Read lokele Tomo Ya Batomomu 11 Bible Online

Tomo Ya Batomomu 11 - lokele bible

Tomo Ya Batomomu 11

¹Okakä to Batomomu la beoto ebayalaka nda Yudea mbo bato ebati BaYuda imɔ basoimela wɛndi wa Mungu,

²la ainwaka Petelo nda Yelusaleme, ebalitesaka iongo sha itombe, iyo lofenyana lande, mbo—

³Waɛkɛ ende eba losunga la walaka lau bieka.

⁴Nde Petelo loakola ndosanoel’iyo loasɔ la wɛlï, inde mbo—

⁵Imi loyala nda okenge wa Yopa nda lisomboli, awaka’mi itɔɔ, imi lɔɛnɛ liɛni, yeka kwa lündü lofi loa esinda losulwa se, eloakandomoko bekulu nda tokululu tɔnɛi, yao loya ko tina lami.

⁶Atichaka’mi yao la wɛlï mbo iluweke yao, limɔ yɛnɛkɛ nyama ya okenge la eya lokonda la ebitolandalanda la nɔli imɔ.

⁷Limɔ imi looka limiki elitoonga lami mbo— Petelo, emalaka, okaka, laka!

⁸Limɔ imi mbo— Mbayɔ, Ngɛnɛ, eoka angwɛnɛ yeka eyekasaesomu bokili la eyekatanesomu ekaɔti nda bɔnɔkɔ wami.

⁹Kongo ko limiki lomutola nda use ko liasi mbo— Yeka ena eyesotanesa Mungu, aɛ angotanga mbo ende bokili.

¹⁰Bitotina-bi lokelakomo bakela basatɔ, limɔ bitotina losuliomo liasi konda use.

¹¹Tɛnɛ, kola mbile-ao bato basatɔ loiyela ndakɔ eyeyael’iso, ebatomomoko ko nda Kaisalia oyaluka’mi nda Yopa,

¹²la Bolimo loonga lami mbo ikɛkɛ lau, angwɛnɛ ifɔki; e-beoto-bi liambɛ imɔ lɔkɛsɛnɛ lami, la iso atotina lɔɔtɔ nda ndakɔ ya Komanda,

¹³limɔ inde lokambes’iso ani ɛnɛk’inde wɛnɛ bokitomo emali nda ndakɔ yande oyaongaka lande mbo— Tomaka wɛndi nda Yopa ndokɔsɔ Simona oyatangomu imɔ mbo Petelo;

¹⁴inde atoonga laɛ inango shouwes’aɛ la bofindi waɛ bototina.

¹⁵Anangolaka’mi, Bolimo Botanu lokwa end’iyo kwa imɔ ko end’iso nda baakoelo.

¹⁶Limɔ imi loenyela baoi ebaongaka Ngɛnɛ mbo— Yoane nd’alufiaka la balia, nde ino bolufiomoko la Bolimo Botanu.

¹⁷¿Eya to mbo Mungu afaka end’iyo ko lifaefi-ao eliafak’Inde imɔ ko iso ani aimelak’iso Ngɛnɛ Yesu Masiya, ani imi yende to ndai wokɔkɔlɔ ndokufesa Mungu?

¹⁸Okak’iyö ongoma, iyo loyala tau, iyo loinela Mungu, iyo mbo— Mungu asofaefa imɔ ko bato ba wenda likalangani la loiko elosoya la liao.

¹⁹Nde ebamelanaka fangi la fangi ko l’eoka ya likongolomu eliayaka loasɔ loa Setefano, iyo lɔkɛkɛ ko nda Foinike la Kupolio la Antiokia, nde batianangolaka wɛndi ende bato, sakolo ngo ko BaYuda kongo.

²⁰Kongo ko bamɔi bau, bato ba Kupulio la Kulene, iyak’iyo nda Antiokia, iyo loonga imɔ la BaHela, iyo lokambes’iyo Mboli Ilai ya Ngɛnɛ Yesu.

²¹La bofoka wa Ngɛnɛ Mungu wayalaka lau la loketi loa bato ebimelaka la ebakikwaka ende Ngɛnɛ loaaka lofi.

²²Okomokö e-mboli-bi nda batoi ba Etanda nda Yelusaleme, iyo lotoma Balanaba nda Antiokia,

²³la iyak’inde omao, inde loomala la limɛngɔ finɛ ndwɛnɛ bootaota wa Mungu end’iyo, la inde lofumbes’iyo batotina mbo bakɔkɔmesɛkɛ betema yau ndowatema la Ngɛnɛ,

²⁴eoka aaka boto bolau oyatumaka la Bolimo Botanu la liimeli, ongoma bikuke wike lowatema la Ngɛnɛ.

²⁵Limɔ Balanaba lɔkɛ nda Talusu okaluka Saulo;

²⁶la oshak’inde, inde loesha Saulo nda Antiokia. Limɔ ko la mwaka bototina iyo losɔngɔkɔmɔ la Etanda, la iyo loekesa bikuke ya bato wike omao. Baeki batomoko lina liko Eba Masiya ko oso nda Antiokia.

²⁷Nda bacho-ba to batɔndɔli basokwaka nda Yelusaleme, baɛkɛ nda Antiokia,

²⁸limɔ ɔmɔi wau ako Angabo oyaekesomu la Bolimo ongoma, inde loemala ndotɔndɔlɔ mbo londo lofi loyaka nde nda wenda bototina. Loao loya nde wewe nda mbile ya Kalaudio Kaisala.

²⁹Baeki losangana to ndotoma bieto, oto la oto kwa akɔkɔlɔkɔ inde, ndosunga beoto ebiyali nda Yelusaleme;

³⁰la iyo lokela ongoma, iyo lotoma yao ende biange ko la besamba ya Balanaba la Saulo.