Read lokele Matayo 2 Bible Online

Matayo 2 - lokele bible

Matayo 2

¹Aotomökö Yesu nda Betelehemu wa Yudea nda mbile eyaaka Helodi Bɔkɔta, limɔ Bakesa ya tolonge ebasekwaka fangi ya batɛmwɛlɔ-ba-bonyanya, iyo loya nda Yelusaleme, iyo lofelaka mbo—

²¿Oyaotomu kwani Bɔkɔta wa BaYuda ende anima? Eoka tosɔɛnɛ ilonge shande nda fangi ya batɛmwɛlɔ-ba-bonyanya la tosoya oyatulamel’Inde se.

³Okaka Helodi ongoma inde lɔɛnɛ tale finɛ la bato batotina ba Yelusaleme lisanga.

⁴Inde losɔngɔmɛsɛkɛ kanga ebieti la Batikasa ba bato, inde lofelak’iyo elela eyetootomo Masiya.

⁵Iyo mbo— Nda Betelehemu wa Yudea, eoka loatomoko kola Bɔtɔndɔli mbo—

⁶Aɛ Betelehemu nda yese ya Yudea Oti ango esikɛkɛ sha benyafala ya Yudea Eoka Bɔkɔta nd’atotsmwa end’aɛ Oyatoyala Botingani wa bato bami bako BaIsalaele.

⁷Lamao Helodi lota eBakesa lioi wisisa la inde loluwesomo lau mbile eyɛnɛlɛkɛ ilonge,

⁸inde lotom’iyo mbo baɛkɛ ko nda Betelehemu, inde mbo— Kɛndɛkɛ okakɔtɔlɔkɔ loasɔ loa wana la wɛlï, akɛnɛkɛ ino wɛnɛ Inde, ino koeshela’mi wɛndi mbo iyeke oyasemol’Inde.

⁹Okaka’iyo baoi ba Bɔkɔta, iyo lɔkɛ limɔ ilonge esiɛnɛk’iyo nda batɛmwɛlɔ, shao lɔkɛ oso wau konda elela olo ayali Wana.

¹⁰Ɛnɛkɛ iyo ilonge iyo looka limɛngɔ finɛ fafo.

¹¹Iyo lɔkɛ konda ndakɔ, iyo lɔɛnɛ Wana amamwito la Malia nyango wande, iyo lokwa se, iyo losemokola Inde, limɔ iyo loliola bondanda wau, iyo lotambel’Inde bafaefi bau, bako bieto ya loketi lofi, la mwɛmwɛ ya Libano la mola.[1]

¹²Kongo ko iyo loimomo nda saki mbo batainywa ende Helodi, eokao iyo lotangwa nda yese yau ko la mboka yasi.

¹³Asilak’iyo ndotangwa eyau, bokitomo wa Mungu lɔɛnɛlɛ ende Yosefa nda saki, inde mbo— Emalaka, ilaka Wana la nyango wande, kwaka otili konda Ejipeto, yalakaka omao kond’akaesheleke Imi eshel’aɛ wɛndi, eoka Helodi asosanga okaluka Wana mbo asɛɛsɛlɛsɛkɛ Inde.

¹⁴Lamao Yosefa loemala, inde loila Wana la nyango la ocho, inde lɔkɛ nda Ejipeto.

¹⁵Inde loyalaka omao konda bawelo ba Helodi, litina mbo bina eyaongaka Ngɛnɛ ko la Bɔtɔndɔli bikɔchɔmɔkɔ, mbo— Isota Wana wami lioi mbo asekweke nda Ejipeto.

¹⁶Lamao ɛnɛkɛ Helodi mbo asolimbomo kola Bakesa, inde losomaka finɛ, inde lotoma basilikani nda Betelehemu la nda kenge bitimbi mbo baoleke bana batolome atotina ebatitaengane miaka imbale ko nda mbile eyaluwesomoko inde la eBakesa.

¹⁷Lamao baoi ebaongaka Yelemaya ewa Bɔtɔndɔli bakɔchɔmɔkɔ, mbo—

¹⁸Limiki losookana nda Lama, Bileli la bitondo ya kelelikeleli, Ende Laele oyasoleela bana bande, Atilɛmbɛ liɔnjɔnji eoka bana bat’imɔ.

¹⁹Awaka Helodi, Bokitomo wa Ngɛnɛ lɔɛnɛlɛ ende Yosefa nda Ejipeto nda saki,

²⁰inde mbo-Siswaka, ilaka Wana la nyango wande, kɛndɛkɛ nda yese ya Isalaele, eoka ebakotaka ndoola Wana, iyo basowa.

²¹Inde losiswa, inde loila Wana la nyango wande, inde loiya nda yese ya Isalaele.

²²Nde ökakä inde mbo Alakelau atokakalesa Yudea nda lifa lia Helodi sango wande, inde lowanga ɔkɛ omao, limɔ eoka mbo asokangesomo la Mungu nda saki,

²³inde lɔkɛ okayala nda bokenge boko Nasaleta, l’ani baoi ebaongaka Batɔndɔli bakɔchɔmɔkɔ mbo— Inde atotangomo ewa Nasalene.