Read lokele Matayo 7 Bible Online

Matayo 7 - lokele bible

Matayo 7

¹Ofëke bato se lifela, mbo aɛ angɛnɛ otafomo se.

²Eoka ko la liataki elisoatak’aɛ loasɔ; aɛ angɛnɛ koatakomo imɔ la liao; la ikweelo esitokweel’ino la basi, ino bokweelomoko imɔ la shao.

³Monito ototichaka lofututi elole nda liso lia wina nde angolembeela bokangela ebole nda liso liaɛ angɛnɛ?

⁴¿Monito otoonga la wina laɛ mbo— Machaka’mi isokoleke lofututi nda liso liaɛ, ani aɛ angɛnɛ ole oko la bokangela nda liso liaɛ angɛnɛ?

⁵Aɛ bolimbakeli, taɔmɔlɔkɔ bokangela nda liso liaɛ; lamao aɛ kokɔkɔlɔ ɔɛnɛ sandelele ndɔɔmɔlɔ lofututi nda liso lia wina.

⁶Ofaefëke ebitanu ende ngwa, ɔwɛlɛ̈kɛ bieto ya loketi oso wa ndei, Mbo ndei bitamatekela yao la batindi la mbo ngwa bitakikwel’ino mbo bitaichak’ino bainyo.

⁷Felaka, limɔ bitofomo ino; lukaka limɔ ino koosha eyetoluk’ino; titaka limɔ bome kolioelomo ino.

⁸Eoka boto la boto oyatofela, inde kɔɔlɔ; oyatoluka, inde koosha; end’inde oyatotita, wao koliolomo.

⁹¿Oni boto wanu oyasofelomo lituma ko la wana wande, atof’inde litalɛ?

¹⁰¿Ango ko eomba swi, sango kof’inde njɔ?

¹¹Eokao, eyambo ino, bato abe oluwi ndofaefa bana banu bafi balau, nde simbi to Sango wanu oyayali nda Use, efaka yeka ilau ende ebasofel’Inde.

¹²Eokao ebisolɛmb’ino mbo bato bakeelek’ino, keelak’imɔ ko iyo ongoma, eoka Bikela la Baoi ba Batɔndɔli bengani nde ko la lioi-li.

¹³Ɔtɔkɔ hɔu nda bome ewamwanu, eoka bome bofalu la mboka efolali bitɔkɛ ko nda lɔsɛɛsɛlɔ, bende to wike ebatɔɔtɔkɔ nda wao.

¹⁴Kongo ko shomome shende siwamwanu la imbomboka shende la bokamu esitɔkɛ ko nda liwawi, la bato bende bamyɔ ebatoosha shao.

¹⁵Taenyelaka la wɛlï eoka ya batɔndɔli ebati la momongo ebatoya end’ino la wɛnɛlɔ wa bɛkɔkɔ nde wewe bende atiteni kwa ngɔi ya luno.

¹⁶Botolembeel’iyo ko la tuma twau. ¿Bato kotwa toyayöliki nda toyangiakau? ¿Kolukä sau nda toilaila?

¹⁷Ko ongoma, isandu silau sitota tuma tolau; nde isandu esisɔɔlɔ angota tuma tolau.

¹⁸Isandu silau siitokɔkɔlɔ ota tuma tobe la isandu esisɔɔlɔ angokɔkɔlɔ ota tuma tolau.

¹⁹Isandu l’isandu esiitota tuma tolau, shao sitotindomo kokumbolomo nda bösä.

²⁰Eokao botolembeel’iyo ko la tuma twau.

²¹Bati to ebatotina ebatotangaka’mi mbo Ngɛnɛ, Ngɛnɛ ebatɔɔtɔ nda Bɔkɔta wa Use, mbayɔ; kangä ebatokelaka lisangi lia Sango wami oyayali nda Use.

²²Nda lise lina lia liili, wike belaongaka lami mbo— ¿Ngɛnɛ, Ngɛnɛ, totiatɔndɔlɔ̈kɔ̈ nda lina liaɛ; totiakusoläkä belimo ibe nda lina liaɛ, totiakeläkä tokesa nda lina liaɛ?

²³Limɔ Imi koonga lau mbo— Itialuwäkä ino ango sinyo, sokwaka ende’mi, ino eba Iotefola.

²⁴Eokao oyatooka baoi-ba bami, inde kokɔcha bao, atokweelomo la boto wa wɛlï wotaenyela loasɔ loa liswi lia ndakɔ yande nda batälɛ,

²⁵limɔ mbula lɔtɔnɔ tɔitɔi, betima losecha sondwäsondwä, lofofo lofofa fofoo, yao loomanakela ndakɔ ena, kongo ko ndakɔ angoukwa eoka yao loswama se suu nda batälɛ.

²⁶Boto oyatooka baoi-ba bami, nde atikɔchɛ bao, inde kokweelomo la boto w’ebebe oyaswäkä ndakɔ yande nda nyɛlɛ yoke,

²⁷limɔ mbula lɔtɔnɔ tɔitɔi, betima losecha sondwäsondwä, lofofo lofofa fofoo, yao loomanakela ndakɔ ena la yao loukwa kwuu, liukwi lifi fafo.

²⁸Asiläkä Yesu ndoonga baoi-ba biindi ya bato lomwaala liekesi liande, eoka Inde loekekes’iyo la isosha inga kwa aekesäkä batikasa bau.