Read lokele Yoane 6 Bible Online

Yoane 6 - lokele bible

Yoane 6

¹Mbisa yaamao, Yesu loleka eliya ya Ngalilai-eko eya Tibelia-

²nde bikuke ya bato lotutak’Inde eoka bɛ̈nɛkɛ̈ tolombo etokelik’Inde ende eba kambo.

³Yesu lolila to nda löngo, Inde loyala se omao amamwito la baeki bande.

⁴Elambɔ ya BaYuda, eko Lieti, yaaka tina.

⁵Iläkä Yesu baiso, Inde loɛnɛ bikuke ina ya bato batoya end’Inde, Inde loonga la Filipo mbo— ¿Tosombeke batuma bolesa ebato-ba ko anima?

⁶Inde loonga la Filipo ongoma ndokɔtɔlɔ inde, eoka Inde angɛnɛ aluwi ani atokel’Inde.

⁷Filipo lomutola lande mbo— Batuma ba loketi loa falanga mia imbale angoengana l’ebato-ba mbo boto la boto aɔlɛkɛ ko sinyo.

⁸Ɔmɔi wa baeki bande, ako Andelo, etungani ya Simona Petelo, inde loonga lande mbo—

⁹Wainɛngɛ ale ono oyasɛli beila bɔɔmwi la swi imbale. ¿Kongo yende iye yokaela ende bato-ba wike?

¹⁰Yesu loonga mbo— Yalesak’iyo se. Twingi wike twäkä nda elela ena, iyo loyala to se, batolome benganäkä loketi loa bilɛfu bɔɔmwi.

¹¹Lamao Yesu lɔɔsɔ beila, Inde lofa kelekele, Inde lofaekefa bato ebayalaka se, la swi imɔ ongoma, kwa alɛmbɛk’iyo.

¹²Okanelöko iyo batotina, Inde loonga la baeki bande mbo— Sɔnjaka twinyo twa bieka ebitikali mbo yeka etalefana.

¹³Eokao, iyo losɔnja, iyo lotumesa bisaka liu la imbale la twinyo twa beila bɔɔmwi etosotikala ende ebaläkä.

¹⁴Lamao ɛnɛkɛ bato ilombo eshakeläk’Inde, iyo mbo— Wewe, Inde ende Bɔtɔndɔli oyakayeke nda wenda.

¹⁵Aluwäkä to Yesu mbo basikioyaund’Inde mbo batalieke Inde Bɔkɔta, Inde loinwa mbisa okakɛ nda löngo ko Inde angɛnɛ.

¹⁶Iläkä buse likɔlɔse, baeki bande lɔkɛ ko nda ngɔngɛ ya balia,

¹⁷iyo lokwa nda watɔ, iyo loilya owale okaleka eliya fangi ya Kafenauma. Nde akwäkä lilima se, l’ani Yesu akayi kɔni end’iyo;

¹⁸eliya lokwelo batutu eoka lomba lofi lofofa.

¹⁹Alükak’iyo kilometa bɔɔmwi, iyo lɔɛnɛ Yesu atotandaka olikolo lia balia, tina la watɔ, iyo lowänga.

²⁰Nde Yesu loonga lau mbo— Yende Imi, owangëke!

²¹Asangäk’iyo ndot’Inde nda watɔ, kwaamao watɔ loiya nda ngɔngɛ olo aɛk’iyo.

²²Lɛlɛngɔ, batɔ ba ekuke ebatikaläkä fangi yasi ya eliya, iyo lɔɛnɛ mbo angwɛnɛ watɔ wasi, ko wao ebokwiki la baeki kongo, la mbo Yesu angɛnɛ atikwe lau nda watɔ, la mbo baeki bande basɔkɛ iyo angɛnɛ,

²³(Nde bitumbe bimɔi ya Tibelia loya oyaelama tina la elela olo aläkä bato beila mbisa ani Yesu lofa kelekëlë.)

²⁴Limɔ ɛnɛ̈k’iyo to mbo Yesu at’imɔ omao, la baeki bande imɔ ati omao, iyo lokwaka nda bitumbe bina, iyo lɔkɛ nda Kafenauma ndokaluke Yesu.

