Read lokele Matayo 6 Bible Online

Matayo 6 - lokele bible

Matayo 6

¹Taenyelaka la wɛlï mbo otakelaka eya liengani ko mbo bato bɛnɛkɛ ino mbo wende balau, eoka ko ani ot’imɔ wofomo bondanda ende Sango wanu oyayali nda Use.

²Eokao atokusol’aɛ lifaefi liosunga ebatouwe, otëke to boekï oso, kwa atokelaka balimbakeli nda bisɔngɔmɛlɔ nda mboka, mbo basemolomoko la bato. Wewe isoonga lanu mbo iyo ana basɔɔlɔ bondanda wau fɛɛ.

³Nde atokusola aɛ lifaefi, bosamba waɛ wa wali boluwëke elotokela ewa olome,

⁴mbo lifaefi lia ngandi yaɛ liyaleke wisakumbo, limɔ Sango waɛ oyatɔɛnɛ wisisa ɛɔlɛsɛkɛ aɛ bondanda.

⁵Atosombol’ino, okelëke kwa ebalimbakeli eoka iyo basami wemala nda bisɔngɔmɛlɔ la nda bau ba mboka mbo bato bɛnɛk’iyo; wewe isoonga lanu mbo iyo basɔɔlɔ bondanda wau fɛɛ.

⁶Kongo ko, atosombol’aɛ ɔtokɔ hɔu nda kuku ya ndakɔ yaɛ, limɔ bome boliyama ndi, aɛ kosombola Sango waɛ oyayali nda wisakumbo; la Sango waɛ oyatɔɛnɛ wisisa ɛɔlɛsɛkɛ aɛ bondanda.

⁷Atosombokol’ino, osombolëke boongaonga kwa atokelaka ebati BaYuda, eoka iyo batangi nde mbo batookomo eoka ya wike wa beongaonga.

⁸Okweekelëk’iyo eoka Mungu Sango wanu nd’aluwi yao ebisoeno ino ani okafel’Inde.

⁹Eokao ino sombolaka ko ani mbo— Sango wasu oyayali nda Use, Lina liaɛ lilitesomoko,

¹⁰Bɔkɔta waɛ boyeke; Lisangi liaɛ likelomoko, Kwa atokelomo liao nda Use, ko ongoma ono se;

¹¹Faefak’iso louse bieka yoengana louse,

¹²Mɛsɛlɛk’iso batongwi basu kwa iso imɔ Tosotamɛsɛlɛ iyo ebatotongwa lasu.

¹³Okɛsɛk’iso nda lisoshela, Kangä ɔnɔkɔlɔkɔ iso nda obe.

¹⁴Eoka eyambo bomɛsɛlɛ bato batongwi bau, Sango wanu imɔ atomɛsɛlɛ ko batongwi banu,

¹⁵nde eyambo ino otimɛsɛlɛ bato, ani Sango wanu aitomesɛlɛ ango batongwi banu.

¹⁶Atokilak’ino bieka, oyalëke la biɔmbɔ wuno kwa atokelaka ebalimbakeli, eoka batonunakalesa biɔmbɔ yau, mbo bɛnɔmɔkɔ la bato mbo batile yeka. Wewe isoonga lanu mbo basɔɔlɔ bondanda wau fɛɛ.

¹⁷Kongo ko atokilak’ino lɔɔkɔ betö yanu la baningo, soolaka biɔmbɔ yanu,

¹⁸mbo bato bataɛnɛ likili lianu lia bieka, kangä Sango wanu oyayali nda wisakumbo, limɔ Sango wanu oyasɔɛnɛ wisisa Inde ɛɔlɛsɛkɛ ino bondanda.

¹⁹Osɔnjɛ̈kɛ bondanda wanu ono se, olo sambola la batälɛ la mbombö batosɛɛsɛlɛsɛ wao, la olo eba biya batofindola etutu mbo biyeke wao;

²⁰kongo ko sɔnjaka bondanda nda Use, ona angoko sambola, angoko batälɛ la mbombö angosɛɛsɛlɛsɛkɛ wao, angoko eba biya angofindola, ango wiya yeka.

²¹Eoka olo ayali bondanda waɛ, botema waɛ boyalaka imɔ ko omao.

²²Täla ya bindo ende liso, eokao liso liaɛ liyala fololo, bindo yaɛ bitotina bitoana swaa.

²³Nde ango liso liaɛ liyala libe, bindo yaɛ bitotina bitosɔlɔnɔ sɔlɛ̈ la lilima. Eokao eya ngo mbo liangangi elile laɛ litufaka, aina to botufɛlɛ.

²⁴Angwɛnɛ oto wokɔkɔlɔ oyala bɔkɔwa wa bato ambale, eoka mbo ataiyana la ɔmɔi nde kosamaka oyo ɔmɔi, angoko atowatema la ɔmɔi nde kosɛɔlɔ oyo ɔmɔi; otikɔkɔlɛ oyala bɔkɔwa wa Mungu la bieto lisanga.

²⁵Eokao, itoonga lanu mbo— Otakelëke bolenda loasɔ loa liwawi lianu mbo toleke to eni yeka, tomweke to iye; ango ko loasɔ loa bindo mbo towateke bini bisinda. ¿Liwawi liisoeta yeka yola? ¿Bindo biisoeta bisinda yowata?

²⁶Tichaka nɔli nda use, biitolɔɔ, biitoina, biitoisaka eula nda ekukyelo, kongo ko Sango wanu wa Use atoles’iyo; ¿Ino oisolongel’iyo finɛ?

²⁷Ndai wanu kokɔkɔlɔ ndokondesa bindo yande ko sinyo kongo, eoka ndotakela bolenda nda yao?

²⁸¿Monito bototakela bisinda yowata bolenda? Taenyelaka fɔtɔtɔ ya lokonda, biitokela likuwa, biitotita bisinda,

²⁹kongo ko itoonga nde lanu mbo— Ango Solomo angɛnɛ kwa aaka inde la bɔfɛkɔ wa likama, atiawataka bɔfɛkɔ woengana la lɔfɔtɔtɔ lɔmwitɔ loa lokonda.

³⁰Eya to mbo Mungu asowatesa ko chwingi chwa lokonda la bofɛkɔ ani, chwingi etosoyala louse nde lɛlɛngɔ tototomo nda etumbelo, nde simbi to Inde kowates’ino bato ba lilendelu likɛkɛ.

³¹Eokao otakelëke bolenda mbo— ¿Iye eyetolak’iso?, ¿Iye eyetomw’iso? ango ko mbo— ¿Eni yeka eyetowat’iso?

³²Yeka bina, ebati BaYuda batokalukake yao, Nde Sango wanu wa Use aluwi mbo botoeno nde ebitotina-bi.

³³Talukaka Bɔkɔta wa Mungu la eliande liengani, limɔ ebi-bitotina kofomoko ino imɔ.

³⁴Eokao otakelëke bolenda loasɔ loa lɛlɛngɔ, eoka bocho wa ɛlɛngɔ bototakela bolenda ko eya wao angɛnɛ. Eweuse bokanelu nde la obe wa wao.