Read lokele Luka 15 Bible Online

Luka 15 - lokele bible

Luka 15

¹Limɔ bɛsɔnji ya bɛsɔmbi la bato ba njasɔ ibe, iyo yaatotina loya tina lande ndoyalaila Yesu;

²la BaFalusi la Batikasa imɔ loimaima mbo— Boto-yo atonyangela ebabe la atolana lau bieka.

³Eokao, Yesu lokambes’iyo ebombila-bo, Inde mbo—

⁴¿Oni boto wanu oyayali la bɛkɔkɔ kama liu, elefesa ango ɔmɔi wau, aitomacha yao kama libwa la libwa nda isimo, ani inde atɔkɛ okaluke bona ebosolefana, ko nd’akoshek’inde wao?

⁵Akoshek’inde wao, inde kota wao nda kɔndɛ yande la limɛngɔ;

⁶limɔ akayek’inde nda ndakɔ yande, inde kota baina lande la bayalani lande lioi, inde koonga lau mbo— Okaka limɛngɔ amamwito lami, eoka isoosha bɔkɔkɔ ewalefäkä.

⁷Imi nd’atoonga lanu-mbo— Ko ongoma limɛngɔ liokanaka nda Use loasɔ loa boto ɔmwito wa obe oyatokalangana, elitoeta limɛngɔ loasɔ loa bato kama libwa la libwa ba liengani, ebati la boeno wa likalangani.

⁸Botomali to oyale la falanga liu; ¿elefesa lɔmɔi, mbo aitoanesa täla, aitɔɔmbɔkɔ ndakɔ okaluke la bofiili kond’akoshek’inde loao?

⁹Limɔ akoshek’inde loao, inde kota baina la bayalani lande lioi, mbo— Okaka limɛngɔ amamwito lami, eoka isoosha lofalanga elolefesiki’mi.

¹⁰Itoonga lanu mbo— Ko ongoma limɛngɔ liokanaka nda baiso ba Bakitomo ba Mungu loasɔ loa boto ɔmwito wa obe oyatokalangana.

¹¹Yesu loonga mbo— Boto ɔmɔi aaka la bana batolome ambale,

¹²la etungani loonga la sango wande mbo— Fafa, faka’mi likaɔ lia botiko elikaɔlɛkɛ’mi. La sango lokaana lau bitotina yande.

¹³Mbisa ya becho bimɔi itungangɔlɔ losɔnjaka eyande bitoti, inde lomacha bokenge wande okakɛ yese y’esika; omao inde lomelekesa bieto yande ko la yeka wawa.

¹⁴La asilesäk’inde bieto yande bitotina, limɔ löndo lofi lokwa nda yese ena, inde loakola ndoyala la boeno ofi.

¹⁵Inde lɔkɛ okawatema la boto ɔmɔi wa yese ena la boto ona lotom’inde nda bilanga yande mbo afeke ndei yande bieka.

¹⁶Inde lookaka yɛmɛ yookanelo la mboso ya kunde eyaläkä ndei, nde angwɛnɛ boto wof’inde yeka.

¹⁷Aenyäk’inde loasɔ loande, inde mbo— Aina basali ba sango wami bende la bieka yoengana la yosandelo se ani imi nd’asowa eyamaya l’isiyɛ.

¹⁸Itoemala ikɛkɛ ende sango wami, yeongaka lande mbo— Fafa, isotwanelo oso wa Use la nda baiso baɛ imɔ,

¹⁹itiengane ndotangomo imɔ wana waɛ; sɛlɛkɛ’mi kwani ayali basali baɛ.

²⁰Inde loemala, inde lɔkɛ ende sango wande. Nde akoyal’inde esika, sango wande lɔɛnɛ wana, inde lookel’inde ngandi, inde lokwa mangu okakusamel’inde kingo, inde lofa wana ichɔu;

²¹Wana loonga la sango mbo— Fafa, isotwanelo oso wa Use la nda baiso baɛ, itiengane ndotangomo imɔ wana waɛ; sɛlɛkɛ’mi kwani ayali basali baɛ.

²²Kongo ko sango loonga la bɛkɔwa yande mbo— Mangumangu; eshaka kanju eyelau finɛ, watesak’inde, fak’inde iketi shota nda isangakala shande la tokwaka twa batindi bande,

²³eshaka efembeli ya ngɔmbɛ bonuku, olaka yao, toleke elambɔ la limɛngɔ;

²⁴eoka mbo wana-yo wami awäkä la akoyali; alefäkä, nde asɔɛnɛlɛ oko liasi; la iyo loakola ndoficha limɛngɔ.

²⁵Kongo ko wana wange loyala nda elanga. Ainwäk’inde la ayaläk’inde tina la ndakɔ inde looka bakwengu la bɛɛlɛ ya bisha.

²⁶Inde lota wana ɔmɔi lioi, inde lofel’inde litina lia loasɔ-lo.

²⁷Inde lomutola mbo— Etungani yaɛ asoya la sango waɛ asoola efembeli ya ngɔmbɛ bonuku, eoka asoosh’inde la bosasu la wɛlï.

²⁸Nde boloo lotwa bolengi, la atilɛmbɛkɛ ndɔɔtɔ nda ndakɔ. Nde sango wande lokuswa ndokalɔmbɔkɔl’inde,

²⁹limɔ inde lomutola la sango mbo— Toka! Isokuwel’aɛ kwa bɔkɔwa emiaka-bi wike, ikatefoli ndola yaɛ ango ɛmɔi, nde otifeke’mi ango efembeli ya mbuli mbo ificheke limɛngɔ amamwito la baina lami;

³⁰kongo ko asoya ewana-yo waɛ, oyasolaka bieto yaɛ amamwito la batomali ba bolëfë, oisoolel’inde efembeli ya ngɔmbɛ bonuku.

³¹Sango loonga lande mbo— Wana, wende lami becho betotina, la bitotina yami yende imɔ ko eyaɛ.

³²Loondu nde mbo tokeleke elambɔ la limɛngɔ, eoka etungani yaɛ’yo, awäkä nde akoyali la liwawi; alefäkä, nde asɔɛnɛlɛ oko liasi.