Read lokele Tomo Ya Batomomu 14 Bible Online

Tomo Ya Batomomu 14 - lokele bible

Tomo Ya Batomomu 14

¹Limɔ nda Ikonio ko ongoma, Batomomu lɔkɛ nda ɛsɔngɔmɛlɔ ya BaYuda, iyo lonangola omao la ongoma bato wike loimela, la BaYuda la BaHela imɔ.

²Kongo ko BaYuda ebafekaka oimela, iyo lofumbesa betema ya bato ba tukela yasi mbo bakeelek’eba beoto bobe.

³Ongoma to, iyo lotikala yumwa omao ani batonangola la lotendela loasɔ loa Ngɛnɛ, la Inde angɛnɛ lokɔkɔmɛsɛ wɛndi wa booto wande ko la ndembe ya bisisho eyakelomoko ko la besamba yau la isosha shande.

⁴Nde bato ba okenge loatana, bamɔi lowatema la BaYuda, bamɔi la Batomomu.

⁵Limɔ asangaka la BaYuda l’eba tukela yasi amamwito la benyafala yau ndosungamel’iyo la ndokushak’iyo batalɛ,

⁶Batomomu loluwa loasɔ, la iyo lokwa otili nda bekenge ya Lusetula la Delebe, nda tukela ya Lukaonia, la nda yese bitimbi,

⁷la iyo lokanangokole Mboli Ilau omao.

⁸Nda okenge wa Lusetula boto oyatiaka la bofoka nda bakolo loyalaka se nda mboka, aaka la ekoti ko nda baotelo bande, angokɔkɔlɔ ndokɛndɛ.

⁹Boto-yo lolaila ani atoonga Paulo, Paulo lotichak’inde la ɛnɛk’inde mbo boto ale la liimeli liouwesomo,

¹⁰inde loonga lande la limiki lifi mbo— Emalaka fii nda batindi; limɔ inde loungwa likolo, inde loakola ndɔkɛndɛkɛndɛ.

¹¹Limɔ ɛnɛkɛ bikuke ya bato lona eloakelaka Paulo, iyo loamama la limiki lifi nda lioi lia Lukaonia mbo— BaMungu basosulwa se end’iso ko la liluku lia balomboki!

¹²Iyo lota Balanaba lina liko Sheu la Paulo lina liko Heleme eoka ayali nde ikomya sha lioi.

¹³Aaka esemoelo ya Sheu tina la okenge, kanga yande loesha mbolo la bangɛlɛtɛ ba fɔtɔtɔ konda biome ya okenge, iyo losanga ndosemola batomomu amamwito la bikuke ya bato.

¹⁴Nde okaka Paulo la Balanaba ongoma, iyo losalaka bisinda yau, iyo loungwela ekuke ya bato, iyo loamama mbo— ¿Bato, monito otokela ani?

¹⁵Iso imɔ twende ko balomboki ko la liluku eliyali lanu la tosoeshel’ino Mboli Ilau mbo bosokweke nda yeka-bi ya likeela ko ende Mungu wa loiko, oyakelaka la use la wenda-bo wa se la balia la bitotina imɔ ebile nda yao.

¹⁶Nda fɛtɔ ya kwala, amachaka bato ba tukela bitotina mbo bakɛndɛkɛndɛkɛ olo alɛmbɛkɛ’iyo;

¹⁷kongo ko atialenjaka ndosɛlɛ iso boluwesi mbo atokelaka iso ko bolau, wofaef’iso mbula yosokwa nda use la biaa ya biula ya bilanga yokanesela ino la bieka la limɛngɔ imɔ.

¹⁸Nde ko la baoi-ba iyo lɔɛnɛ ko tale ndokufesa bikuke mbo batasemol’iyo la iyongo shau.

¹⁹Lamao BaYuda angɛnɛ losokwa nda Ikonio oyafumbesa bikuke ya bato la iyo lokushaka Paulo batalɛ, limɔ iyo losulia inde nda liko lia okenge ani iyo lotanga nde mbo asowa.

²⁰Nde mbisa baeki lolingelaka Paulo la inde loemala okainwa nda okenge; lɛlɛngɔ inde lɔkɛ amamwito la Balanaba konda Delebe.

²¹Asilaka iyo ndonangoela bato nda okenge ona la ndosɛlɛ baeki wike, iyo loinwa liasi nda Lusetula la Ikonio la Antiokia;

²²ani batokɔkɔmɛsɛ betema ya baeki, iyo lofumbesa mbo baundeke liimeli ngwi, iyo loekes’iyo mbo lole loasu mbo tɔɔtɛkɛ nda Bɔkɔta wa Mungu ko la bifembi wike.

²³La nda bitanda bitotina, iyo loaa bamɔi ndoyala benyafala yau, limɔ ko la likufi lia bieka la lisombokoli, iyo lotamb’iyo ende Ngɛnɛ oyasolendelo iyo olendelo Inde.

²⁴Limɔ iyo loetaka tukela ya Pisidia, iyo loiya nda Pamfulia,

²⁵iyo lonangola wɛndi nda okenge wa Pelenga, limɔ iyo lɔkɛ konda Atalia.

²⁶Lamao iyo lɔkɛ ko la watɔ wa lofofo konda Antiokia, olo üchomokö iyo oso la booto wa Mungu okakelaka likuwa lisɔɔlɔlɔ iyo ko kwani.

²⁷Iyak’iyo omao, iyo lɔsɔngɔmɛsɛ etanda la iyo lokambesa etanda yao ina ebikeliki Mungu amamwito lau nda kɛndɔ la ani aliolak’Inde bome boko fofe yoimela ende bato ba tukela yasi.

²⁸Iyo loumwa to omao sumbu amawito la baeki.