Read lokele Matayo 20 Bible Online

Matayo 20 - lokele bible

Matayo 20

¹Bɔkɔta wa Use bole kwa boto, wange wa bɔkɔkɔ, oyakuswäkä la yömbe okaluka basali bokela likuwa nda elanga yande ya tuma.

²Limɔ akulianäk’inde la basali bamɔi ndokamb’iyo lise la lise lofalanga, inde lotom’iyo nda elanga yande nda likuwa.

³Tina la bonyanya oku inde lokuswa liasi, inde lɔɛnɛ basi bemakali ko wawa nda liöngo;

⁴inde loonga lau mbo— Ino imɔ kɛndɛkɛ nda elanga limɔ itofaef’ino bieto ebiengani. Iyo lɔkɛ.

⁵Tina la ifitika la tina la lilöngolöngo imɔ inde lokuswaka ndokakela ko ongoma.

⁶Akuswäk’inde liasi tina la baɔngɛlɔ ba use inde loosha basi bemakali wawa, inde loonga lau mbo— ¿Monito ino otoemakalaka ani ko la nɔngɔ buse tuu ko liemaëlä?

⁷Iyo mbo— Eoka angwɛnɛ boto oyatof’iso likuwa. Inde mbo— Ino imɔ kɛndɛkɛ nda elanga.

⁸Iläkä buse litele, ngɛnɛ wa elanga loonga la kapita yande mbo— Taka basali lioi, faefak’iyo bɔsɛɛli; akolaka l’eba liili limɔ l’eba oso.

⁹Ayäkä ebaoshomökö nda baɔngɛlɔ ba use baɔlɔ̈kɔ̈ boto la boto lofalanga.

¹⁰Nde ayäkä eba oso iyo loenyela mbo batɔɔlɔ eyoeta, nde iyo imɔ lɔɔlɔ boto la boto lofalanga ko lɔmɔi.

¹¹Aɔsɔ̈kɔ̈ iyo loao, iyo loimaima ngɛnɛ, mbo—

¹²Eba ba liili bakeli likuwa ko saa ɛmwito kongo, nde osoenganes’iyo lasu ebasotendekela bofimbi wa likuwa la efanga ya löwa.

¹³Nde ngɛnɛ lomutoela ɔmɔi wau mbo— Wina, itikeel’aɛ loasɔ; mbo aɛ otikulianeke lami nda lofalanga lɔmɔi?

¹⁴Ɔsɔkɔ eloaɛ, kɛndɛkɛ eyaɛ; lisangi liami lile ndof’iyo ba liili kwani asofa’mi ofaef’aɛ.

¹⁵¿Mbo lotiengane lami okela kwa asangi nde’mi la eyami angɛnɛ?

¹⁶¿Wende la lisiela ko eoka imi yende bolau? Ongoma, ewa liili etolaka oso, l’ewa oso etungaka liili.

¹⁷Asangäka Yesu ndɔkɛ Yelusaleme, Inde lɔɔsɔ eba liu la ambale ko wisakumbo nda mboka, Inde loonga lau mbo—

¹⁸Tɛnɛ, tosɔkɛ Yelusaleme, lamao Wana wa oto atowambomo ende kanga ebieti la batikasa, iyo ana batof’Inde se, mbo aolomoko,

¹⁹limɔ batɔkɛs’Inde ende bato ba yese yasi, batek’Inde kungutu, baomek’Inde fimbo, la mbo bolek’Inde nda liyeka la mbisa ya becho isatɔ atouwa liasi.

²⁰Lamao nyango wa bana batolome ba Sebedayo loya amamwito la bana bande, inde loswa balui se oso wande la inde lofel’Inde loasɔ.

²¹Yesu loonga lande mbo— ¿Olɛmbi nd’iye? Otomali loonga lande mbo— Lɛmbɛlɛkɛ mbo ebana-ba bami bambale bayaleke se, ɔmɔi nda osamba wa wali, ɔmɔi nda osamba wa olome, eyalayalek’Aɛ nda Bɔkɔta waɛ.

²²Nde Yesu lomutoel’inde mbo— Otiluwe elosofel’aɛ. ¿Otokɔkɔlɔ nde ndomwa kɔpɔ eyetomwa’mi? Iyo loonga lande mbo— Totokɔkɔlɔ.

²³Limɔ Inde loonga lau mbo— Ino bomwaka nde kɔpɔ yami nde ndoyales’ino nda bosamba wami w’olome la nda ewa wali, loti loami ndof’ino, kangä ende ebasotonjelomo loao ko la Sango wami.

²⁴Okäkä eba liu ebaoi-ba, iyo losoma la bana-ba bambale.

²⁵Limɔ Yesu lot’iyo lioi bayeke end’Inde, la Inde loonga lau mbo— Oluwi mbo betoli oso ya ebati BaYuda batokakales’iyo la bato bafi bau bende l’isosha end’iyo.

²⁶End’ino, loti ongoma, kongo ko oyatolɛmbɛ mbo ayaleke boto bofi wanu, ayaleke bokuweli wanu,

²⁷la oyatolɛmbɛ mbo ayaleke botoli oso wanu, wao koyala nde bɔkɔwa wanu.

²⁸Ko ongoma, Wana wa oto imɔ, atiye ndokuwelomo, kangä okuwela basi, la ndofa liwawi liande angɛnɛ kwa liendoli lia bato wike.

²⁹Asekwäkä iyo nda Yeliko ekuke efi lotut’Inde,

³⁰la tɛnɛ, bato bambale ba betuku bayali se nda ɔngɔ wa mboka; okäk’iyo mbo ende Yesu oyatoeta, iyo loamama mbo— Ngɛnɛ, Wana wa Dawidi okelak’iso ngandi.

³¹Bato ba ekuke loim’iyo mbo bayaleke tau, kongo ko iyo loamamaka ngo likama mbo— Ngɛnɛ, Wana wa Dawidi, okelak’iso ngandi.

³²Yesu losikama, Inde lot’iyo lioi, Inde mbo— ¿Olɛmbi nde mbo ikeelek’ino iye?

³³Iyo loonga lande mbo— Ngɛnɛ, mbo baiso basu baliolomoko.

³⁴Limɔ Yesu lookel’iyo ngandi, Inde lomata baiso bau, lisasaya iyo lɔɔlɔ liɛni liasi, la iyo lotuta Inde.