Read lokele Tomo Ya Batomomu 10 Bible Online

Tomo Ya Batomomu 10 - lokele bible

Tomo Ya Batomomu 10

¹Aaka nda Kaisalia boto ɔmɔi lina liande liko Kolenelio, ako Komanda wa botükä wa basilikani ewatangomoko mbo Botükä wa Italia.

²Ayalaka boto wa liengani la bolitesi wa Mungu, inde la eba bofindi wande batotina; boto wa lifafu liofaefa bato bakaɔ la oyasombokolaka Mungu la bofiili.

³La lilongolongo, inde lɔɛnɛ liɛni ko swa mbo Bokitomo wa Mungu atɔɔtɔ ndakɔ l’ani atoonga lande mbo— Kolenelio.

⁴Nde inde lowɛlɛ inde liseme la bɔwa finɛ, inde mbo— Bwana, end’iye to? Bokitomo mbo— Basombokoli baɛ la lifafu liaɛ wike basoiya oso wa Mungu ndoenyelomo lande.

⁵Tomaka to kwani wɛndi nda Yopa ndokɔsɔ Simona, boto oyatangomu imɔ mbo Petelo;

⁶akoyali bɔɛnda ende Simona wömesi wa kofo ya nyama, ndakɔ yande ele tina la balia ba bokwa.

⁷Asokwaka bokitomo oyaongaka lande, limɔ inde lota bɛkɔwa imbale ya ndakɔ la bosilikani ɔmɔi wa liengani oyatinganaka lande lise la lise,

⁸limɔ inde losanoel’iyo loasɔ lototina, la inde lotom’iyo yaatotina nda Yopa.

⁹Lɛlɛngɔ aɛk’iyo nda lɔkɛndɔ, l’ani iyak’iyo tina la okenge, nda ifitika Petelo lolila olikolo lia ndakɔ okasombola omao.

¹⁰Limɔ inde lowa l’isiye la inde loka yɛmɛ yola, nde akolamb’iyo olambel’inde bieka, inde lowa itɔɔ,

¹¹la inde lɔɛnɛ liɛni, buse loliolomo la yeka kwa lündü lofi loa esinda losulwa se, eloakandomoko bekulu nda tokululu tɔnɛi.

¹²Bɛfɔnɔ bitotina ya nyama la ebitolandalanda la nɔli imɔ yayalaka omao atiteni ya loao.

¹³Limɔ limiki lookomo mbo— Petelo, emalaka, olaka, laka!

¹⁴Nde Petelo loonga mbo— Mbayo, Ngɛnɛ, eoka itileke yeka ango sinyo, ani ekasaesomu bokili, l’ani ekatanesomu.

¹⁵La limiki lookomo lande liasi, mbo— E-yeka-ena eyesotanesa Mungu, aɛ angotanga mbo ende bokili.

¹⁶Bitotina-bi lokelakomo bakela basatɔ la mbisa yeka ena losuliomo futuku nda use.

¹⁷Awaka Petelo toloi toluwa litina lia liɛni eliɛnɛk’inde, kwaamao bato ebatomomoko la Kolenelio la ebafeliki ndakɔ ya Simona, iyo loemala oko nda biome.

¹⁸Iyo loamama ndofela kwa mbo Simona oyatangomo Petelo aingali bɔɛnda onomono.

¹⁹Limɔ aenyalaka Petelo e-liɛni-li, Bolimo loonga lande mbo—

²⁰Tɛnɛ, bato bambale bakoluk’aɛ; emalaka, sulwaka se la kɛndɛkɛ lau, angwɛnɛ ifɔki eoka Imi nd’atomak’iyo ende aɛ.

²¹Ongoma Petelo losulwa se okaonga la bato mbo— Tɛnɛ, imi yende boto oyatoluk’ino! ¿Lini litina elisoy’ino?

²²Iyo loonga nde mbo— Kulenelio, Komanda wa botükä wa basilikani, oto wa liengani la oyatolitesa Mungu, oyatotangomo boto bolau ko la tukela etotina ya BaYuda, oyaongelomu la bokitomu botanu mbo atomeke wɛndi end’aɛ mbo ɔɛkɛ nda ndakɔ yande mbo inde okeke inango shaɛ.

²³Ongoma Petelo lofel’iyo mbo bɔtɛkɛ okaingala nda ndakɔ. Lɛlɛngɔ Petelo loemala okakɛ amamwito lau la bamɔi ba beoto ya Yopa lokɛsɛnɛ lande;

²⁴limɔ lɛlɛngɔ eyemɔi iyo loiya nda Kaisalia. Omao Kulenelio lɔwɛlɛ loyo loau baiso ani asosɔngɔmɛsɛ eba bofindi wande la baina bande ba losamɔ.

²⁵Limɔ aɔtɔkɔ Petelo nda ndakɔ Kulenelio loyatowana lande, inde lotulama se nda bakolo bande ndosemol’inde.

