Read lokele Luka 12 Bible Online

Luka 12 - lokele bible

Luka 12

¹Nda mbile-ao, bilɛfu ya bato losɔngɔkɔmɔkɔ end’Inde, iyo lomatakelanaka, la Yesu loakola ndoonga la baeki bande oso, Inde mbo— Ɛnɛkɛ la wɛlï ndoengwa lisoo lia lituma lia BaFalusi, liko liisi lia wewe;

²eoka angwɛnɛ angɔmɔi eyisami sakolo ko yoisolomo mbisa; angwɛnɛ eloisomu, ko mbo lolüwomoko mbisa.

³Eokao ebisoong’ino nda lilima, yao yokanaka nde nda löwa; la bitotina ebiong’ino iyoiyoi nda kuku ya ndakɔ, yao bitakomoko boeki nda bɛtɔndɔ ya ndakɔ.

⁴Itoonga lanu ako baina lami, Imi mbo— Owängëke ebatoola bindo, nde batikɔkɔlɛ okel’imɔ loasɔ loasi.

⁵Nde itotaim’ino loasɔ loa oyengani ndowängomo; wängaka nde Inde oyale la isosha, mbisa ya liwa, ndoumbola nda Ngehena, eingo, Imi nd’asoonga lanu mbo— Wängaka nd’Inde.

⁶¿Mbo bɛnjwɛɛ bɔɔmwi biitoungesomo la bakute bambale? Nde ango ɔmɔi wa yao angoungomo la Mungu.

⁷Aambo eyanu swee ya betö bisoluwana loketi; eokao owangëke eoka ino nd’asolongela bɛnjwɛɛ wike.

⁸Itoonga imɔ lanu mbo— Boto eaolela’mi nda baiso ba bato, ambo Wana wa Boto aolaka nde inde nda baiso ba bakitomo ba Mungu.

⁹Nde boto eanganya Imi nda baiso ba bato, inde eanganyomoko nda baiso ba bakitomo ba Mungu.

¹⁰Boto esingwa lioi lia litɔ̈ngi lia Wana wa Boto, atomɛsɛlɔmɔ, kongo ko oyatosɛɔlɔ Bolimo Botanu aitomɛsɛlɔmɔ.

¹¹Atokɛsɛ iyo okɛs’ino oso wa bekumi nda bisɔngɔmɛlɔ, kwa oso wa eba isosha, otakelëke bolenda ani atomutol’ino, kwa atoong’ino,

¹²eoka Bolimo Botanu atoekes’ino ko la mbile-ao yao ebikaongek’ino.

¹³Limɔ boto ɔmɔi nda ekuke loonga la Yesu mbo— Boekesi, ongaka la boloo wami mbo akaeke botiko lami.

¹⁴Nde Yesu lomutoel’inde mbo— ¿Boto, ndai ati nde Imi wateli la bokaeli wanu?

¹⁵Inde loonga la bato mbo— Lambaka la tinganaka la wɛlï loasɔ loa bolole bototina, eoka liwawi lia boto liitolendelo ko shetesele sha yao ebisɛlɛ inde.

¹⁶Limɔ Inde lotel’iyo bombila, Inde mbo— Elanga ya lifoka lotaka tuma la bieka wike wike;

¹⁷la inde loenyela nda botema wande mbo, Ikeleke to iye eoka iti’mɔ la biiselo yoengana yoisa tuma twa elanga yami?

¹⁸Inde mbo— Itokel’ani, itoukola bikukelo ebile lami la itoswa yasi yolonga bifi, limɔ itoisa la befonga la biengo yami ina.

¹⁹La itoonga la liwawi lia botema wami mbo— Liwawio, ososɛlɛ bieka la bieto likama ebisois’aɛ yoengana miaka wike; ɛumaka, laka, mwaka, kelaka limɛngɔ!

