Read lokele Luka 5 Bible Online

Luka 5 - lokele bible

Luka 5

¹Aemaläkä Yesu tina la eliya ya Ngenesaleta bato ba ekuke losɔngɔmɛl’Inde la bokamu mbo bokeke Lioi lia Mungu,

²Inde lɔɛnɛ biatɔ imbale ebiswami se nda ngɔngɛ, ani baluwi bakwi se okasoola biɛngɔ.

³Inde lokwa nda watɔ ebomani la Simona la Inde lofel’inde mbo ailieke sumbu watɔ owale, limɔ Inde loyala se ina, Inde loekesa bato ba ekuke ani ayali nda watɔ.

⁴Asiläk’Inde ndoonga lau, Inde loonga la Simona mbo— Kɛsɛkɛ watɔ nda balia ba olundu owale; taka biɛngɔ nda balia oluwa swi.

⁵La Simona lomutola lande mbo— Ngɛnɛ, ko la ocho buse ya, kwa eyaluwelik’iso totiole yeka, kongo ko eoka ya lioi liaɛ, itota wɛngɔ nda balia.

⁶Akeläk’iyo ongoma, iyo losamba bolïlye ofi wa swi ebilindani la wɛngɔ, la wao loakola ndotenyatenya,

⁷limɔ iyo lota basaɔ bau lioi ebayaläkä nda watɔ ebɔmɔi mbo bayeke oyasung’iyo. Iyo loya, iyo lotumesa biatɔ imbale la swi la yao yasiakoliya.

⁸Kongo ko ɛnɛ̈kɛ̈ Simona Petelo ongoma, inde lokwa balui se oso wa Yesu, inde mbo— Sekwaka ende’mi, Ngɛnɛ, eoka yende boto obe.

⁹Eoka inde la ebayalani lande, iyo lotwa liena lia losambo lofi loa swi eloasambäk’iyo,

¹⁰imɔ ko la Yakobo la Yoane bana ba Sebedayo ebayalanäkä lau nda botükä, iyo lotwa liena. Yesu loonga nde la Simona mbo— Owangëke, konda louse waluwa nde bato la liwawi.

¹¹Asuliäk’iyo biatɔ nda ngɔngɛ, iyo lomachaka bitotina, iyo lotutaka Yesu.

¹²Ayaläkä Yesu nda okenge ɔmɔi, futuku boto wa baɛndi bawau loya; la ɛnɛ̈k’inde wɛnɛ Yesu, inde lotulia bɔmbɔ se konda nyɛlɛ, inde lolɔmbɔkɔlɔ Yesu mbo— Ngɛnɛ, bɔlɛmbɛ, Aɛ kokɔkɔlɔ ndotanesa’mi.

¹³Yesu lonanola bosamba, Inde lomat’inde, Inde mbo— Ilɛmbi nde ongoma, tanesomoko to.

¹⁴Lisasaya baɛndi losokwa end’inde. Yesu loima inde mbo— Okambesëke oto angɔmɔi, nde kɛndɛkɛ okatamba bindo yaɛ ende kanga la faefaka Mungu lifaefi kwa atäkä Mose ekela eoka ya lotaneso loaɛ, kwa ndembe ende bato.

¹⁵Kongo ko mboli yande lomelana yoeta eyaoso, la bikuke bifi ya bato loyasɔngɔmɔ end’Inde ndooka Inde la ndouwekesomo ngwo yau.

¹⁶Nde Yesu loisamaka nda liɔmbɛlɛ, Inde losombokola omao.

¹⁷Loaäkä nde lise limɔi, aekesäk’Inde bato, mbo BaFalusi la Baekesi ba bikela bayaläkä se tina, ebasokwäkä nda bekenge bitotina ya Ngalilai la Yudea la Yelusaleme la bofoka wa Mungu loyala la Yesu mbo uweseke bato.

¹⁸Futuku, batolome bamɔi loeshel’Inde boto oyaingesomu nda tange la loo loa lonyango; iyo loluka mboka yɔɔtɛs’inde nda ndakɔ mbo basɛlɛk’inde se oso wa baiso ba Yesu.

