Read lokele Malako 14 Bible Online

Malako 14 - lokele bible

Malako 14

¹Atikalaka becho imbale oso wa Elambɔ eya Lieti angɛnɛ la eya lituma, kanga ebieti la batikasa loluka fofe youndes’Inde ko la shɔngɔlɔ mbo bolek’Inde,

²nde iyo loonga mbo— Inga nda lise lia Elambɔ mbo bato batakelaka etondo efi.

³Ayalaka Yesu nda Betania nda ndakɔ ya oto ɔmɔi ako Simona ewa baɛndi, la ayalak’Inde nda mɛsa, otomali loya la isako sha litalɛ, sha baningo ba liɛsɛ ba loketi lofi fafo; otomali loata isako la inde losondola bao nda otö wa Yesu.

⁴Bamɔi ebayalaka omao iyo loongana la botema wale, iyo mbo— ¿Baningo-ba basoseyama eok’iye?

⁵Bao beungesomo ani loketi lotolongela falanga mia isatɔ la yao kofomo ende eba touwe. La bato loimaima eoka ya otomali.

⁶Kongo ko Yesu loonga mbo— Machaka otomali; ¿Otosomel’inde moni? Asokeela’mi likeeli lilau fafo.

⁷Wende la eba touwe lanu mbile bitoti la atolɛmbɛ ino okeel’iyo booto, ino kokɔkɔlɔ, nde oti lami amamwito lanu mbile bitotina.

⁸Asokeel’mi kwa asokɔkɔlɔ inde; asotasondola baningo nda bindo yami oso wa loombomo loami.

⁹Itoonga lanu wewe to, mbo l’olo l’olo atonangolomo Mboli Ilau nda wenda bototi, eloasɔ-lo elosokeel’inde, loao imɔ koongomo kwa loenyelesomo loa otomali-yo.

¹⁰Lamao Yudasi wa Keliote, ɔmɔi wa eba liu la ambale, lɔkɛ ende kanga ebieti mbo awambeke Yesu end’iyo.

¹¹Okak’iyo ongoma iyo loomala finɛ, iyo lotikel’inde lisakä liofaef’inde bieto; limɔ Yudasi loluka fofe yowamba Yesu.

¹²Nda lise lia oso lia Elambɔ ya lituma, ani atool’iyo bɔkɔkɔ wa Lieti, baeki bande loonga lande mbo— ¿Olɛmbi nde mbo toɛkɛ okakomya Elambɔ ya Lieti mbo oleke yao anima to?

¹³Limɔ Inde lotoma baeki bande bambale, Inde loonga lau mbo— Kɛndɛkɛ nda okenge la amao ototowana la otolome oyatoli tei ya balia, tutak’inde,

¹⁴la olo akaɔtɛkɛ oto, ino koonga la ngɛnɛ wa ndakɔ-ao mbo— Boekesi mbo— ¿Kuku yami ya ndakɔ eyetola’mi Elambɔ ya Lieti amamwito la baeki bami, anima to?

¹⁵Limɔ boto-ao atotamb’ino kuku efi ya likolo eyesotonjomo la baonga, komyelak’iso omao.

¹⁶Baeki lɔkɛ, iyo loiya nda okenge, iyo lɔɛnɛ kwa aongiki Yesu lau, iyo lokomya Elambɔ.

¹⁷Ilaka buse likɔlɔse Inde loya amamwito la baeki liu la ambale;

¹⁸ayalak’iyo se ndola bieka, Yesu loonga lau mbo— Isoonga lanu wewe mbo ɔmɔi wanu nd’atowamba’mi, ɔmɔi oyatola bieka lami.

¹⁹Iyo looka ikɛnɛnɛ la iyo loakola ndoonga lande, ɔmɔi la ɔmɔi mbo— ¿Ende to imi?

²⁰Yesu loonga lau, mbo— Ende ɔmɔi wanu liu la ambale, oyatotaela lami nda lofɛfɛ, inde’yo.

²¹Wana wa oto atɔkɛ ndɔkɛ kwa atomoko nda Lokasa eoka yande, kongo ko aeko wale ende oto ona oyatowamba Wana wa oto. Bolau ende oto-ao ani atiaotomökö angootomo.

²²Alak’iyo, Yesu lɔɔsɔ lituma, Inde lofa kelekele, Inde louna liao, Inde lofaef’iyo liao, Inde mbo— Ɔsɔkɔ, liao lile bindo yami.