²⁰Kongo ko Mungu loonga lande mbo— Ebebe, ako aɛ; la ocho-bo, liwawi liaɛ litɔɔsɔmɔ end’aɛ; limɔ ebisokukya aɛ nda yiselo, ndai atɔɔlɔ yao?

²¹Lole ko ongoma la oto oyatosɔnja bieto end’inde angɛnɛ; nde atifote l’eya Mungu.

²²Lamao Yesu loonga la baeki bande mbo— Eokao, itoonga lanu Imi mbo— Otakelëke bolenda loasɔ loa liwawi lianu mbo ¿Totola to nd’iye?; la eoka ya bindo yanu mbo ¿Totowata nd’iye?

²³Liwawi lisoeta yeka yola la bindo bisoeta bisinda yowata.

²⁴Tichaka la enyelaka nɔli biko bengate, biitolɔɔ koto, biitotwaka eula, biti la biiselo kwa kumbo, nde Mungu nd’atoles’iyo bieka; ino oisolongela nɔli la loketi?

²⁵¿Ndai wanu kokɔkɔlɔ ko l’iyeli kongo, ndotalia ango sinyo kwa linganjo nda liwawi liande?

²⁶¿Eokao, otikɔkɔlɛ ndokela loasɔ-lo lɔkɛkɛ, monito ototakela bolenda nda yasi?

²⁷Tichaka la enyelaka fototo, ani atokonda yao; biitokuwa, biitotita elamba; nde itoonga lanu mbo, ango Solomo angɛnɛ la bɔfɛkɔ wande wa likama, atiawatäkä bɔfɛkɔ woengana bɔfɛkɔ wa lɔfɔtɔtɔ lɔmɔi.

²⁸¿Ango Mungu asowatesa ko chwingi etosoyala louse nda elanga nde lɛlɛngɔ totoumbolomo nda litumbo, nde simbi to Inde aitowates’ino, bato ba lilendelu likɛkɛ?

²⁹Otalukëke mbo bini ebitolak’iso la bini bitomwak’iso ko la toloi nda betema, eoka bato ba wende batokalukake bieka-bi,

³⁰Nde Sango wanu nd’aluwi mbo otoeno bieka-bi.

³¹Talükaka Bɔkɔta wa Mungu, limɔ ebi-bitotina kofomoko imɔ ino.

³²Ino ba itutunda, owangëke, eoka lisangi lia Sango wanu lile ko ndofaef’ino Bɔkɔta.

³³Ungesaka yao ebisɛl’ino la kaaka yao likaela (eoka ya ngandi); kelaka batanga boisa bieto ebatiweke liyele, ango bondanda olo nda Use eboitoomelo, olo wiya angoiyela, olo sambola angobebesa wao;

³⁴eoka olo ayali bondanda waɛ, botema waɛ ngo ko omao.

³⁵Wanjaka bɛkɔli ngau nda tɛta yanu la undaka täla yanu bianesomu,

³⁶ani oyali ngo ko kwa bato ebakoumbakela liinwi lia ngɛnɛ wau nda elambɔ ya lisɔngɔni, mbo akayeke inde la akatiteke inde, limɔ iyo kolioel’inde bome lisasaya.

³⁷Bɛkɔwa ana bende la limɛngɔ, eoka akayeke ngɛnɛ wau, inde koosh’iyo ani bakolamb’inde. Itoonga lanu wewe, mbo ngɛnɛ ona kokanda bɔkɔli, atoyales’iyo se, limɔ atoya okael’iyo bieka.

³⁸Eya ngo ko nda ɛsɔkɔ, ambo ko la yömbe kongo, nde inde koosh’iyo ongoma, bɛkɔwa ana bende la limɛngɔ fuu.

³⁹Olüwi nde ndolüwa mbo eya ngo mbo ngɛnɛ wa ndakɔ alüwäkä oso ko mbile eyekayeke ewa wiya, ani alambäkä la botengu l’ani atiamachäkä mbo ndakɔ yande efindolomoko la wiya.

⁴⁰Eokao enganaka yose, eoka Wana wa Boto eyaka nda mbile eyeitoenyela lanu.