²⁵La oshak’iyo oosha Yesu fangi yasi ya eliya, iyo loonga lande mbo— ¿Labi, oyi nde eya l’eni to mbile?

²⁶Yesu lomutola lau mbo— Wewe, wewe, itoonga lanu mbo, otiye oyaluka Imi eoka ya ndembe ya tolombo eyɛnɛ̈k’ino, kangä eoka oliki nde batuma la okaneluku.

²⁷Okuwelëke bieka ebitosɛɛsɛlɛ, kangä bieka ebitokata ko nda liwawi lia lokato, yao ebitofaefa Wana wa Boto efaef’ino, eoka Sango ako Mungu asot’Inde ndembe mbo asokuly’Inde.

²⁸Limɔ iyo loonga lande mbo— Tokeleke to moni mbo bekeeli yasu biomaleseke Mungu?

²⁹Yesu lomutoel’iyo mbo— Ebo bole bokeeli ebolɛmbi Mungu, boko mbo bolendeloko Inde oyatomomu la Mungu.

³⁰Iyo loonga to lande, mbo— ¿Eokao, eni ndembe ya ilombo esitokel’Aɛ, mbo twɛnɛkɛ la twimeleke Aɛ; eni ndembe eyetokel’Aɛ?

³¹Batata basu baläkä Mana nda liɔmbɛlɛ, kwa atomöko nda Lokasa mbo— Afäk’iyo lituma eliasekwäkä nda Use mbo baleke.

³²Yesu loonga nde lau mbo— Wewe, wewe, itoonga lanu mbo— Atiäkä Mɔsɛ oyafäk’ino lituma lia Use, kangä Sango wami oyakof’ino lituma lia wewe elisosekwa nda Use.

³³Lituma lia wewe liende liao elitosekwaka nde Use la elitofaka liwawi ende eba wenda.

³⁴Iyo loonga to lande mbo— Ngɛnɛ, faefaka’iso litumali lise la lise.

³⁵Yesu loonga lau mbo— Imi yende Lituma lia liwawi. Inde oyatoya ende’mi atilokek’imɔ isiyɛ liasi, la inde oyatolendelo’mi, atilokek’imɔ yɛmɛ yomwa liasi.

³⁶Nde yaongäkä lanu mbo osɔɛnɛ Imi, nde oitoimela.

³⁷Batotina ebatofa Sango ofa’mi, beyaka ende Imi la oyatoya ende Imi, Imi angofeka inde.

³⁸Eoka isokwi nde nda Use, inga ndoyakelaka lisangi liami angɛnɛ, kangä lisangi liande oyatomäkä Imi.

³⁹Lisangi liande oyatomäkä’mi liko mbo itialefeseke angomwito wa batotina ebafäk’Inde ofa’mi, nde yetɛmwɛsɛk’iyo la liwawi nda lise lia liko.

⁴⁰Eli liende lisangi lia Sango wami, liko mbo batotina ebatɔɛnɛ Wana la ebatolendelo Inde, ambo bɛɔlɔkɔ nde liwawi lia layalaya la mbo Imi yetɛmwɛsɛk’iyo la liwawi nda lise lia liko.

⁴¹Limɔ BaYuda loimaimel’Inde eoka aongäkä mbo Imi yende Lituma elisosekwa nda Use.

⁴²Iyo mbo— ?Oyo ati Yesu, wana wa Yosefa, toisoluwa sango la nyango wande? Monito asoonga kwani mbo— Isokwi nde nda Use?

⁴³Okimakimanëke;

⁴⁴angwɛnɛ oto wokɔkɔlɔ oya ende’mi, sakolo ko Sango oyatomäkä’mi nd’asosuly’inde la Imi nd’atotɛmwɛsɛ inde la liwawi nda lise lia liko.

⁴⁵Losotomo nda Kasa ya batɔndɔli mbo— Batotina bekesomoko ko la Mungu. Oyasoka limiki lia Mungu la asoekesomo lande, inde atoya ende’mi.

⁴⁶Eti to mbo boto aɛni nde Sango, sakolo ngo ko Inde oyayali wa Mungu, Inde nd’ɛnɛ̈kɛ̈ Sango.

