Read lokele Malako 10 Bible Online

Malako 10 - lokele bible

Malako 10

¹Asekwaka Yesu omao, Inde lɔkɛ nda yese ya Yudea la konda fangi yasi ya Yaladene, la bato wike losɔngɔmɛlɛ Inde liasi, la Inde loekes’iyo kwa akelakäkä Inde oso.

²BaFalusi bamɔi loya end’Inde oyafel’Inde felo yokɔtɔl’Inde, Iyo mbo— ¿Loengani nde la Bikela mbo botolome asokoleke wali’ande?

³Inde lomutoel’iyo mbo— ¿Mose nd’atelak’ino eni ekela?

⁴Iyo mbo— Mose amachelak’oto ndosɔnɔ lokasa losɛnyana la losokola wali.

⁵Nde Yesu loonga lau mbo— Ko l’eoka ya betema yanu bewaü, Mose nda’amachelakä ino ekela ena,

⁶kongo ko nda baakoelo Mungu akelaka iyo, la otolome la otomali.

⁷Eokao botolome atomacha nde sango la nyango’ande la atowatema la wali’ande, la iyo yaambale batoyala oto ɔmwito;

⁸bat’imɔ bindo imbale, kangä ɛmwito;

⁹eokao eyesowacha Mungu, bato angowatola yao.

¹⁰Nda ndakɔ baeki bande lofel’Inde liasi nda loasɔ-lo.

¹¹Inde loonga lau mbo— Boto oyatosokola wali’ande la kosɔngɔ wasi, inde nd’atotwela wali’ande nyongo;

¹²la otomali ɛsɔngɔnɔ la otolome wasi ani asosokola olome, asotwa nyongo.

¹³Aeshelak’iyo bana baoli ende Yesu mbo amatek’iyo, baeki loima ebayaka la bana.

¹⁴Nde ɛnɛkɛ Yesu ongoma Inde looka botema wale finɛ; Inde mbo— Machaka bana baoli bayeke ende’mi. Okufesëk’iyo, eoka Bɔkɔta wa Mungu wende ende ebofɔnɔ-bo.

¹⁵Wewe, itoonga lanu mbo— Boto oyaitoaela Bokɔta wa Mungu kwa atokela wainɛngɛ, ani inde angɔɔtɔ omao.

¹⁶Limɔ Yesu lokusamel’iyo, l’ani asotalia bangasi end’iyo, Inde lofotesa bana la baoi balau.

¹⁷Atangwak’Inde okaila lɔkɛndɔ, boto ɔmɔi loyel’Inde la mangu; inde lokwa bakulusembe oso wa Yesu, inde lofela Yesu mbo— Boekesi Bolau, ikeleke moni mbo yɔ̈leke loiko loa layalaya?

¹⁸Nde Yesu loonga lande mbo— Monito ototanga’mi bolau? Angwɛnɛ ango ɔmɔi olau sakolo ko Mungu angɛnɛ.

¹⁹Oluwi nde Bikela, Ochwëke nyongo, Wolëke oto, Wiyëke, Otëke nanga, Olimbëke oto, Litesaka sango waɛ la nyango.

²⁰Inde loonga mbo— Boekesi, isolitesa e-bikela-bi bitotina konda isenge shami konda eweuse.

²¹Atinganaka Yesu lande, Inde losama inde, la Inde loonga lande mbo— Osoomelo lɔmɔi kongo; kɛndɛkɛ okatambesa bitotina ebile laɛ, faefaka yao ende bato touwe, -ongoma otɔɔlɔ bondanda nda Use-limɔ yauku tutaka’mi.

²²Bɔmbɔ wande lokwelo wuno eoka ya lioi-li, inde lɔkɛ la ikɛnɛnɛ nda otema eoka aaka lifoka lia likama.

²³Yesu lɔɛlɛlɛ baeki bande, Inde loonga lau mbo— Aina owaü ende bafoka ndɔtɔ nda Bɔkɔta wa Mungu.

²⁴Baeki lomwaala baoi bande, nde Yesu loonga lau liasi mbo— Bana’mi, aina owaü ndɔtɔ nda Bɔkɔta wa Mungu.

²⁵Bowaü wa ngamela woeta nda lifola lia iolo, botiengane la bowaü wa oto wa lifoka ndɔtɔ nda Bɔkɔta wa Mungu.

²⁶La iyo lomwaala finɛ, iyo mbo— Ndai to atokɔkɔlɔ ouwesomo?

²⁷Yesu lotingana lau, Inde mbo— Lona losolongela bato, nde inga to Mungu, eoka Mungu atokɔkɔlɔ bitotina.

²⁸Petelo leakola oonga lande mbo— Tɛnɛ, iso nd’asomacha bitotina yasu la tosotutak’Aɛ.

