Read lokele Luka 13 Bible Online

Luka 13 - lokele bible

Luka 13

¹Nda mbile-ao bamɔi loyakambes’Inde loasɔ loa BaNgalilai bamɔi, mbo Pilato asobiäkä bakila bau amamwito la nyama eyoläk’iyo ndotamba Mungu, nda lifaefi.

²Yesu lomutoel’iyo mbo— ¿Otangi nde mbo BaNgalilai bana bayaläkä bato babe boeta BaNgalilai batotina basi ko eoka mbo baokesakomökö bifembi ani?

³Isoonga lanu mbo— Mbayo, la sakolo ko ino bokalangana, ani ino bosɛɛsɛlɛkɛ imɔ ko ongoma.

⁴¿Kwa eba liu la bonanɛi ebawäkä la loukwo loa ndakɔ ya botalemu bofi nda Siloa; otangi nde mbo bayaläkä bato ba batwanelo boeta batotina basi nda Yelusaleme?

⁵Isoonga lanu mbo— Mbayo, la sakolo ko ino bokalangana, ani ino bosɛɛsɛlɛkɛ imɔ ko ongoma.

⁶Yesu lota imɔ ko bombila-bo:— Boto ɔmɔi alɔɔ̈kɔ̈ bosau nda elanga yande, limɔ ayäk’inde oyalukä sau, angwɛnɛ tuma.

⁷Inde loonga la bosali oyatinganäkä l’elanga mbo— Tɛnɛngo, miaka isato kw’eyayeliki’mi oyaluka tuma nda bosau-bo, kongo ko ikɔsi; tindaka wao, ¿Bosoemakala nda nyɛlɛ wawa litina moni?

⁸Botingani lomutola mbo— Tamachaka wao imɔ ko emwaka-bo, kond’atofuwaka’mi nyɛlɛ, limɔ itota toi,

⁹lamao eyambo bota tuma nda mwaka boyai, ambo olau; nde eyambo botiɔtɛ, aɛ kotinda wao.

¹⁰Nda lise lia Yenga, aekesäkä Yesu nda ɛsɔngɔmɛlɔ,

¹¹botomali lɔɛnɛlɛ omao oyayaläkä la bolimo wa lokambo ko miaka liu la bonanɛi la ainamäkä angokɔkɔlɔ ndoemesa bindo yande ango sinyo.

¹²La ɛnɛ̈kɛ̈ Yesu wɛnɛ inde, Inde lota otomali lioi, Inde mbo— Botomali, ososɔmbɔlɔmɔ lokambo elole laɛ.

¹³Inde lota besamba yande nda lokomba loande, lisasaya otomali loninwa, inde loinela Mungu.

¹⁴Lamao Bokumi wa ɛsɔngɔmɛlɔ losoma finɛ eoka mbo Yesu louwesa boto nda lise lia Yenga; inde loonga la bato mbo— Bacho ba likuwa bende liambɛ, yauku to la bacho ana mbo bosäsesomoko, inga nda lise lia Yenga,

¹⁵Nde Yesu lomutoel’inde mbo— Ino balimbakeli! ¿Oto la oto wanu, aitosɔmbɔlɔ mbolo kwa funda yande, okakɛse yao mbo bimweke balia ango la lise lia Yenga?

¹⁶Tɛnɛ ebotomali-bo, wana wa Abalayama, oyasokandomo la Satana ko miaka liu la bonanɛi, lotiengane mbo asɔmbɔlɔmɔkɔ likala-li la lise lia Yenga?

¹⁷Aongäk’Inde baoi-ba, ebaiyel’Inde lofomo sɔni la batotina loomalaka eoka ya bikeli ya tala ebiakelomökö lande.

¹⁸Eokao Inde loonga mbo— ¿Bɔkɔta wa Mungu bole kwa iye? Itokwela wao l’iye?

