Read lokele Matayo 4 Bible Online

Matayo 4 - lokele bible

Matayo 4

¹Lamao Yesu lɔkɛsɔmɔ la Bolimo ko nda liɔmbɛlɛ okasoshelomo la Satana.

²Omao Inde lokila bieka ko bacho kama inɛi, la löwa la ocho, lamao Inde looka isiyɛ.

³Ayaka Bososheli ende Inde, inde mbo— Eya to mbo wende Wana wa Mungu ongaka to mbo e-batalɛ-ba bakinjweke beila.

⁴Yesu lomutola mbo— Losotomo nda lokasa loa Mungu mbo— Boto aitoyalaka la liwawi ko l’eoka ya beila kongo, Kangä eoka ya lioi la lioi elitokuswa nda bɔnɔkɔ wa Mungu.

⁵Limɔ Bososheli lɔkɛsɛ Inde ko nda bokenge ewuchomu[2] inde loemes’Inde olikolo lia losambɔ loa ndakɔ ya Mungu,

⁶inde loonga lande mbo— Eya to mbo wende Wana wa Mungu, kushaka bindo yaɛ se, eoka losotomo nda lokasa loa Mungu mbo— Atoonga la bakitomo bande mbo batinganeke laɛ La batotolak’Aɛ nda besamba yau mbo Otaomana litindi liaɛ nda litalɛ.

⁷Yesu loonga lande mbo— Ko ongoma losotomo nda Lokasa loa Mungu mbo— Ososhelëke Ngɛnɛ Mungu waɛ.

⁸Liasi Satana lɔkɛsɛ Inde amamwito lande olikolo lia löngo lofi fafo, omao inde lɔɛnɛs’Inde yakakaelo bitotina ya wenda la bɛfɛkɔ ya yao,

⁹inde mbo— Botulamela’mi se ndosemola’mi imi kofaef’Aɛ ebi bitotina.

¹⁰Limɔ Yesu loonga lande mbo— Kɛndɛ, Satana, eoka losotomo nda Lokasa loa Mungu mbo— Tulamelaka ngo ko Mungu waɛ se, Semolaka ko Inde kongo.

¹¹Lamao Satana lomach’Inde, la bakitomo ba Mungu loyakukya Inde.

¹²Okäkä nde Yesu mbo Yoane akandomökö nda bɔnyɔlɔlɔ, Inde lɔkɛ nda Ngalilai,

¹³limɔ Inde losekwa nda Nasaleta, Inde lokayalaka nda Kafenauma bokenge ebole tina la eliya nda biese ya Sebulona la Nafatali,

¹⁴mbo baoi ebaongäkä bɔtɔndɔli ako Yesaya bakɔchɔmɔkɔ, mbo—

¹⁵Yese ya Sebulona la yese ya Nafatali, Mboka ya eliya, faki yasi ya Yaledene, Ngalilai eyele yese ya ebati BaYuda,

¹⁶Bato ebayalaka nda lilima basɔɛnɛ liangangi lifi. Ebayalaka nda elele ya liɔmbɛ lia liwa Liangangi lisoangangel’iyo.

¹⁷Ko nda mbile ena Yesu loakola ndonangola mbo— Kalanganaka eoka Bɔkɔta wa Use bosoya tina.

¹⁸Akɛndɛ̈kɛ̈ Yesu nda ngɔngɛ ya Eliya ya Ngalilai Inde lɔɛnɛ bato ambale, boloo la etungani, bako Simona, oyatangomökö imɔ ko Petelo, la Andelo, ani batoluwä wɛngɔ eoka baaka baluwi ba swi.

¹⁹Yesu loonga lau mbo— Tütaka’mi la itoyales’inö baluwi ba bato.

²⁰Lisasaya iyo lomacha wɛngɔ wau, iyo lotüta Inde.

²¹Akɛndɛ̈kɛ̈ Inde sumbu liasi, Inde lɔɛnɛ batolome basi ambale, bako Yakobo wana wa Sebedayo la Yoane, etungani yande nda watɔ amamwito la sango wau ako Sebedayo, ani batowamba wɛngɔ wau; Yesu lot’iyo lioi.

²²Kwamao iyo lomacha watɔ la sango wau, iyo lotüt’Inde.

²³Yesu akɛndɛ̈kɛ̈ nda yese etotina ya Ngalilai, okaekese nda bisɔngɔmɛlɔ yau; Inde lokanangokole Mboli Ilau ya Bɔkɔta; Inde losäsesa eba kambo la eba biale ya bɔfɔɔnɔ la bɔfɔɔnɔ ebiayaläkä la bato omao.

²⁴Lokuku loande lookana nda yese etotina ya Sulia, iyo loeshekel’Inde batotina ba kambo l’ebayaläkä la ngwo la bemusi ya bɛfɔnɔ wike, l’eba belimo ibe, l’eba tosekakɔkɔ, l’eba lonyango, la Inde losäsekes’iyo.

²⁵Biindi ya bato lotütak’Inde, bato ebasekwäkä nda Ngalilai la Dekapoli la nda Yelusaleme la faki owale wa Yaledene.