Read lokele Tomo Ya Batomomu 15 Bible Online

Tomo Ya Batomomu 15 - lokele bible

Tomo Ya Batomomu 15

¹Lamao beoto bamɔi ba Yudea loakola ndoekesa bato ba etanda mbo— Sakolo ko botenomo totombe kwa boyaeli wa Mɔsɛ ani ino angokɔkɔlɔ ouwesomo.

²Eokao Paulo la Balanaba lowesana lau, iyo lofenyakana lau finɛ nda loasɔ-lo, limɔ beoto lotoma Paulo la Balanaba la bamɔi basi bau, mbo baɛkɛ ende Batomomu la biange nda Yelusaleme ndokafelana eloasɔ-lo.

³Eba Etanda lokatik’iyo nda mboka, limɔ iyo lotandela yese ya Foinike la Samalia, iyo lokambesa eba etanda omao mbo bato ba tukela ya wenda basokikwa ende Mungu, la ongoma iyo lofa beoto limɛngɔ finɛ.

⁴Iyak’iyo nda Yelusaleme banyangelomoko la etanda la Batomomu la biange, iyo lokambesa bato bitotina ebiakelaka Mungu amamwito lau nda kɛndɔ.

⁵Kongo ko bamɔi ebawatemaka la botükä wa Bafalusi oso, nde kwani baimeli nde, iyo loemesana ndoonga mbo— Loengani mbo batenomoko totombe la mbo bakambesomoko ndolitesa Bikela ya Mɔsɛ.

⁶Limɔ Batomomu la biange lɔɔtɔ ikumbɛ sha eloasɔ-lo

⁷limɔ ani basofelakana yumwa, Petelo loemala, inde loonga lau mbo— Beoto ya Etanda, ino nd’aluwi mbo ko oso oso Mungu loaa imi wanu, mbo bato ba tukela yasi, bokeke wɛndi wa Mboli Ilau ko la bɔnɔkɔ wami la mbo bimeleke.

⁸La Mungu oyaluwi nde betema ya bato asofaef’iso ndembe yolembeelesa likulyi, eko mbo asof’imɔ ko iyo Bolimo Botanu kwa asofomo iso,

⁹atiatwanes’iso lau, nde asotanesa betema yau imɔ ko la liimeli.

¹⁰¿Eokao monito otosomesa Mungu ani atokot’ino ndotaka bekuku ya bolito nda kingo ya baeki, bolito ebotikɔkɔlɛ la batata basu la iso imɔ ndotola wao?

¹¹Kongo ko, ko la booto wa Ngɛnɛ Yesu, tosoimela mbo totouwesomo, la iso lau imɔ lisanga.

¹²Ongoma batotina ba lisɔngɔmi loyala ko tau, la iyo lolaila Balanaba la Paulo ani basanoelak’iyo loasɔ loa ndembe ya bisisho ebiakelaka Mungu ende bato ba tukela ya wenda ko lau.

¹³Asilak’iyo ndoonga, limɔ Yakobo lomutola mbo— Beoto, okaka to lioi liami;

¹⁴Simona asokambes’iso ani ayaeli Mungu oso la booto ende bato ba tukela yasi ndoyɔsɛl’iyo botuka botangokomo la lina liande.

¹⁵La baoi-ba basangani nde la bao ebaongaka Batɔndɔli kwala mbo—

¹⁶Mbisa yeinwaka nde liasi, Yeemesaka eyaelo ya Dawidi eyaukwaka; Itowambaka likwɛngwɛ lia yao, ndoswa liao liasi,

¹⁷Mbo bato ebakasandeloko se balukeke Mungu Ambo bato ba bienda batotina ebatotangomo la lina liami.

¹⁸Ngɛnɛ aongaka ongoma, ako Inde oyaluwesaka bato njasɔ-bi ko kwaala.

¹⁹Eokao, imi nd’atoata loasɔ ko ani, mbo lotiengane lasu ndoeyaeyesa eba tukela yasi ebatokikwaka ende Mungu;

²⁰kongo ko totomelek’iyo lokasa mbo bakileke yeka ebisoseyama la toongo twa mungu-ya-bɛfɔnɔ, la bafekeke nyongo la bakileke ndola nyama eyolomoko la lokuwamelo loa kingo, la bakila.