²³Limɔ Inde lɔɔsɔ kɔpɔ, Inde lofa kelekele, Inde lofaef’iyo, iyo batoti lomwa yao.

²⁴Inde loonga lau mbo— Eba bende bakila bami ba Ngɛla Eyai ebasosendolomo eoka ya bato wike.

²⁵Itoonga lanu wewe, mbo— Itiamwe imɔ liamɔ lia tuma konda lise lina elikamweke’mi liao liyai nda Bɔkɔta wa Mungu.

²⁶Limɔ iyo lochwa bɔɛlɛ, iyo lokuswa okakɛ nda löngo loa Elaya.

²⁷Yesu mbo— Ino yaatoti otokwa se eoka yami, loatomoko nde nda Lokasa mbo— Itokuchaka Botingani, limɔ bɛkɔkɔ bitomelesomoko mya.

²⁸Kongo ko mbisa ya litɛmwi liami, itoetel’ino oso konda Ngalilai.

²⁹Nde Petelo loonga lande mbo— Ango batotina bekwaka se, nde inga to imi.

³⁰Yesu loonga lande mbo— Wewe, isoonga laɛ mbo louse, ko e-bocho-bo, oso ani kɔkɔ ekati lɔkɔ̈kɔ̈lɔ̈kɔ̈ bata bambale, aɛ nd’atoanganya’mi banganya basatɔ.

³¹Petelo loongaka la ofoka mbo— Loengana nde mbo iweke laɛ, ambo itianganyëkë Aɛ. La iyo batotina loonga ko ongoma.

³²Iyo loiya nda elela, lina lia yao liko Ngetesemane, la Inde loonga la baeki bande mbo— Yalaka se ono ani Imi itosombola.

³³Yesu lotolana la Petelo la Yakobo la Yoane amamwito; Inde loakola ndoilima la ikɛnɛnɛ la lɔtɔtɔngɔ,

³⁴Inde loonga lau mbo— Botema wami bosowaa l’ikɛnɛnɛ showa, tatikalaka eya la lambaka.

³⁵Inde lɔkɛ oso sinyo, Inde lokwa se nda nyɛlɛ, Inde losombokola mbo mbile-ye ekɔkɔlɔkɔ ndoeteel’Inde fwa.

³⁶Inde mbo— Aba, Sango, otokɔkɔlɔ bitoti, sokoelaka’mi e-kɔpɔ-ye, nde tinga lisangi liami, kangä eliaɛ likelomoko.

³⁷Inde loya, Inde loosh’iyo ani batoingala tɔlɔ, Inde loonga la Petelo mbo— ¿Simona, osoingala? Otilonge ndolamba ko saa ɛmwito?

³⁸Lambaka la sombolaka mbo otaɔtɔ nda lisoshela; botema nde bosokimela, kongo ko bindo bile la bɔlɛmbu.

³⁹Inde lɔkɛ liasi okasombola ko la baoi ebaongiki Inde oso,

⁴⁰Inde loya liasi, Inde loosh’iyo basoingala tɔlɔ eoka baiso bau baaka la bolengelenge la batialuwäkä omutoel’Inde.

⁴¹La Inde loya liya lia asatɔ, Inde mbo— Ingalakaka to, taɛumaka… Engani, saa esoya; Tɛnɛ, Wana wa oto akowambomo nda besamba ya bato abe.

⁴²Emalaka, tɔɛkɛ. Inde oyatowamba’mi ale oko tina.

⁴³Aaka Inde atoonga, kwaamao, Yudasi loya, ɔmɔi wa eba liu la ambale, la amamwito lande windi wa bato la chaka la totumbe ebasokwaka ende kanga ebieti la batikasa la biange.

⁴⁴Inde oyawambi Yesu nd’afaka iyo ndembe oso mbo— Boto oyatota’mi et’inde ichou, ambo inde-yo; undesaka inde, kɛndɛkɛ lande la wɛlï.

⁴⁵Ayaka Yudasi, inde lɔkɛ mangu ende Yesu, inde mbo— Boekesi, la afak’inde ichɔu.

⁴⁶Iyo loundes’Inde la besamba yau, iyo lɔkɛ lande.

⁴⁷Kongo ko ɔmɔi wa ebaaka omao, inde lɔɔmɔlo ambɔtɛ, inde loswa bɔkɔwa wa kanga eyeti, inde lotinya inde litoi.

⁴⁸Limɔ Yesu loonga lau mbo— Osoyaundesa’mi la chaka la totumbe, kwa mbo yende wiya.

