Read lokele Malako 11 Bible Online

Malako 11 - lokele bible

Malako 11

¹Iyaka iyo tina la Yelusaleme nda Betefange la Betania, ebile nda mboka ya löngo loa Elaya, Yesu lotoma baeki bande bambale oso wande,

²Inde loonga lau mbo— Kɛndɛkɛ nda okenge ebole oso wanu nda mboka la atoiya ino nda liko lia wao, lisasaya otoosha efembeli ya punda ekandomu; boto akayali kɔni nda bɔkɔngɔ wa yao.

³Faikolaka yao, eshaka yao lono. Boto eonga lanu mbo— ¿Monito osokela ani? ino koonga mbo Ngɛnɛ asoeno yao, la atoinola yao ono lisasaya.

⁴Iyo lɔkɛ, iyo loosha efembeli ya punda ekandomu nda bome wa ndakɔ lousa nda mboka, la iyo lofaikola yao.

⁵Bamɔi ebemalaka omao loonga lau mbo— ¿Iye eyetokel’ino ofaikola punda?

⁶Baeki loonga lau kwa aongi Yesu lau la bato lomachel’iyo.

⁷Iyo loesha efembeli ya punda ende Yesu, baeki lotalia bisinda yau nda bɔkɔngɔ wa yao; la Yesu loyala se nda yao.

⁸Bato wike lofalola bisinda yau se nda mboka, la basi lota bafifa ba tosandu se nda mboka ebatenik’iyo nda bilanga.

⁹La ebaetelaka oso l’ebatutaka mbisa, iyo lowɛlɛ lielo mbo— Hosana, Limɛngɔ la olau end’Inde oyasoya nda lina lia Ngɛnɛ,

¹⁰Limɛngɔ la olau nda yakakaelo ya Dawidi, sango wasu, Hosana nda elela ya tala.

¹¹Ongoma Yesu lɔɔtɔ Yelusaleme, nda Ndakɔ ya Mungu, la aɛlɛlɛkɛ bitotina, limɔ eoka buse bosoila litele, Inde losekwa okakɛ nda Betania amamwito la baeki liu la bambale.

¹²Lɛlɛngɔ asokwaka iyo nda Betania, Yesu looka isiye,

¹³la esika Inde lɔɛnɛ bokumo ebole la kasa, Inde loya oyɛnɛ kwa mbo atoosha tuma nda wao. Nde iyaka Inde nda wao, Inde loosha ko kasa ko kasa, eoka eula ya tuma etitayaka kɔni.

¹⁴Yesu loonga la bokumo mbo— Boto angola imɔ tuma twaɛ liasi. Baeki bande looka lioi-li.

¹⁵Iyaka iyo nda Yelusaleme, Yesu lɔɔtɔ nda Ndakɔ ya Mungu, la Inde loakola ndokusola bato ebatoungesa la ebatosomba; Inde loukokola baonga ba bafetekwani ba bieto la kangala ya ebaungesaka bikuku.

¹⁶Inde atiamachaka boto angomwito oeta Ndakɔ ani atoli ɛɛngɔ.

¹⁷Inde loekes’iyo, inde mbo— ¿Lotisɔnɔmɔ nda lokasa mbo Ndakɔ yami etotangomo Ndakɔ ya lisomboli ya bato ba yese bitoti? Kongo ko ino nd’asokela la yao, ko lisɛkɔ lia eba biya.

¹⁸Okaka iyo loasɔ-lo, kanga bieti la batikasa loluka loasɔ mbo bolek’Inde, eoka bawangaka Inde ani batotina lomwaala liekesi liande.

¹⁹Lise la lise, ani atoila buse litele, iyo losekwaka nda okenge.

²⁰Limɔ lanɔngɔ, etaka iyo nda mboka iyo lɔɛnɛ bokumo ani bosobɛɛlɛ ko la biili.

²¹Petelo loenyela loasɔ loa wao, inde loonga lande mbo— Boekesi, tɛnɛ bokumo ebotutunyiki Aɛ, wao bosobɛɛlɛ.

²²Yesu lomutola, Inde loonga lau mbo— Lendeloko Mungu.

²³Wewe, isoonga lanu mbo boto eonga la löngo-lo mbo— Ilomoko la umbolomoko tubu nda balia, ani atite fee nda otema wande, nde asoimela mbo elosoong’inde lotoya wewe, lotoya nde end’inde.

²⁴Eokao itoonga lanu mbo, loao elotolɔmbɔkɔl’ino la elotofelak’ino, imelaka mbo osɔɔlɔ loao la loao koyel’ino.

²⁵Atoemala ino ndosombola, boyala la oto loasɔ, tamɛsɛlɛk’inde, mbo Sango wanu imɔ oyale nda Use, amɛsɛlɛkɛ ino njasɔ ibe yanu.

²⁷Iyaka iyo liasi nda Yelusaleme, Yesu lɔkɛndɛkɛndɛ nda Ndakɔ ya Mungu, la kanga ebieti la batikasa la biange loya ende Inde;

²⁸iyo loonga lande mbo— ¿Otokelaka njasɔ-bi la sini isosha? ¿Ndai afak’Aɛ isosha-si shokela yao?

²⁹Yesu loonga lau mbo— Itofel’ino lofelo lɔmɔi, tamutoelaka’mi la itokambes’ino isosha esitokelaka lami njasɔ-bi;

³⁰¿Lilufi lia Yoane liaka nde elia Use kwa elia bato? Mutoelaka’mi.

³¹Iyo angɛnɛ lotafelakana, mbo— Eyambo toonga mbo liaka elia Use, limɔ Inde koonga lasu mbo ¿Eokao, monito otiaimelak’inde?

³²nde toonga mbo, elia bato… bawangäkä windi wa bato eoka batotina bimelaka mbo Yoane aaka bɔtɔndɔli wewe.

³³la iyo lomutoela Yesu mbo— Totilüwe.

³⁴La Yesu loonga lau mbo— La imi imɔ angokambes’ino isosha esitokela’mi la njasɔ-bi.