⁴¹Petelo loonga mbo— ¿Ngɛnɛ, osotela nd’iso ebombila-bo kwa eoka ya bato batotina?

⁴²Limɔ Ngɛnɛ mbo— ¿Ndai to atoyala bonyafala wa likɔchi la wa wɛlï oyasotalia inde bonyafala wa bato bande mbo akaelek’iyo bieka yau la lisho lioengana?

⁴³Bɔkɔwa ona ende la olau la limɛngɔ ani ngɛnɛ wande atoyaosh’inde nda likuwa lia bɔfɔnɔ-bo.

⁴⁴Isoonga lanu wewe mbo atotalia boto ona bonyafala wa yeka yande bitotina.

⁴⁵Nde eyambo bɔkɔwa ona obe, eonga nda botema wande mbo— Ngɛnɛ wami asoumwaka oya; lamao inde koakola oomaka bɛkɔwa batolome la batomali, la ndolaka la ndomwaka, la ndowaka bänä,

⁴⁶limɔ ngɛnɛ wa bɔkɔwa ona eyaka nde nda bocho ebotïlüwe inde la ebotiwɛlɛ inde ngɛnɛ baiso, atomomol’inde la fimbo la atosɛl’inde amamwito la ebatilendelomo.

⁴⁷Nde bɔkɔwa ona oyalüwäkä lisangi lia ngɛnɛ wande nde angokomyel’inde, angolitesa lisangi liande, inde ekuchomoko la tɔnyɔlɛ wike;

⁴⁸kongo ko oyatialüwäkä, nde kokelaka njasɔ yoengana likuchi, inde ekuchomoko la tɔnyɔlɛ tɔmyo kongo. Eingo, ebafomu nde wike, ambo befelomoko imɔ ko wike; la oyasotaliomo, ona efelomoko botalia imɔ.

⁴⁹Isoya oyata bösä nda wenda-bo. ¿Iye eyelɛmbi nde’mi eyambo wao bokongana?

⁵⁰Yende la lilufi elikalufimoko’mi, aina tokange etokanjomu Imi konda akakɔchɔmɔkɔ liao!

⁵¹¿Otangi nde mbo isoyasɛlɛ lilatemi nda wenda-bo? Mbayɔ, Imi mbo, kangä liwesani.

⁵²Ko anyo bato bɔɔmwi nda ndakɔ ɛmɔi batokaakana, basatɔ kowesana la bambale, bambale la basatɔ.

⁵³Batowesakana, sango la wana wande; wana otolome la sango; nyango la wana otomali; la wana la nyango wande; boïlana la wali wa wana; la wali wa wana la boïlana.

⁵⁴Limɔ Inde loonga imɔ la bikuke ya bato mbo— Wɛnɛ bafita la mbole, ino koonga lisasaya mbo— Mbula y’efalala etotɔnɔ, la etotɔnɔ ongoma.

⁵⁵Wɛnɛ lofofo lotosokwa fangi ya liɔmbɛlɛ, ino koonga mbo— Buse botoya l’etao; la botoya nde l’etao ongoma.

⁵⁶Ino balimbakeli, bolüwi nde ndolembeela wɛnɛli wa buse la se; ¿Monito otilüwe ndoleembela wɛnɛli wa mbile-ye?

⁵⁷¿Monito boitoleembela, ko ino angɛnɛ, yao ebiengani ndokela.

⁵⁸Atɔkɛ aɛ la wiyani okakomyelomo loasɔ oso wa bokumi, kotaka ndosilesa loao nda mboka mbo atakɛs’aɛ ende juge, la mbo juge atakɛs’aɛ ende Botingani wa bɔnyɔlɔlɔ, mbo bonyafala atakand’aɛ bɔnyɔlɔlɔ.

⁵⁹Isoonga laɛ mbo otiasekwe omao ko nd’akakambeke aɛ bitotina fɛɛ, angotikala ango sɛngi.