Read lokele Malako 15 Bible Online

Malako 15 - lokele bible

Malako 15

¹Aaka bonyanya bososɔswa, lisasaya kanga ebieti la biange la batikasa iyo lɔɔtɔ ikumbɛ, iyo lokanda Yesu, iyo lɔkɛ lande mbo bamachek’Inde nda besamba ya Pilato.

²Pilato lofela Yesu mbo— ¿Aɛ wende Bɔkɔta wa BaYuda? Yesu lomutoel’inde mbo— Aɛ nd’aongi.

³Kanga ebieti lowanjakel’Inde bawanjeli wike;

⁴limɔ Pilato lofel’Inde liasi mbo— ¿Otimutole ango lioi? Toka, bawanjeli wike ebatowanjel’iyo Aɛ.

⁵Nde Yesu angomutola ango sinyo imɔ, la ongoma Pilato lomwaala finɛ.

⁶Nda lise lia Elambɔ, Pilato ayalaka la boyaeli wofaikoela boto ɔmɔi wa ebakandomu kwa akalɛmbɛkɛ iyo angɛnɛ.

⁷Oto ɔmɔi lina liande liko Balaba, akandomuku amamwito la ebachwakaka kuko ya bita la ebaolaka bato.

⁸Windi wa bato loya ndoyafelaka Pilato mbo akeelek’iyo kwa akelakaka inde oso.

⁹Inde lomutol’iyo mbo— ¿Olɛmbi nde mbo ifaikoeleke ino Bɔkɔta wa BaYuda?

¹⁰eoka Pilato lolembeela mbo kanga ebieti basoesha Yesu nda likomyi ko l’eoka ya lisiela kongo.

¹¹Kongo ko kanga ebieti lofumbesa bato mbo afaikoelek’iyo ko Balaba.

¹²Pilato lomutoel’iyo liasi mbo— ¿ikeleke to moni la boto oyasotangomo lanu mbo Bɔkɔta wa BaYuda?

¹³Iyo loanjanja liasi mbo— Olaka’Inde nda lieka.

¹⁴Pilato mbo— Eoka iye? ¿Boni obe ebosokel’Inde? Kongo ko iyo loanjanja likama liasi mbo— Olak’Inde nda lieka.

¹⁵Limɔ Pilato losɔmbɔɛl’iyo Balaba, eoka alɛmbɛkɛ ndoomalesa windi wa bato. Limɔ ani Yesu asoomakomo fimbo, Pilato lɔkɛsɛ Inde nda liwa nda lieka.

¹⁶Basilikani ba Pilato lɔkɛ la Yesu nda lɔmbɔ loa ndakɔ yau, lamao iyo lota botükä wau bototina,

¹⁷iyo lowates’Inde esinda etelu limɔ iyo lotaka likala lia kɛ̈kɛ̈ iyo lotel’Inde liao nda otö,

¹⁸iyo lolamokol’Inde mbo— Ho, Bɔkɔta wa BaYuda.

¹⁹Iyo looma botö wande la isosola, iyo lochwɛlɛ Inde sɔi, iyo loswel’Inde balui se kwa lisemoli.

²⁰Limɔ asilak’iyo ndot’Inde kungutu, iyo losokoel’Inde esinda etelu, iyo lowates’Inde esinda yande angɛnɛ, limɔ iyo loumes’Inde okaol’Inde nda lieka.

²¹Iyo loundesa oto ɔmɔi ako Simona wa Kulene ani atosekwa nda bilanga, iyo lotoles’inde lieka lia Yesu. (Oto ona aaka sango wa Alesandelo la Lufu.)

²²Iyo loesha Yesu nda elela eyatomoko mbo Ngolongota, litina mbo:— Longö-loa-otö.

²³Lamao iyo lotamb’Inde bänä ebabuyani la lisoo mbo amweke nde atiɔsɛ bao.