⁴⁹Lise la lise ayaliki’mi lanu, nda ndakɔ ya Mungu aekesiki’mi ino, otiundese’mi; kongo ko ebiatomoko nda Lokasa loa Mungu bikɔchɔmɔkɔ.

⁵⁰Batotina lomach’Inde, iyo lolɔmwaka.

⁵¹Kongo ko isenge simɔi lokɛsɛnɛ lande, oyalingelaka esinda efufu nda bindo, iyo lokota ndoundes’inde imɔ,

⁵²nde inde lomacha esinda, inde lolɔmwa wase.

⁵³Limɔ iyo lɔkɛsɛ Yesu ende kanga eyeti la kanga la biange la batikasa losɔngɔmɔ omao.

⁵⁴Petelo lotuta Yesu ko esika, inde lɔɔtɔ lɔ̈mbɔ loa kanga eyeti konda balɛlɛ la inde loyala se omao amamwito la betingani, inde lɔɔtɔ bösä.

⁵⁵Bakanga la batotina ba ikumbɛ loluka itɔmbɔ mbo boleke Yesu nde batiɛnɛkɛ;

⁵⁶eoka bato wike lowanjel’Inde nde bawanjeli bau angosangana.

⁵⁷Nde bamɔi loemala owanjel’Inde mbo— Iso tokaka Inde atoonga mbo—

⁵⁸Imi nd’atomelesa Ndakɔ-ye ya Mungu eyakelomoko la besamba ya bato, limɔ nda becho isatɔ, itoswa yasi eyetikelomo la besamba.

⁵⁹Kongo ko anyo imɔ bawanjeli bau angosangana.

⁶⁰Lamao kanga eyeti loemala atiteni ya ikumbɛ, inde lofela Yesu mbo— ¿Otiamutole ango lioi? Tɔtɔmbɔ etosoya l’ebato-ba twende moni?

⁶¹Nde Yesu loyalaka tau angomutola lioi. Limɔ kanga eyeti lofel’Inde liasi mbo— ¿Aɛ wende Masiya, wana wa Oyainelomu?

⁶²Yesu mbo— Yende ongoma, la wɛnɛkɛ Wana wa oto atoyalaka se nda bosamba w’olome wa Bofoka l’ani atoya nda bafita ba use.

⁶³Limɔ kanga eyeti losalaka bisinda yande, inde mbo— ¿Tolukeke tɔtɔmbɔ twasi eok’iye?

⁶⁴Ino osooka inde asosɛɔlɔ Mungu, likomyi lianu lile moni? Iyo yaatotina lof’Inde se mbo engani ndowa.

⁶⁵Bamɔi loakola ndochwɛlɛ Inde sɔi la ndolinja bɔmbɔ wande la ndoom’Inde toku la ndoonga lande mbo— Tatɔndɔlɔkɔ. Limɔ betingani loundes’Inde, iyo loomak’Inde mbaka.

⁶⁶Ayalaka Petelo lousa nda balɛlɛ, bosali ɔmɔi boseka wa kanga eyeti loya end’inde la

⁶⁷ɛnɛk’inde ani Petelo atɔɔtɔ bösä, inde lotichak’inde la wɛlï limɔ inde mbo— Aɛ imɔ oyaliki amamwito la ewa Nasalene ako Yesu.

⁶⁸Nde Petelo loanganya, inde mbo— Itiluwe Inde la itiluwe elosoong’aɛ. Limɔ inde lokuswa konda ɛɔtɛlɔ ya ndakɔ limɔ kɔkɔ lota lokɔ̈kɔ̈lɔ̈kɔ̈.

⁶⁹La boseka lɔɛnɛ inde liasi la inde loakola ndoonga la ebaemalaka omao mbo— Oyo ende ɔmɔi wau.

⁷⁰La Petelo loanganya imɔ liasi, la mbisa ya mbile sinyo ebemali omao loonga la Petelo mbo— Wewe, wende ɔmɔi wau, eoka wende imɔ wa Ngalilai.

⁷¹Limɔ inde loakola ndosenda bieo la ndotinya ekano mbo— Itiluwe oto-yo oyatoongel’ino.

⁷²Limɔ kɔkɔ lota lokɔ̈kɔ̈lɔ̈kɔ̈ lita lia ambale la Petelo loenyela lioi eliaongaka Yesu mbo— Oso ani kɔkɔ ekati lokɔ̈kɔ̈lɔ̈kɔ̈ bata bambale otoanganya’mi banganya basatɔ. Limɔ aenyelaka Petelo ongoma, inde lolelaka.