Read lokele Tomo Ya Batomomu 13 Bible Online

Tomo Ya Batomomu 13 - lokele bible

Tomo Ya Batomomu 13

¹Baaka nde nda Etanda omao nda Antiokia, la batɔndɔli la baekesi, bako Balanaba, la Simona Windo, la Lukio wa Kulene, la Manae oyaaka wana wa nungesa wa Helodi Antipas, la Saulo.

²Asemolak’iyo Mungu la akilak’iyo bieka nda lisomboli, Bolimo Botanu loonga mbo— Üchelaka’mi Balanaba la Saulo nda likuwa elisotomo iyo lioi.

³Limɔ mbisa ani bakilaka bieka ko la lisomboli, iyo lotaliel’iyo besamba, iyo lotik’iyo nda lɔkɛndɔ.

⁴Atomomoko iyo ongoma ko la Bolimo Botanu, iyo lɔkɛ konda balia nda Selukia, iyo losokwa omao okakɛ la watɔ wa lofofo konda Kupolio.

⁵Iyakä iyo nda bokenge wa Salami iyo lonangola wɛndi wa Mungu nda bisɔngɔmɛlɔ ya BaYuda; baaka imɔ la Yoane Malako bosungak’iyo.

⁶Atandelak’iyo bosanga bototina ko nda bokenge wa Pafo, omao iyo loosha WaYuda ɔmɔi ako Baliesu Elima oyaaka kanga la bɔtɔndɔli wa bolimbake,

⁷oyayalaka la Bɔkɔmɔnyi wa bosanga ako Selengio Paulo oyaaka boto wa wɛlï finɛ. Inde lota Balanaba la Saulo lioi, inde loluka fofe yoka wɛndi wa Mungu.

⁸Kongo ko Elima ako kanga (litina lia lina lile mbo bosinji) inde lofekel’iyo, inde lokota ndokufesa Bɔkɔmɔnyi mbo ataimela.

⁹Lamao Saulo oyaaka imɔ la lina liasi liko Paulo, atumak’inde la Bolimo Botanu, inde lowɛlɛ Elima bonono,

¹⁰inde mbo— Aɛ oyasotuma la yɛnɔ la bolimbakeli, wana wa Satana, oyasoiyela bitotina ebiengani, otiamache ndofinyaka mboka ya liengani ya Mungu?

¹¹Tɛnɛngɔ, bosamba wa Mungu bosotalema end’aɛ la wayala nde la botuku, otiɛnɛ liso lia use ko mbile bimɔi. Kwaamao liumba la boundundu lokwel’inde, inde lotufatufa okaluke bosamba wa boto wokɛndɛs’inde.

¹²Limɔ ɛnɛkɛ Bɔkɔmɔnyi loasɔ elosokelomo, inde loimela, inde lomwaala eoka ya liekesi lia Ngɛnɛ.

¹³Limɔ Paulo la ebakɛsɛni lande, iyo loilia owale okakɛ nda Pelenga nda yese ya Pamfulia, nde Yoane Malako losɛnyana lau, inde loinwa nda Yelusaleme;

¹⁴iyo losokwa nda Pelenga, iyo loiya nda bokenge wa Antiokia Pisidia nda yese ya Galatia. Nda lise lia Yenga, iyo lɔɔtɔ nda ndakɔ ya ɛsɔngɔmɛlɔ, iyo loyala se omao.

¹⁵Mbisa ya litangi lia Lokasa loa Bikela la eloa Batɔndɔli, betoli oso ya ɛsɔngɔmɛlɔ lotomel’iyo wɛndi mbo— Beoto, eyambo wende la lioi lia lifumbesi lioonga la bato, ongaka to sumbu.

¹⁶Limɔ Paulo loemala, inde lofɛfɛl’iyo bosamba mbo bokeke, inde mbo— BaIsalaele la ino ebatolitesa Mungu, okaka to!

¹⁷Mungu wa ebato-ba ba Isalaele loaa batata basu, Inde losɛngɛs’iyo likama nda mbile eyayaelak’iyo nda Ejipeto konda asokolaka iyo omao ko la bofoka finɛ.

¹⁸Ko la miaka kama inɛi Inde loles’iyo bieka nda liɔmbɛlɛ;

¹⁹Inde lokakalesa tukela yasi osambale limɔ Inde lofaefa batata basu yese ena yau eko Kanana eyaleke lisango liau ko miaka mia inɛi la kama bɔɔmwi.

²⁰Limɔ mbisa yamao Inde lofaef’iyo Bakomyi konda mbile ya Samwɛlɛ Bɔtɔndɔli.

²¹Nde mbisa iyo lofelaka Bɔkɔta, la Mungu lof’iyo Saulo wana wa Kishi, boto wa bɔkɔ̈kɔ wa Benyamini, inde loyala bɔkɔta ko miaka kama inɛi.

²²Limɔ asokolaka Inde Saulo, Inde lofaef’iyo Dawidi ndoyala bɔkɔta wau. Mungu losanoela Dawidi mbo— Isoosha Dawidi wana wa Yese, boto oyasamomuku lami finɛ la oyatolitesa lisangi liami litotina.

²³Kwani Mungu asoeshela Isalaele Bouwesi wa bɔkɔ̈kɔ wa Dawidi, ako Yesu kwa atikak’Inde lisakä.

²⁴Oso wa loyo loande, Yoane loyataka boekï ende batotina ba Isalaele ko lilufi lia likalangani.

²⁵Kongo ko asambosilaka Yoane likuwa liande, inde loongaka mbo— ¿Otangi nde mbo yende ndai to? Imi iti Inde ako Masiya, nde Inde Oyatoya liili liami, imi itiengane ango ndofaikola ikulu sha ikwaka shande.