²⁴Iyo loanyemes’Inde nda lieka limɔ iyo lokaana esinda yande ko ndota ngongo nda likao elikaɔlɛkɛ oto la oto.

²⁵Buse wiyelaka bonyanya booku ani baanyemesaka Yesu nda lieka.

²⁶Loasɔ elosowanjelomo Inde losɔnɔmu nda lionga mbo— Bɔkɔta wa BaYuda.

²⁷Baanyemesaka eba beoni lisanga amamwito lande, ɔmɔi nda bosamba wa olome la oyɔmɔi nda ewa wali.…

²⁸

²⁹Ebetaka losungakel’Inde, iyo lofilingakel’Inde betö, iyo mbo— Aha, oyatomelesa Ndakɔ ya Mungu koswa liasi ko la becho isatɔ,

³⁰uwesaka lokomba loaɛ angɛnɛ, sokwaka nda lieka.

³¹Imɔ ko kanga ebieti lolimbokol’Inde la batikasa lisanga, iyo mbo— Auwekesäkä basi, atikɔkɔlɛ ndouwesa lokomba loande angɛnɛ;

³²Masiya Bɔkɔta wa Isalaele asokweke nda lieka, mbo twɛnɛkɛ la toimeleke. La ebaanyemesomoko lande iyo imɔ lolimbol’Inde.

³³Ayaka buse ifitika, lilima lokwa nda yese etotina konda lilongolongo.

³⁴Lamao nda lilongolongo Yesu lota limiki lifi, Inde mbo— Eloi, Eloi, lama sabakatani? Litina mbo, ¿Mungu wami, Mungu wami, moni osomacha’mi booi?

³⁵Bamɔi ebaemalaka ina, iyo looka, iyo mbo— Toka, asota Eliya lioi; la ɔmɔi lokwa mangu okafɔɛsɛ lilamba nda bänä, inde lota liao nda ifende, inde lof’Inde amweke; la inde loonga mbo— Macha, twɛnɛkɛ ango Eliya ataya oyasokol’Inde omao.

³⁶

³⁷Nde Yesu lota limiki lifi, Inde lokusola luli nda liwa.

³⁸Esinda ya Ndakɔ ya Mungu losalya yaki imbale, ko likolo ko se.

³⁹Ɛnɛkɛ Komanda wa basilikani oyaemaelaka tina la Yesu, ani asokwel’Inde se, inde mbo— Fufo, boto’yo ende ngo Wana wa Mungu.

⁴⁰Batomali baaka esika sumbu otichaka elokelomu, bako Malia wa Mangandala, la Malia nyango wa Yakobo, oyo ɔkɛkɛ, la ewa Yose, la Salome, la basi

⁴¹ebatutaka Yesu la ebatinganaka lande ani akɛndɛlɛkɛ Inde Ngalilai la batomali basi imɔ ebayiki nda Yelusaleme amamwito lande.

⁴²Iyaka buse litele, eoka mbo wende buse wotonja lise lia Yenga,

⁴³oto ɔmɔi ako Yosefa wa Alimataya, oyaaka wolitesomo wa ikumbɛ la oyalukaka loyo loa Bɔkɔta wa Mungu, oto-ao lɔkɛ la lotendela ende Pilato okaömba bolyo wa Yesu.

⁴⁴Nde Pilato lomwaala mbo asotakwela se, inde lota Komanda lioi, inde lofel’inde ango asosila ndowa.

⁴⁵Aluwesomökö inde ongoma ende Komanda, Pilato lofaefa Yosefa bolyo wa Yesu.

⁴⁶Inde losomba bisinda bifufu; asulolak’inde bolyo wa Yesu se, inde lolingela Inde la bisinda, limɔ inde loinges’Inde nda losai eloafuwomökö nda batalɛ, la inde loundukokola litalɛ lifi liolinja ɛɔtɛlɔ ya losai.

⁴⁷Malia wa Mangandala la Malia nyango wa Yose loticha elela olo aingesomökö Inde.