¹⁹Atiɛnɛ̈kɛ̈ bato mboka yɔtɛs’inde eoka ya bokamu, iyo lolila olikolo lia losambo, iyo losulol’inde se nda tange ko la lifola nda losambo, inde loaa se, sisi yau, oso wa baiso ba Yesu.

²⁰Ɛnɛkɛ Yesu liimeli liau, Inde loonga lande mbo— Boto, njasɔ ibe yaɛ bisomɛsɛlɔmɔ.

²¹Nde Batikasa la BaFalusi loakola ndofelana la fee, mbo— ¿Ndai-yo oyasosɛɔlɔ Mungu? ¿Ndai atokɔkɔlɔ ndomɛsɛlɛ njasɔ ibe, sakolo ngo ko Mungu angɛnɛ?

²²Nde aluwäkä Yesu baenyeli bau ba fee, Inde lomutoela iyo mbo—, ¿Monito osota fee nda betema yanu?

²³¿Loni losoeta la bɔlɛmbu, kwa ndoonga mbo— Njasɔ ibe yaɛ bisomɛsɛlɔmɔ, kwa ndoonga mbo— Emalaka la tangwaka?

²⁴Kongo ko, mbo boluwesomoko mbo Wana wa boto ale l’isosha shomɛsɛlɛ njasɔ ibe ono se, Inde loonga la ewa lonyango mbo— Imi mbo— Emalaka, ilaka tange yaɛ, kɛndɛkɛ nda ndakɔ yaɛ.

²⁵Lisasaya inde loemala oso wau, inde loila tange eyaingaelak’inde, inde lotangwa nda ndakɔ yande, ani atoinela Mungu la limɛngɔ.

²⁶La iyo yaatotina lomwaala, iyo loinela Mungu ko la bɔwa, iyo mbo— Tosɔɛnɛ to tolombo louse.

²⁷Mbisa ya loasɔ-lo, Yesu lokuswa nda ndakɔ; limɔ Inde loɛnɛ oto ɔmɔi, bɔsɔmbɛsi ako Lewi, ani ayaläkä se nda ɛsɔnjɛlɔ ya bosombi, la Inde loonga lande mbo— Tutaka’mi.

²⁸Lewi lomacha eyande bitotina, inde loemala, inde lotuta Yesu.

²⁹La Lewi lokeela Yesu elambɔ efi nda ndakɔ yande, la ekuke efi ya bɛsombɛsi la basi imɔ loyala se ndola bieka amamwito lau.

³⁰Nde Batikasa la BaFalusi bau loimaimela baeki bande, mbo— ¿Monito botola la botomwa amamwito la bato babe?

³¹Yesu lomutoel’iyo mbo— Ebale la bosasu baitolüka bonganga, kangä eba kambo.

³²Itiye ndoyata eba liengani lioi, kangä bato ba njasɔ ibe mbo bakalanganeke.

³³Nde iyo loonga lande mbo— Baeki ba Yoane batokilakaka bieka la batosombokolaka, la baeki ba BaFalusi ko ongoma, kongo ko baeki baɛ batolakaka la batomwakaka.

³⁴Nde Yesu loonga lau mbo— ¿Atoyalaka tolesani amamwito la oyatosɔngɔ, otokɔkɔlɔ nde ndokufesa iyo mbo batala bieka?

³⁵Nde bacho beyaka nde ani bɔsɔngi atɔɔnɔkɔlɔmɔ end’iyo, limɔ ko nda lise lina iyo kokila bieka.

³⁶Yesu lokambes’iyo imɔ ko bombila, mbo— Boto aitowamba esinda ya liɔmbɔ la yaki ya esinda eyai; ekela ongoma, ani eyeyai etosalyaka la imɔ yaki eyesekwi nda eyeyai angosangan’imɔ la eya liɔmbɔ.

³⁷Boto aitoangola bänä bayai nda biuku ebisoumwa eoka mbo bänä bataacha biuku limɔ bänä batowɛlɛkɛmɛ se la biuku imɔ kowa.

³⁸Nde bänä bayai batowɛlɔmɔ nda biuku biyai. Boto oyasomwa bänä ba lilaka, angooka yɛmɛ yomwaka ebayai, eoka atoonga mbo— Eba oso bako lilaka basolonga l’olau.