Read lokele Yoane 14 Bible Online

Yoane 14 - lokele bible

Yoane 14

¹Omachëke mbo botema botatemeke; lendeloko Mungu la lendeloko imɔ ko Imi.

²Nda ndakɔ ya Sango wami biyaelo wike biyali; etiyale nde ongoma, ani isokambesa nd’ino, eoka itɔkɛ okatonjel’ino elela.

³Yɛkɛ okatonjel’ino elela, yelainwaka ndoyɔs’ino olo eyami, mbo olo atoyala Imi, ino koyala imɔ ko omao. Ino oluwi nde olo atɔkɛ lami la oluwi imɔ ko mboka.

⁵Tomasa loonga lande mbo— Ngɛnɛ, totiluwe olo atɔkɛ laɛ, totoluwa to mboka la moni?

⁶Yesu loonga lande mbo— Imi yende Mboka la Wewe la Loiko, angwɛnɛ boto wɔkɛ ende Sango, sakolo ngo ko ɛkɛ ko lami.

⁷Boluwa Imi, ani ino koluwa imɔ ko Sango wami; ko kwani osoluw’Inde, osɔɛnɛ Inde.

⁸Filipo loonga lande mbo— Ngɛnɛ, ɛnɛsɛkɛ to iso Sango limɔ betema bitoa se.

⁹Yesu lomutola lande mbo— ¿Kwani asoumwa Imi amamwito lanu ko mbile yumwa, mbo aɛ Filipo otiluwe’mi? Oyasɔɛnɛ’mi asɔɛnɛ imɔ ko Sango; ¿Monito aɛ otofela mbo ɛnɛsɛkɛ iso Sango?

¹⁰¿Oitoimela mbo Imi yende la Sango la mbo Sango ale imɔ lami? Baölo ebatoonga’mi eonga lanu, itionge lanu l’isosha shami angɛnɛ, nde Sango oyayali lami, Inde nd’atokelaka bekeeli yande.

¹¹Imelaka to Imi mbo Imi yende la Sango la Sango imɔ lami; ango ko l’eoka ya bekeeli angɛnɛ ebitokelaka’mi.

¹²Wewe, wewe itoonga lanu mbo— Oyatolendelo Imi, ko bekeeli ebitokelaka’mi, inde kokelaka imɔ ko yao, la inde kokela imɔ ko bekeeli yolongela yao, eoka ikokɛndɛ ende Sango.

¹³La bitotina ebikafelek’ino ko la lina liami, Imi kokela ngo ko yao, mbo Sango ataliomoko tala ko la Wana.

¹⁴Bofela’mi yeka ko la lina liami, Imi nd’atokela yao.

¹⁵Bosama’mi, ambo bolitesaka nde bikela yami,

¹⁶limɔ Imi nd’atofela Sango, la Inde efaefak’ino wasi oyatoyala Boongeli[1] wanu woyalaka lanu layalaya

¹⁷ako Bolimo wa wewe; eba wenda batikɔkɔlɛ ndofomo Bolimo-bo, eoka baitoɛnɛ Inde la baitoluwa Inde, nde ino nd’aluwi Inde, eoka Inde ayali lanu la eyalaka lanu.

¹⁸Iitomach’ino kwa bana ba booi, yeyaka nde end’ino.

¹⁹Ko mbile sinyo kongo, limɔ wenda botiɛnɛkɛ imɔ Imi, nde ino wɛnɛkɛ nde Imi; eoka Imi yende la liwawi, ino imɔ boyalaka nde la liwawi.

²⁰La lise-ao, ino boluwaka mbo Imi yende la Sango, la mbo ino wende lami la Imi imɔ lanu.

²¹Inde oyalitesi nde bikela yami, ambo inde ona oyatosama Imi, oyatosama’mi esamomoko nde la Sango wami; yesamaka inde la yɛnɛnɛkɛ Imi angɛnɛ end’inde fololo.

²²Yudasi-inga ewa Keliote-lofela Inde mbo— ¿Ngɛnɛ, loyi nde moni mbo wɛnɛnɛkɛ Aɛ angɛnɛ end’iso fololo, inga to ende eba wenda?

²³Yesu lomutola lande mbo— Boto esamaka nde Imi, ani elitesaka lioi liami limɔ Sango wami esamaka nde inde la iso toyaka nde end’inde la tosɛlɛkɛ inde kwa eyaelo yasu.

²⁴Oyatisame Imi, aitolitesa baoi bami; nde lioi elitokak’ino liti liami kangä elia Sango oyatomakä’mi.

²⁵Isoonga ebaoi-ba lanu ani ikoyali lanu.

²⁶Nde Boongeli ako Bolimo Botanu oyakatomeke Sango otomel’ino ko la lina liami, Inde nd’atoekekes’ino bitotina la eenyelesak’ino bitotina eyakambesak’ino Imi angɛnɛ.

²⁷Isotikel’ino lilatemi, isofaef’ino eliami lilatemi; nde itifaef’ino kwa akafeke wenda of’ino. Omachëke mbo botema botatemeke, ofëfëke la bɔwa.

²⁸Osooka kwa aongiki’mi lanu mbo isɔkɛ la yeinwa end’ino liasi; eyambo wasamaka Imi, ani wokaka limɛngɔ eoka isɔkɛ ende Sango; eoka Sango alongeli nde Imi.

²⁹Isotakambes’ino oso ani lokayi, mbo akayeke loao, wimeleke nde Imi.

³⁰Itiaong’imɔ lanu baoi wike, eoka Bokakalesi wa wenda-bo atoya, nde ati lami la loasɔ ango lɔmɔi;

³¹kongo ko itokelaka ngo kwa atelaka Sango otela’mi bikela mbo wenda boluweke mbo isosamaka Sango. Emalaka to, totangweke!