²¹Eoka konda kwalakwala bikela ya Mɔsɛ lonangolomoko nda bokenge la bokenge olo atangomoko lokasa loande Yenga la Yenga nda bisɔngɔmɛlɔ.

²²Limɔ Batomomu la Biange la bato batotina ba Etanda lokuliana ndoaa bamɔi bau la ndotom’iyo nda Antiokia amamwito la Paulo la Balanaba. Iyo lotoma Yuda oyatangomu Balasaba la Sila bako betoli oso ya beoto ya Etanda,

²³iyo lotom’iyo la lokasa-lo nda besamba yau— Iso Batomomu la Biange ya beoto, tosotoma losamɔ ende beoto ya tukela yasi nda Antiokia, la nda Sulia, la nda Kilikia.

²⁴Eoka tosooka mbo bato bamɔi basu basookes’ino toloi ko la baoi bau ebasoeyaeyesa betema yanu, (ani iso totit’iyo ndola)

²⁵tosokuliana nda ikumbɛ ndoaa bato bamɔi la ndotom’iyo end’ino amamwito l’ebasamomu lasu bako Balanaba la Paulo,

²⁶bato ebasokulya elikanela ya bawawi bau loasɔ loa Ngɛnɛ wasu Yesu Masiya.

²⁷Eokao tosotoma Yuda la Sila mbo basanoelek’ino loasɔ-lo la bɔnɔkɔ ko iyo angɛnɛ.

²⁸Ko la Bolimo Botanu lasu tosokuliana mbo toitotelak’ino bolito wa baiti basi, sakolo ngo ko eba, bako mbo—

²⁹bokileke bieka ebisüchomoko ende mungu-ya-bɛfɔnɔ, la bakila, la nyama eyolomo la lokuwamelo loa kingo la nyongo. Bokilaka njasɔ-bi, ino kokelaka ko olau. Kɔkɔmɔmɔ la wɛli!

³⁰Atomomoko iyo, ongoma iyo lɔkɛ nda Antiokia, iyo losɔngɔmɛsɛ eba Etanda, iyo lofaef’iyo lokasa.

³¹Atangak’iyo loao, iyo lookaka limɛngɔ lifi nda tokakanelo twa loao.

³²Limɔ Yuda la Sila ebaaka imɔ batɔndɔli, iyo lofumbes’iyo ko la linangoli lifi, iyo lowangemesa betema yau.

³³Atikalak’iyo sumbu yumwa omao, eba beoto loinol’iyo la lilatemi ende ebatomak’iyo.

³⁵Kongo ko Paulo la Balanaba lotikala nda Antiokia ndokaekese la ndokanangokole Mboli Ilau ya wɛndi wa Ngɛnɛ Mungu, amamwito la bato basi wike.

³⁶Mbisa ya bacho bamɔi Paulo loonga la Balanaba mbo— Toinweke liasi oketaeta fɛtɛti ende eba beoto nda kenge bitotina olo anangolak’iso wɛndi wa Ngɛnɛ mbo twɛnɛkɛ ani ayali iyo.

³⁷Balanaba losanga ndokɛsɛnɛ la Yoane oyatangomu Malako amamwito lau,

³⁸nde Paulo loenyela mbo etiengane ndowatema la oto oyasenyanaka lau nda Pamfulia, oyatiakɛndɛkɛ lau nda likuwa.

³⁹Iyo lowesana to, la ongoma iyo losenyana; Balanaba lɔkɛsɛnɛ la Malako, iyo lɔkɛ la watɔ wa lofofo nda bosanga wa Kupolio,

⁴⁰nde Paulo loaa Sila ndɔkɛ lande; limɔ üchomoko iyo nda booto wa Ngɛnɛ ko la beoto ya Etanda,

⁴¹iyo loetaka nda Sulia la Kilikia iyo lowangemesa betema ya eba bitanda.