Read სბს–2013 1 მეფეთა 7 Bible Online

1 მეფეთა 7 - სბს–2013 bible

1 მეფეთა 7

¹მოვიდნენ კირიათ-იეყარიმელნი, წაიღეს უფლის კიდობანი და მიიტანეს აბინადაბის სახლში, ბორცვზე რომ დგას, და განაწესეს მისი ძე – ელეაზარი, უფლის კიდობნის დასაცავად.

²გავიდა ხანი, ოცმა წელმა განვლო კირიათ-იეყარიმში კიდობნის დასვენებიდან, და მოენატრა უფალი მთელს ისრაელის სახლს.

³და ელაპარაკა სამუელი მთელს ისრაელის სახლს და უთხრა: „თუ მთელი გულით გსურთ მოიქცეთ უფლისაკენ, მოიშორეთ უცხო ღმერთები და ყაშთორეთები; გულები მიმართეთ უფლისაკენ და მხოლოდ მას ემსახურეთ და მაშინ გიხსნით იგი ფილისტიმელთა ხელიდან.“

⁴მოიშორეს ისრაელიანთ ბაყალები და ყაშთორეთები და მხოლოდ უფალს ემსახურებოდნენ.

⁵და თქვა სამუელმა: „შეკრიბეთ მთელი ისრაელი მიცფაში და თქვენთვის შევევედრები უფალს.“

⁶შეიკრიბნენ მიცფაში, და ხაპავდნენ წყალს და ღვრიდნენ უფლის წინაშე, და მარხულობდნენ იმ დღეს და ამბობდნენ: „შევცოდეთ უფალს.“ და განსჯიდა სამუელი ისრაელიანთ მიცფაში.

⁷როცა შეიტყვეს ფილისტიმელებმა, რომ ისრაელიანები მიცფაში იყვნენ შეკრებილი, დაიძრნენ მათი მთავრები ისრაელიანთა წინააღმდეგ. ეს რომ გაიგეს ისრაელიანთ, შეუშინდნენ ფილისტიმელებს.

⁸უთხრეს ისრაელიანებმა სამუელს: „ნუ დადუმდები და ნუ შეგვიწყვეტ უფლისადმი, ჩვენი ღვთისადმი ვედრებას, იქნებ გვიხსნას ფილისტიმელთა ხელიდან.“

⁹აიყვანა სამუელმა ძუძუთა კრავი და მთლიანად შესწირა სრულადდასაწველად უფალს, და შეჰღაღადა სამუელმა უფალს ისრაელისთვის და უსმინა მას უფალმა.

¹⁰როდესაც სამუელი უფალს სწირავდა სრულადდასაწველს, ფილისტიმელები მოდგნენ ისრაელთან საომრად; და იგრგვინა ძლიერი ხმით იმ დღეს უფალმა ფილისტიმელებზე და შეაძრწუნა ისინი ისე, რომ იძლივნენ ისრაელიანთა წინაშე.

¹¹გამოვიდნენ ისრაელის კაცები მიცფადან და დაედევნენ ფილისტიმელებს, და მუსრი გაავლეს მათ – ვიდრე ბეთ-ქარის ბოლომდე.

¹²და აიღო სამუელმა ერთი ლოდი და დადო იგი მიცფასა და შენს შორის, და უწოდა იმ ადგილს სახელად ებენყეზერი, და თქვა: აქამდე შეგვეწიაო უფალი.

¹³დაცხრნენ ფილისტიმელები და აღარ შედიოდნენ ისრაელის საზღვრებში. და უფლის ხელი იყო ფილისტიმელთა წინააღმდეგ სამუელის სიცოცხლეში.

¹⁴დაუბრუნდა ისრაელს ის ქალაქები, რომლებიც ფილისტიმელებმა წაართვეს მათ, ყეკრონიდან გათამდე, და გამოგლიჯა ისრაელმა თავისი საზღვრები ფილისტიმელებს. და იყო მშვიდობა ისრაელსა და ამორეველთა შორის.

¹⁵და განსჯიდა ისრაელს სამუელი მთელი სიცოცხლის მანძილზე.

¹⁶და დადიოდა იგი წლიდან წლამდე, მიმოივლიდა ბეთელს, გილგალსა და მიცფას, და განსჯიდა ისრაელს ყველა იმ ადგილას.

¹⁷ბრუნდებოდა რამათს, რადგან იქ იყო მისი სახლი, და იქაც განსჯიდა ისრაელიანთ. და იქაც აუგო მან სამსხვერპლო უფალს.