Read lokele Malako 4 Bible Online

Malako 4 - lokele bible

Malako 4

¹Yesu loakola liasi ndoekesa bato nda ngɔngɛ ya eliya, la windi wa bato lolingel’Inde woeta ewa oso, eokao Inde lokwa nda watɔ, Inde loyala se nda watɔ ani bato loyala nda ngɔngɛ.

²Inde loekes’iyo njasɔ wike kola bembila. Nda liekesi liande Inde loonga lau mbo— Toka kɔni, bɔlɔi lokalɔɔ koto;

⁴alɔɔkɔ inde koto ongoma, bimɔi lokwa nda mboka, la nɔli loya oyala yao,

⁵la yasi bimɔi lokwa nda elela olo ayali batalɛ, angwɛnɛ nyɛlɛ wike, yao lɔɔ̈tɔ̈ lisasaya eoka ya nyɛlɛ yotalangu.

⁶Nde ayaka löwa ifitika, yao lobɛɛlɛ la njöwa, yao lobɛɛkɛlɛ fee eoka angwɛnɛ biili.

⁷La yasi bimɔi lokwa nda kɛ̈kɛ̈ limɔ kɛ̈kɛ̈ lɔɔ̈tɔ̈ la kɛ̈kɛ̈ lonyɛlɛ koto, yao angota tuma.

⁸Yasi bimɔi lokwa nda nyɛlɛ ilau, yao lɔɔ̈tɔ̈, yao lota tuma wike, bimɔi kama isatɔ, bimɔi kama liambɛ, bimɔi kama liu.

⁹Inde loonga mbo— Oyale la batoi booka, okeke.

¹⁰Ayalaka Yesu la baeki bande liu la ambale, iyo angɛnɛ, ebaaka lau lofel’Inde loasɔ loa bombila-bo.

¹¹Inde loonga lau mbo— Ende ino kongo njasɔ ebisoisomo ya Bɔkɔta wa Mungu, yao koisolomo; kongo ko ende ebale lousa loa Bɔkɔta wa Mungu, bitotina bitokambesomo kola bembila, mbo

¹²bɛnɛkɛ nde la baiso ko liɛnɛlɛ, la mbo bokeke liokela, angoluwa litina mbo batakalangana la mbo batamɛselɔmɔ.

¹³Inde loonga lau mbo— Otiluwe nde litina lia bombila-bo? Otoluwa to batina ba bembila yasi moni?

¹⁴Bɔlɔi atolɔɔ lioi (lia Mungu)

¹⁵bato bamɔi bale kwa mboka eyalɔɔmɔkɔ lioi, limɔ atook’iyo, lisasaya Satana atoyasokola lioi elisolɔmɔ end’iyo.

¹⁶Ongoma bamɔi bende kwa elela ya batalɛ eyalɔɔmɔkɔ koto, atook’iyo lioi batoaola lisasaya la limɛngɔ

¹⁷kongo ko bati la biili ndatiteni yau, batoumwa ko mbile sinyo, limɔ atoya tale la likongolomu eoka ya Lioi, lisasaya batokwa se.

¹⁸Basi bale kwa ebasolɔɔmɔ nda kɛ̈kɛ̈, batooka Lioi

¹⁹nde bifembi ya wenda la lilimbi lia bieto la yɛmɛ ya yeka yasi, bitoyanyɛɛlɛ Lioi, liao angota tuma.

²⁰La ebamɔi bende ebalɔɔmɔkɔ nda nyɛlɛ ilau, iyo batooka Lioi, batota tuma; bamɔi kama isatɔ, bamɔi kama liambɛ, bamɔi kama liu.

²¹Limɔ Yesu loonga lau mbo— ¿Paka etɔɔsɔmɔ eoka ndosɛlɔmɔ ose ya ɛɛngɔ kwa ose ya tange? ¿Eti mbo esɛlɔmɔkɔ nda yɛnɛsɛlo?

²²Ongoma angwɛnɛ yeka eyaisami sakolo ko ndoisolomo, angwɛnɛ loasɔ eloisomuku sakolo ko ndoyenɛlɛ fololo.

²³Boto eyala la batoi booka, okeke.

²⁴Nde Inde loonga lau mbo— Enyelaka la wɛli yao ebitook’ino, ikwelo esitokwel’ino, ongoma sitokwelomo lanu; la botalia botaliomoko end’ino.

²⁵Eoka end’inde oyale la yeka, efomoko nde inde; nde oyati la yeka, yao eyale lande kɔɔnɔkɔlɔmɔ end’inde.

²⁶Inde loonga mbo— Bɔkɔta wa Mungu bole kwa mbo oto atolɔɔ koto nda nyɛlɛ,

²⁷limɔ atoingala la atosiswa, la ocho la löwa, ani koto bitoɔ̈tɔ̈ la bitokonda, inde angolüwa bɔɔ̈tɛlɔ,

²⁸nyɛlɛ etɔɔ̈tɛkɛsɛ yao angɛnɛ koto, litɔmbɔ oso, limɔ lififa, limɔ bongenge wa bangwindi.

²⁹Nde atotela bangwindi, lisasaya ngɛnɛ kotoma oto la kɛmbɛ, eoka eula esoya.

³⁰Yesu loonga mbo— Totokwela Bokɔta wa Mungu la boni bɔfɔnɔ? la tototela wao la boni bombila?

³¹Bole kwa lokoto loa mbase elosolɔɔmɔ nda nyɛlɛ. Lole lokoto lokɛkɛ, loeti bitoti la bɔkɛkɛ.

³²kongo ko atokonda loao, lotolongela tosasandu tototina la lotota beta la nɔli bitɔkɔkɔlɔ okela bikalingo yau nda liyɔmbɛ lia loao.

³³Kola bembila wike, kwa ebi ebisokɔkɔlɔ iyo ndooka litina, Yesu loonga lau Lioi,

³⁴la Inde angoonga lau sakolo ko la bombila. Inde loluwesa baeki bande angɛnɛ litina ko iyo angɛnɛ kongo.

³⁵Lise-ao, ilaka buse litele, Yesu loonga lau mbo— Tolekeke nda boili wasi.

³⁶la iyo losenyana la windi wa bato, la baeki lɔkɛ lande, kwa ayali Inde nda watɔ. Biatɔ yasi lɔkɛsɛnɛ lande,

³⁷la lomba lofi loa lofofo loya la batutu loomakana nda watɔ, wao wasiakaotuma la balia.

³⁸Inde angɛnɛ loyala nda wendo ani aingalaka ilɔ nda liongaotö; iyo losisɔlɔ Yesu, iyo mbo— Boekesi, atowa iso ani, Aɛ angookel’iso ngandi?

³⁹Inde loemala, inde loima fofo, Inde loonga la balia mbo— Latemaka, yalaka hai. La lomba lotemba tembelele, la loao lolatema late.

⁴⁰Inde loonga lau mbo— ¿Owängiki ani monito? Okayali nde la lilendelu?

⁴¹Kongo ko iyo lowänga la bɔwa finɛ, iyo loongana mbo— Ende to ndai, eoka la lomba la balia bitolitesa lioi liande?