¹⁹Bole kwa lokoto loa mbasɛ, boto lɔɔsɔ loao, inde lolɔɔ loao nda elanga yande, loao lɔtɔ, loao lokonda isandu angɛnɛ limɔ nɔli bitoya oyakela bikalingo yau nda beta ya shao.

²⁰Inde loonga imɔ liasi mbo— ¿Itokwela Bɔkɔta wa Mungu l’iye?

²¹Bole kwa fulofulo eyundi otomali ndokaisa la ndosoya nda kilo isatɔ ya lɔkɛ̈kɛ̈ (eoka yokela lituma) mbo bitotina biulweke la fulofulo.

²²Atandeläkä Yesu bekenge la tokekenge, Inde loekekesa bato olo aetäk’Inde la mboka yɔkɛ fangi ya Yelusaleme.

²³Boto ɔmɔi lofel’Inde mbo— ¿Ngɛnɛ, bende to bamyɔ ebauwesomu? Yesu loonga mbo—

²⁴Fumbanesaka ndɔɔtɔ nda bome ewamwanu, eoka Imi mbo, bende bato wike ebakoluka ndɔɔtɔ omao, nde baitokɔkɔlɔ;

²⁵eoka akaemaleke ngɛnɛ wa ndakɔ, la akalieke inde bome, ino koakola ndoemakala lousa la ndotitaka bome la ndoonga mbo— Ngɛnɛ, lioelak’iso bome, nde Inde atomutola lanu mbo— Itilüwe ino; ¿Wende yandai?

²⁶Limɔ boakola ndoonga mbo— Iso toliki bieka, tomwiki nde amamwito laɛ, waekesak’iso nda lɔ̈mbɔ loasu.

²⁷Nde Inde eongaka lanu mbo— Isokambes’ino mbo Itilüwe ino; ¿wende yandai? Sokwa ende’mi, ino bakeli ba njasɔ bibe.

²⁸Omao eyalaka bileli la ngɛlɛtɛ ya bainyo ani akɛnɛk’ino wɛnɛ Abalayama la Yisaka, la Yakobo la Batɔndɔli batotina amamwito nda Bɔkɔta wa Mungu l’ani ino angɛnɛ bolaumbolomoko lousa.

²⁹Bato basi besokwaka fangi ya batɛmwɛlɔ ba bonyanya la fangi ya litele, la fangi ya nord la fangi ya sud ndoyayalaka se nda bieka nda Bɔkɔta wa Mungu.

³⁰Tɛnɛ ngo, bende mbisa bako eba oso, l’eba oso beyalaka ko mbisa.

³¹Nda mbile-ao BaFalusi bamɔi loya ende Yesu, iyo mbo— Kɛndɛ, okasokwa nda yese-ye, eoka Helodi asangi ndool’Aɛ.

³²Inde lomutola lau mbo— Kɛndɛkɛ okaonga la faa ena ako Bolimbo mbo— Tɛnɛ! louse la lɛlɛngɔ itokusola belimo ebe la itosäsesa eba kambo ndɔɔlɔlɔ limɔ la bocho wa isatɔ, yetungesa likuwa liami.

³³Kongo ko loengani nde lami mbo itangweke la louse la lɛlɛngɔ la yöse imɔ eoka lotienganeke mbo Bɔtɔndɔli aolomoko nda bokenge wasi, kangä nda Yelusaleme!

³⁴Aeko Yelusaleme, Yelusaleme oyatoolaka batɔndɔli, oyatökushaka batälɛ boola ebatomomuku end’aɛ; aina mbile eyokiki Imi yɛmɛ yosonjaka bana baɛ, kwa atokukya kɔkɔ bana bande ose ya bafafu bande, kongo ko ino angolɛmbɛ.

³⁵Tɛnɛ, bokenge wanu bosomachana lanu ko isimo, kongo ko isoonga lanu mbo— Otiangoɛnɛ’mi imɔ konda eyekaongek’ino mbo— Limɛngɔ liyeke lande oyatoya nda lina lia Ngɛnɛ.