²⁶Beoto, bana ba bofindi wa Abalayama, l’ebanu ebatolitesa Mungu, e-wɛndi-bo bosotomomo ko end’iso yaatotina.

²⁷Eokao iyo ana ebayalaka nda Yelusaleme la betoli oso yau batialembeelaka Inde la batialuwaka litina lia baoi ba batɔndɔli ebasotangokomo Yenga la Yenga, nde bakɔchaka bao ani bafak’Inde se,

²⁸Batiɛnɛk’Inde la loasɔ loengana la liwa, nde iyo lotinjaka Pilato mbo olek’Inde.

²⁹Asilak’iyo ndokɔcha bitotina eyasɔnɔmɔkɔ nda Lokasa loasɔ loande, iyo losokol’Inde nda lieka, iyo loinges’Inde nda losai.

³⁰Kongo ko Mungu nd’akusolak’Inde nda liwa;

³¹limɔ mbisa ko la bacho wike Inde lɔɛnɛkɛlɛ ende ebasokwaka lande nda Ngalilai amamwito lande ani bayaka ono nda Yelusaleme, la iyo ana bende kwani ebatokambekesa bato njasɔ yande.

³²La iso nd’atoeshel’ino Mboli Ilau eyatikelomoko lisakä ende batata basu,

³³la Mungu asofaef’iso bana bau ko yao, ko ani asokolaka Mungu osokola Yesu nda liwa, kwa atomoko nda Bɔɛlɛ wa imbale mbo— Aɛ wende wana wami, Imi nd’asoot’Aɛ louse-lo.

³⁴La nda loasɔ loa likusolomu eliakusolaka Mungu okusola Yesu nda liwa, angofɔndɔkɔ imɔ, Mungu loonga mbo— Itofaef’Aɛ basakä batanu ebolendelomo, ebatikelomoko ende Dawidi.

³⁵La nda Bɔɛlɛ wasi imɔ aongaka mbo— Oitomacha ewaɛ wa botanu mbo ɛnɛkɛ liɔli lia liwa.

³⁶Nde Dawidi angɛnɛ akelaka lisangi lia Mungu nda fɛtɔ yande, limɔ inde lokwa ilɔ sha liwa, inde loombomo amamwito la bangau bande, la inde nd’ɛnɛkɛ liɔli lia liwa.

³⁷Nde Inde ona oyakusolaka Mungu, atiɛnɛkɛ liɔli lia liwa.

³⁸Eokao, beoto, loluwomoko lanu la wewe mbo, ko la e-Yesu-yo, ino nd’asokambesomo mboli ya limɛsɛli lia batwanelo, ko lande imɔ, boto la boto oyatolendelo Inde,

³⁹asoendolomo nda yao bitotina ebitikɔkɔlɛ inde ndoendelomo ko la Bikela ya Mɔsɛ.

⁴⁰Eokao lambaka la wɛlï to mbo lona eloaongaka Batɔndɔli, lotayaka end’ino, loko mbo—

⁴¹Tɛnɛ ngo, ino ba liolya, mwaalaka, sɛɛsɛlɛkɛ, eoka Yelakelaka loasɔ nda bacho banu elotiaimelak’ino, Ambo ani loao lokambesomoko ino fololo.

⁴²Akuswak’iyo nda ɛsɔngɔmɛlɔ, bato lofelak’iyo mbo njasɔ-bi bikambesomoko iyo liasi nda Yenga ya mbisa.

⁴³Amelanaka lisɔngɔmi, BaYuda wike la bandimela amamwito lau, iyo yaatotina lotutaka Paulo la Balanaba, la Batomomu-ba loongana lau ndofumbes’iyo mbo bakɔkɔmɛkɛ nda booto wa Mungu.

⁴⁴Ayaka Yenga ya mbisa, tina la bokenge bototina losɔngɔmɔ ndoka wɛndi wa Mungu,

⁴⁵nde ɛnɛkɛ BaYuda bikuke ya bato, iyo lotuma la lisiela, iyo lofenyakana baoi ba Paulo, iyo losɛɔlɔ inde.

⁴⁶Lamao Paulo la Balanaba loonga lau la lotendela mbo— Loengani nde mbo wɛndi wa Mungu bonangolomoko ko end’ino oso, kongo ko kwa asofekel’ino wao la asotang’ino mbo otionde ndoɔ̈lɔ liwawi lia loiko, tɛnɛ ngo tosokakikwa ende bato ba tukela yasi.

⁴⁷Eoka Ngɛnɛ asotel’iso ndola ongoma, mbo— Isosɛlɛ aɛ kwa tala ende bato ba tukela yasi, Mbo oyaleke yɛnɛlɔ ya liuwesi ko nda bako ba wenda.

⁴⁸Okaka to bato ba tukela yasi ongoma, iyo lokaka limɛngɔ, iyo loinakela wɛndi wa Ngɛnɛ la batotina ebüchomokö ndɔɔ̈lɔ liwawi lia loiko, iyo ana loimela.

⁴⁹Ongoma wɛndi wa Ngɛnɛ lomelakana nda yese ena etotina.

⁵⁰Nde BaYuda angɛnɛ lɔfɔɔlɔ batomali ba lisomboli ebalitesomu la biange ya okenge, mbo bafumbeseke bato ndokongola Paulo la Balanaba, limɔ iyo losaya iyo nda bolelo wa yese yau.

⁵¹Limɔ Paulo la Balanaba lofufoel’iyo liunge elisowatema la batindi bau, iyo lɔkɛ nda Ikonio,

⁵²ani baeki lotuma la limɛngɔ la Bolimo Botanu.