²⁹Yesu loonga mbo— Wewe, itoonga lanu mbo, Boto oyamachi ndakɔ, angoko baloo, angoko baelo, angoko nyango, angoko sango, angoko bana, angoko bilanga, ko l’eoka yami la eoka ya mboli ilau,

³⁰ɛɔlɔkɔ nde nda mbile-ye mia ya ndakɔ, ya baloo, ya baelo, ya banyango, ya bana, ya bilanga, amamwito la likongolomu, la nda mbile eyekayeke loiko loa layalaya.

³¹Nde wike ebale betoli oso, bende ko mbisa; la eba mbisa betolaka oso.

³²Akɛndɛkɛ iyo nda mboka ya Yelusaleme, Yesu loetel’iyo oso la iyo losisimwa la ebatutak’Inde lowängaka. Aoshäkä eba liu la ambale oosh’Inde liasi, Inde loakola okambes’iyo njasɔ ebikayeke ende Inde,

³³Inde mbo— Tɛnɛ, tosɔkɛ Yelusaleme, lamao Wana wa oto atowambomo ende kanga ebieti la batikasa, iyo ana batof’Inde se mbo aolomoko, limɔ batɔkɛsɛ Inde ende bato ba yese yasi,

³⁴batot’Inde kungutu, batochwɛlɛ Inde sɔi la batoomak’Inde fimbo, la batool’Inde la mbisa ya becho isatɔ atouwa liasi.

³⁵Banatolome bambale ba Sebedai, bako Yakobo la Yoane, loya ende Yesu, iyo mbo— Boekesi, tolɛmbi mbo okeelek’iso kwa atofel’iso ofel’Aɛ.

³⁶Inde mbo— Olɛmbi mbo ikeelek’ino to iye?

³⁷Iyo mbo— Lɛmbɛlɛkɛ mbo toyaleke laɛ, ɔmɔi nda osamba wa olome, ɔmɔi nda osamba wa wali, eyalayalek’Aɛ nda tala yaɛ.

³⁸Nde Yesu mbo— Otiluwe elosofel’ino ofela’mi. ¿Otokɔkɔlɔ nde ndomwa kɔpɔ eyetomwa’mi la otokɔkɔlɔ ndolufiomo la lilufi eyetolufiomo lami?

³⁹Iyo mbo— Totokɔkɔlɔ. Limɔ Yesu loonga lau mbo— Otomwa nde kɔpɔ eyetomwa’mi la otolufiomo la lilufi elitolufiomo lami,

⁴⁰nde ndoyales’ino nda osamba w’olome la nda ewa wali, loti loami ndof’ino kangä ende ebasotonjelomo loao.

⁴¹Okaka eba liu baoi-ba, iyo losoma la Yakobo la Yoane.

⁴²Limɔ Yesu lot’iyo lioi, Inde loonga lau mbo— Oluwi mbo bato ebasotangomo betoli oso ya yese yasi, batoka-kales’iyo la bato bafi bau bende la isosha end’iyo.

⁴³End’ino, loti ongoma, kongo ko oyatolɛmbɛ mbo ayaleke boto bofi wanu, ayaleke bokuweli wanu,

⁴⁴la oyatolɛmbɛ mbo ayaleke botoli oso wanu, inde koyala bɔkɔwa wa batotina.

⁴⁵Wana wa oto, imɔ, atiye ndokuwelomo, kangä okuwela basi, la ndofa liwawi liande angɛnɛ kwa liendoli lia bato wike.

⁴⁶Limɔ iyo lɔkɛ Yeliko… asekwak’Inde Yeliko amamwito la baeki bande la windi wa bato, BaTimayo, wana wa Timayo, ayalaka la botuku, inde loyalaka se nda ɔngɔ wa mboka ani atömba yeka.

⁴⁷Okaka inde mbo ende Yesu wa Nasaleta inde loakola ndoamama, mbo— Yesu, Wana wa Dawidi, okelak’mi ngandi.

⁴⁸Bato wike loim’inde mbo ayaleke tau, kongo ko inde loamama liamami lioeta, mbo— Yesu, Wana wa Dawidi, okelaka’mi ngandi.

⁴⁹Yesu losikama, Inde mbo— Tak’inde lioi. Iyo lota ewa botuku lioi, iyo mbo— Tendelaka, emalaka, asot’aɛ lioi.

⁵⁰Umbolak’inde esinda yande, inde loemala, inde loya ende Yesu.

⁵¹Yesu lofel’inde mbo— ¿Olɛmbi nde mbo ikeelek’aɛ iye? Boto wa botuku loonga lande mbo— Boekesi mbo yɛnɛkɛ liasi.

⁵²Limɔ Yesu loonga lande mbo— Kɛndɛkɛ eyaɛ, liimeli liaɛ lisouwes’aɛ. Lisasaya inde lɔɔlɔ liɛni liasi, inde lotuta Yesu nda mboka.