⁴⁷Wewe, wewe itoonga lanu mbo— Oyasoimela asɔɔlɔ liwawi lia lokato.

⁴⁸Imi yende Lituma lia Liwawi;

⁴⁹batata banu baläkä Mana nda liɔmbɛlɛ la bawäkä.

⁵⁰Eli liende lituma lia Use elisulwi nde se mbo boto oyatola liao, angow’imɔ.

⁵¹Imi yende Lituma lia liwawi elisosokwa nda Use; eyambo boto elaka e-lituma-li, eyalaka nde la liwawi konda layalaya; la lituma elitofa’mi of’inde, liende bindo yami ebitofa’mi loasɔ loa loiko loa wenda.

⁵²Eoka ya loao, BaYuda lowesakana, iyo mbo— ¿Botoyo atokɔkɔlɔ ndof’iso bindo yande yola ko moni?

⁵³Yesu loonga to lau mbo— Wewe, wewe, itoonga lanu mbo, sakolo ko bola bindo ya Wana wa Boto la bomwa bakila bande, ani ot’imɔ la liwawi nd’atiteni yanu.

⁵⁴Oyatolaka bindo yami la oyatomwaka bakila bami, inde asɛli nde liwawi lia loiko la yetɛmwɛsɛk’inde nda lise lia liko.

⁵⁵Eoka bindo yami yende bieka ya wewe, la bakila bami bende limwi lia wewe.

⁵⁶Oyatolaka bindo yami la oyatomwaka bakila bami, atoyalaka lami la Imi nd’atoyalaka lande.

⁵⁷Kwa atomäkä Sango, oyale la liwawi, otoma Imi, la iyali nde la liwawi ko l’eoka yande, ko ongoma oyatolaka’mi, eyalaka nde la liwawi ko l’eoka yami.

⁵⁸Eli liende lituma eliasekwaka nda Use, inga kwa elialäkä batata banu ebawäkä; oyatolaka lituma-li, eyalaka nde la liwawi konda layalaya.

⁵⁹Aongäkä baoi-ba ani atoekekesa bato nda ɛsɔngɔmɛlɔ nda Kafenauma.

⁶⁰Ongoma baeki bande bamɔi, okakä’iyo elioi-li lia Yesu, iyo mbo— Elioi-li lile la tale finɛ. ¿Ndai to atɔkɔkɔlɔ ndokulya liao?

⁶¹Aluwäkä to Yesu mbo baeki bande basoimaimela elioi-li, Inde loonga lau mbo— ¿Mbo elioi-li lisokes’ino botema wale?

⁶²¿Eya to mbo wɛnɛ Wana wa Boto ani atoilama likolo olo ayaläk’Inde oso, ino moni?

⁶³Bolimo nd’atosɛlɛ boto la liwawi, bindo kongo angosung’iso; baoi bami ebaongäkä’mi lanu, bao bende bolimo la liwawi end’ino.

⁶⁴Nde bende bamɔi banu ebaitoimela. Nde Yesu loluwa konda liako ebatiimeleke la oyakawambek’Inde;

⁶⁵la Inde loonga mbo— Ko l’eokao yakambesak’ino mbo angwɛnɛ boto wokɔkɔlɔ ndoya ende’mi sakolo ko efomo isosha sha Sango.

⁶⁶Laamao baeki bamɔi wike loinwainwa la batikɛndɛ-kɛndɛk’imɔ lande.

⁶⁷Limɔ Yesu loonga la eba liu la ambale mbo— ¿La ino imɔ olɛmbi ko ndosokwa?

⁶⁸Simona Petelo lomutoel’Inde mbo— Ngɛnɛ, tɔɛkɛ to ende ndai? Aɛ wende la baoi boluwesa loiko loa layalaya,

⁶⁹la iso nd’asoimela la toluwi nde kwani mbo Aɛ wende Ebotanu wa Mungu.

⁷⁰Yesu lomutola lau mbo— ¿Iisoaa ino, eba liu la ambale? Nde ɔmɔi wanu ende bolimo obe.

⁷¹Inde loonga loasɔ loa Yudasi wana wa Simona wa Keliota, eoka inde, ako ɔmɔi wa eba liu la ambale, akawambek’Inde ende BaYuda.