Read lokele Matayo 14 Bible Online

Matayo 14 - lokele bible

Matayo 14

¹Nda mbile-ao Bɔkɔta Helodi[3] looka lokuku loa Yesu.

²Inde loonga la bɛkɔwa yande mbo— Boto-yo ende Yoane Bolufi, asokuswa nda liwa, eokao befoka bitokekaka bisisho ko lande.

³Nde Helodi aundesäkä Yoane, inde lokandak’inde, inde lot’inde nda ndakɔ ya bɔnyɔlɔlɔ, loasɔ loa Helodia wali wa boloo wande ako Filipo.

⁴Eoka Yoane aongäkä la Helodi mbo— Etiengane la bikela mbo ɔɔsɛk’inde ndosɔng’inde.

⁵Asangäkä nde ndool’inde, kongo ko inde lowanga bikuke ya bato eoka iyo lotanga Yoane mbo bɔtɔndɔli.

⁶Nde ayäkä lise lioenyela liotomu lia Helodi, boseka wa Helodia loinel’iyo bisha, inde loomalesa Helodi.

⁷Lamao Helodi lotikel’inde lisakä ko la tele mbo atofa boseka yeka eyekombeke inde.

⁸Lamao boseka, oyasoluwesomo ko oso la nyango wande, inde loonga mbo— Faka’mi ko eya botö wa Yoane Bolufi nda lotufa.

⁹Helodi okäkä ikɛnɛnɛ sifi, kongo ko eoka ya tele yande, la eoka ya ebayaläkä lande nda bieka, inde loonga lau mbo wao bofomoko end’inde.

¹⁰Limɔ Helodi lotoma boto ndokatena botö wa Yoane nda ndakɔ ya bɔnyɔlɔlɔ.

¹¹Inde loesha botö nda lotufa, inde lofa boseka wao, la boseka lɔkɛ la wao ende nyango wande.

¹²La baeki ba Yoane loya, iyo loila engulunguma, iyo loomba yao, lamao iyo lɔkɛ lokakambesa Yesu.

¹³Okaka Yesu mboli-bi, Inde losokwa omao ko la watɔ, okakɛ nda elela eyele elämbä ko Inde angɛnɛ; nde okäkä bikuke ongoma iyo lokuswakuswaka nda kenge okatutane lande la bakolo.

¹⁴Asaowäkä Yesu Inde lɔɛnɛ windi bofi wa bato, Inde lookel’iyo ngandi; la Inde louwekesa ebau ba biale.

¹⁵Aɔngɔkɔ buse litele, baeki bande loyaonga lande mbo— Elela-ye ende ko isimo la buse bosɔngɔ; machaka windi w’ato baɛkɛ nda bekenge okasomba bieka.

¹⁶Nde Yesu loonga lau mbo— Bati la litina liosekwa, ino angɛnɛ nd’atof’iyo bieka yola.

¹⁷Iyo loonga lande mbo— Toti ango la waya, ngo ko beila bɔɔmwi la swi imbale.

¹⁸Inde mbo— Taeshaka yao eyamaya.

¹⁹Lamao Inde loonga la windi w’ato mbo bayaleke se nda chwingi chwesi; Inde lɔɔsɔ beila bɔɔmwi la swi imbale, Inde loila baiso likolo, Inde losombola limɔ Inde loataka bao, Inde lofaekefa baeki beila, la baeki lofaekefa windi w’ato.

²⁰Limɔ batotina lola la iyo lokanelo, la iyo loina twinyo twa beila ebitikali yotumesa bisaka liu la imbale.

²¹Bato ana ebaläkä baaka batolome bilɛfu bɔɔmwi, angotanga batomali la bana.

²²Kwaamao Yesu loonga la baeki bande mbo bakweke nda watɔ la mbo balekeke oso wande ko nda boili wasi, ani Inde atomelesa windi w’ato.

²³Asenyanak’Inde la windi wa bato, Inde lolila nda löngo ko Inde angɛnɛ okasombola omao. Aɔngɔkɔ buse Inde loyala ko Inde angɛnɛ omao.

²⁴Ani watɔ waaka owale la bosofalima la batutu, eoka lofofo losonana lau,

²⁵nda mbile ya lilamba lia anɛi (la yombe) Yesu loyel’iyo ani atotanda tandelele likolo lia balia.

²⁶Limɔ ɛnɛkɛ baeki mbo atotanda likolo lia balia, iyo lowanga finɛ, iyo mbo— Ende bosoko, iyo loamama la bɔwa.

²⁷Nde Yesu loonga lau lisasaya, mbo— Sambolaka betema, ende Imi, owängëke.

²⁸Limɔ Petelo lomutola lande mbo— Ngɛnɛ, eyambo ende Aɛ, kambesaka’mi iyeke end’Aɛ tandelele likolo lia balia.

²⁹Yesu mbo— Yauku. Lamao Petelo lokwa se nda watɔ, inde loakola ndotanda likolo lia balia okakɛ ende Yesu.

³⁰Nde ɛnɛkɛ inde lömba lofi inde lowänga la inde loakola ndolinda, inde loamama mbo— Ngɛnɛ, uwesaka’mi.

³¹Lisasaya Yesu lonanola bosamba wande, Inde loundes’inde, Inde loonga lande mbo— Aɛ wa liimeli likɛkɛ, otiki to fee eok’iye?

³²Akwäkä iyo nda watɔ, lofofo lotemba,

³³limɔ ebayali nda watɔ losemola Inde, iyo mbo— Wewe, Aɛ wende Wana wa Mungu.

³⁴Alekäkä iyo, iyo loiyela boili nda Ngeneseleta,

³⁵limɔ batolome ba elela ena loleembel’Inde, lamao iyo lotomaka wɛndi nda yese ebitimbi la iyo loeshel’Inde bato batotina ba kambo,

³⁶iyo lolɔmbɔkɔlɔ Yesu mbo bamateke ango litamba lia esinda yande, la batotina ebamatakäkä liao, iyo losäsekesomo säsosäso.