მისი სახლის წინააღმდეგ ვთქვი თავიდან ბოლომდე.

¹³ხომ გამოვუცხადე, რომ საუკუნოდ დავსჯიდი მის სახლს იმ უკეთურების გამო, რომლის შესახებაც მან იცოდა – უკეთურობდნენ მისი ძენი და მან არ ალაგმა ისინი.

¹⁴ამიტომაც დავუფიცე ყელის სახლს, არც მსხვერპლით და არც პურეულის ძღვენით არ გამოისყიდება-მეთქი უკუნისამდე მისი სახლის უკეთურება.“

¹⁵გათენებამდე იწვა სამუელი და მერე გააღო უფლის ტაძრის კარი. სამუელს ეშინოდა, რომ ყელისთვის გაემხილა ეს ხილვა.

¹⁶და დაუძახა ყელიმ სამუელს და უთხრა: „სამუელ, შვილო!“ მან მიუგო: „აჰა, აქა ვარ.“

¹⁷უთხრა ყელიმ: „მითხარ ის სიტყვა, რაც შენს მიმართ იყო წუხელ და ნურაფერს დამიმალავ, თორემ ღმერთი ამას და ამას გიზამს და უარესსაც, თუ დამიმალავ და არ მიამბობ ყველაფერს, რაც შენ გითხრეს.“

¹⁸უამბო სამუელმა ყველაფერი და არაფერი დაუმალავს მისთვის. ხოლო ყელიმ თქვა: „უფალია ის, იყოს მისი ნებისამებრ.“

¹⁹იზრდებოდა სამუელი და უფალი იყო მასთან. არ გაცუდებულა არც ერთი ის სიტყვა, რაც უფალმა უთხრა სამუელს.

²⁰შეიტყო მთელმა ისრაელმა, დანიდან ბეერ-შებაყამდე, რომ სამუელი უფლის წინასწარმეტყველი გახდა.

²¹კვლავ გამოცხადდებოდა ხოლმე უფალი შილოში მას შემდეგ, რაც სამუელს მოევლინა უფლის სიტყვით.