²⁶Kongo ko Petelo loilak’inde likolo, inde mbo— Emalaka, imi imɔ yende ko boto kongo.

²⁷Limɔ aonganak’iyo, Petelo lɔɔtɔ nda ndakɔ, limɔ inde loosha bato wike basɔngɔmu;

²⁸inde loonga lau mbo-Ino angɛnɛ nd’aluwi la wɛlï mbo boto wa BaYuda asotomo liti mbo angowatema la bato ba tukela yasi, angokɛ fɛtɛti end’iyo. Nde Mungu asoluwesa ambo imi mbo angotanga boto angɔmɔi bokili kwa mbo atitane.

²⁹Eokao, atomoko’mi lioi, iyi nde angofeka ango sinyo. Kwani isofela to mbo— ¿Oti nde’mi lioi litina moni?

³⁰Kolenelio loonga mbo— Nda lise lia anɛi elisoeta la mbile-ye ya löwa aaka’mi atosombola nda ndakɔ yami la lilongolongo, limɔ futuku boto oyawatiki bisinda ya tongɛlingɛli loemala oso wami, inde loonga mbo—

³¹Kolenelio, lisomboli liaɛ la lifafu liaɛ wike, basoenyakelomo la Mungu.

³²Tomaka to wɛndi nda Yopa, okata Simona oyatangomu imɔ Petelo lioi, akoyali nda ndakɔ ya Simona wömesi wa kofo ya nyama, tina la balia ba bokwa.

³³Lisasaya to, itomiki wɛndi end’aɛ la kwani ko la booto waɛ osoya to. Ongoma to, iso yaatotina tososɔngɔmɔ eya kwani nda baiso ba Mungu, ndolaila bitotina ebisokambesa Mungu okambes’aɛ mbo oongeke yao.

³⁴Limɔ Petelo loakola ndoonga lau mbo— Isɔɛnɛ wewe mbo Mungu aitokwelakwela biɔmbɔ ya bato,

³⁵kongo ko nda tukela bitotina boto oyatolitesa Mungu la oyatokelaka eyengani, Mungu kokulya inde.

³⁶Ino nd’aluwi lioi eliatomaka Mungu ende BaIsalaele, liko wɛndi wa lilatɛmi ko la Yesu Masiya (ende Ngɛnɛ wa yaatotina),

³⁷wɛndi-bo wanangolomoko ko la yese etotina ya Yudea, liakoli ko nda Ngalilai la mbisa ya lilufi elianangolaka Yoane,

³⁸mbo Yesu wa Nasaleta loüchomo la Mungu ko la Bolimo Botanu la bofoka, la mbo Yesu lokakɛndɛkɛndɛkɛ okakele bolau la booto okuwese bato batotina ebakakalesomoko la Satana, eoka Mungu nd’ayalaka lande.

³⁹Iso nd’ale ebaɛni bitotina eyakelak’Inde la nda yese ya Yudea la nda Yelusaleme. Nde iyo lokakames’Inde nda isandu mbo bolek’Inde.

⁴⁰Mungu atɛmɔlɔkɔ ko E-Yesu-yo la liwawi nda lise lia asatɔ mbisa ya liwa la asɔɛnɛs’Inde fololo ende bato,

⁴¹inga ende batotina, kangä ende ebaɛni ebaaomu la Mungu oso, ambo iso ebasola la ebasomwa amamwito lande mbisa ya litɛmwi liande nda liwa.

⁴²La akambesak’iso mbo toteke boekï la tosanoeleke bato mbo ende ko Inde oyasɛlɔmu la Mungu Bokomyi wa ebakoyala la liwawi la ebasowa imɔ.

⁴³Batɔndɔli batotina batɔndɔlɔkɔ loasɔ loande mbo boto oyakaimelek’Inde, eɔlɔkɔ limɛsɛli lia batwanelo bande ko la lina liande.

⁴⁴Ani Petelo angotasila ndoonga, Bolimo Botanu lokwa end’iyo yaatotina ebokaka wɛndi.

⁴⁵Limɔ BaYuda ebimelaka ebayaka amamwito la Petelo, iyo lotwaka liena liomwaala mbo Bolimo Botanu bosowɛlɛmɛ imɔ ko ende ebati BaYuda.

⁴⁶Eoka bokak’iyo batoongana la baoi basi la batoinekela Mungu. Limɔ Petelo loonga liasi, inde mbo—

⁴⁷¿Ndai to atokɔkɔlɔ ofeka balia bolufia e-bato-ba ebasofomo Bolimo Botanu kwa asofomo imɔ ko iso?

⁴⁸La inde loonga lau mbo balufiomoko nda lina lia Yesu Masiya. Limɔ iyo lofela Petelo mbo atatikalaka lau bacho bamɔi sumbu.