Read სბს–2013 1 მეფეთა 4 Bible Online

1 მეფეთა 4 - სბს–2013 bible

1 მეფეთა 4

¹მოედო სამუელის ამბავი მთელს ისრაელს. გავიდა ისრაელი ფილისტიმელებთან საომრად და დაიბანაკა ებენყეზერთან. ფილისტიმელები კი აფეკში დაბანაკდნენ.

²გაეწყვნენ ფილისტიმელები ისრაელის პირისპირ. გაჩაღდა ბრძოლა და დამარცხდა ისრაელი ფილისტიმელებთან; 4 ათასამდე კაცი დაეცა ბრძოლის ველზე.

³ბანაკში რომ მოვიდა ხალხი, ისრაელის უხუცესებმა თქვეს: „რისთვის დაგვამარცხა დღეს უფალმა ფილისტიმელებთან? წამოვიღოთ შილოდან უფლის აღთქმის კიდობანი, იაროს ჩვენს შორის და გვიხსნას მტრის ხელიდან.“

⁴გაგზავნა ხალხმა შილოში და მოიტანეს იქიდან ქერუბიმებზე მჯდარი ცაბაოთ უფლის აღთქმის კიდობანი. ყელის ორი ვაჟი: ხოფნი და ფინეხასი ახლდა ღვთის აღთქმის კიდობანს.

⁵როცა უფლის აღთქმის კიდობანი ბანაკში მოვიდა, მთელმა ისრაელმა ისე ხმამაღლა შესძახა, რომ მიწა შეიძრა.

⁶და როცა მოესმათ ფილისტიმელებს ამ შეძახილის გუგუნი, თქვეს: „ეს რა გუგუნია ებრაელთა ბანაკში?“ და როცა შეიტყვეს, რომ უფლის კიდობანი მოვიდა ბანაკში,

⁷შეეშინდათ ფილისტიმელებს, რადგან ისინი ამბობდნენ: ღმერთი მოვიდაო ბანაკში! და დასძენდნენ: „ვაი ჩვენ, რადგან ასეთი რამ უწინ არ მომხდარა.

⁸ვაი ჩვენ! ვინ გვიხსნის ამ ძლიერი ღმერთების ხელიდან? ეს ის ღმერთები არიან, ეგვიპტელებს რომ მუსრი გაავლეს უდაბნოში ყოველგვარი სასჯელით.

⁹გამაგრდით და ვაჟკაცურად იდექით, ფილისტიმელებო, რომ არ დაემონოთ ებრაელებს, როგორც თქვენ გემონებიან ისინი. ვაჟკაცურად დადექით და შეებრძოლეთ.“

¹⁰და შეებრძოლნენ ფილისტიმელები, და დამარცხდა ისრაელი, და ყველა თავის კარავში გაიქცა. მეტისმეტად დიდი იყო მარცხი: 30 ათასი ქვეითი დაეცა ისრაელიანთაგან.

¹¹დაიხოცა ყელის ორივე ძე: ხოფნი და ფინეხასი; და წაიღეს ღვთის კიდობანი.

¹²გამოიქცა ერთი ბენიამინელი კაცი ლაშქრიდან და იმავე დღეს მივიდა შილოში, სამოსელშემოგლეჯილი და თავზე მტვერდაყრილი.

¹³როცა ის მოვიდა, ყელი საკარცხულზე იჯდა ქალაქის კარიბჭესთან, გულშეწუხებული ღვთის კიდობნის გამო და გზას აყურადებდა. მოვიდა კაცი ქალაქში და მოიტანა ამბავი, და ამოიგმინა მთელმა ქალაქმა.

¹⁴ამ გოდების ხმის გაგონებაზე თქვა ყელიმ: „ეს რა ხმაურია?“ მალე მივიდა ის კაცი ყელისთან და ყველაფერი აუწყა.

¹⁵98 წლისა იყო მაშინ ყელი, თვალისჩინი წართმეული ჰქონდა და ვეღარაფერს ხედავდა.

¹⁶და უთხრა იმ კაცმა ყელის: „ისრაელიანთა ბანაკიდან მოვდივარ გამოქცეული.“ ყელიმ ჰკითხა: „რა მოხდა, შვილო?“

¹⁷მიუგო მაცნემ და უთხრა: „ისრაელი გაექცა ფილისტიმელებს. სასტიკად განადგურდა ხალხი, შენი ორი ვაჟი: ხოფნი და ფინეხასი დაიხოცნენ და ღვთის კიდობანიც წაღებულია.“

¹⁸როგორც კი ახსენა მან ღვთის კიდობანი, ყელი საკარცხულიდან ბჭისკენ გადავარდა ზურგით, ხერხემალში გადატყდა და მოკვდა, რადგან მოხუცებული იყო და მძიმე. ორმოც წელიწადს იყო ყელი ისრაელის მსაჯული.

¹⁹მისი რძალი, ფინეხასის ცოლი, მოსალოგინებელი იყო, და როცა გაიგო ღვთის კიდობნის წაღების და თავისი მამამთილისა და ქმრის სიკვდილის ამბავი, მუხლებზე დავარდა და შვა, რადგან ის იყო უწია მშობიარობის ტკივილებმა.

²⁰როცა კვდებოდა, თავზე მდგომი ქალები ეუბნებოდნენ: „ნუ გეშინია, რადგან ვაჟი შეგეძინა.“ მაგრამ ის ვეღარ პასუხობდა მათ, რადგან გულთან ვეღარაფერი მიჰქონდა.

²¹და უწოდა დედამ ვაჟს სახელად იქაბოდი, რაც ნიშნავს – განეშორაო დიდებულება ისრაელს! – ღვთის კიდობნის წაღებისა და მისი მამათილისა და ქმრის სიკვდილის გამო თქვა ეს.

²²და კვლავ თქვა: „განეშორა დიდებულება ისრაელს, რადგან წაღებულია ღვთის კიდობანი.“